ប្រាក់ចំណូលរបស់ក្រុមហ៊ុន Samsung បានកើនឡើងជិត១៣% នៅត្រីមាសទី១ឆ្នាំនេះ បើធៀបនឹងឆ្នាំមុន ខណៈដែលប្រាក់ចំណេញប្រតិបត្តិការបានកើនឡើងជាង៩០០% នៅក្នុងរយៈពេលដូចគ្នានេះ។ តួលេខនេះគឺស្របតាមការបង្ហាញរបស់ក្រុមហ៊ុន Samsung កាលពីដើមខែមេសា ដែលរំពឹងទទួលបានប្រាក់ចំណេញប្រតិបត្តិការរបស់ខ្លួនក្នុងត្រីមាសពីខែមករា ដល់ខែមីនា ទំនងជាកើនឡើងដល់ជិត៥ពាន់លានដុល្លារ គឺកើនឡើង៩៣១% បើធៀបនឹងឆ្នាំមុន។ ក្រុមហ៊ុននេះរំពឹងថា ប្រាក់ចំណូលនៅត្រីមាសទី១មានទំហំជាង៥១ពាន់លានដុល្លារ។
ក្រុមហ៊ុនអេឡិចត្រូនិកខ្នាតយក្សរបស់កូរ៉េខាងត្បូងមួយនេះ បានខាតបង់ប្រាក់ចំណូលយ៉ាងច្រើននៅក្នុងឆ្នាំ២០២៣ ខណៈដែលឧស្សាហកម្មមួយនេះ បានងើបឡើងវិញពីការធ្លាក់ចុះនៃតម្រូវការអេឡិចត្រូនិក នៅក្រោយការផ្ទុះឡើងនៃជំងឺកូវីដ។
ក្រុមហ៊ុននេះបាននិយាយក្នុងសេចក្តីថ្លែងការណ៍មួយនៅថ្ងៃអង្គារ នេះថា ការកើនឡើងនូវប្រាក់ចំណូល និងប្រាក់ចំណេញប្រតិបត្តិការរបស់ក្រុមហ៊ុននេះ គឺដោយសារតែការកើនឡើងខ្លាំងនូវការលក់ទូរសព្ទឆ្លាតវៃស៊េរី Galaxy S24 របស់ខ្លួន និងការដំឡើងថ្លៃសម្រាប់បន្ទះឈីបអង្គចងចាំគួបផ្សំនឹងការកើនឡើងនូវតម្រូវការផលិតផលបច្ចេកវិទ្យាសកល៕
អត្ថបទ៖ សុខ មង្គល
