អាជ្ញាធរវៀតណាម បិទកន្លែងបណ្តុះសណ្តែកបណ្តុះពីរកន្លែង ក្រោយរកឃើញថា បានប្រើសារធាតុគីមីដែលអាចប៉ះពាល់ដល់សុខភាពធ្ងន់ធ្ងរ

អាជ្ញាធរវៀតណាម បានឆ្មក់ចូលឆែកឆេររោងចក្របណ្តុះសណ្តែក​ចំនួនពីរកន្លែងកាលពីថ្ងៃទី២៣ ខែឧសភា ដោយបានរឹបអូសធុងបណ្ដុះសណ្ដែកជាង៨៧០ធុងមានទម្ងន់ជាង៣តោន។ លោក លូ វ៉ាន វេ (Luu Van Ve) អាយុ៥៦ឆ្នាំ និងលោក តា វ៉ានហៃ អាយុ៥៥ឆ្នាំម្ចាស់រោងចក្រទាំងពីរនេះបានសារភាពថា ពួកគេបានដាក់ត្រាំសណ្តែកនៅក្នុងសារធាតុគីមីបេនស៊ីលអាដេនីន (6-BAP) ដែលជាសារធាតុគីមីសម្រាប់បណ្ដុះរុក្ខជាតិ ប៉ុន្តែសារធាតុគីមីនេះត្រូវបានហាមឃាត់ក្នុងការផលិតចំណីអាហារ ព្រោះវាមានហានិភ័យសុខភាពធ្ងន់ធ្ងរ។

មន្ត្រីជំនាញបាននិយាយថា ប្រសិនបើគេទទួលទានអាហារដែលផ្ទុកសារធាតុគីមីនេះជាប្រចាំ វាអាចបណ្តាលឱ្យខូចខាតយ៉ាងធ្ងន់ធ្ងរដល់ប្រព័ន្ធសរីរាង្គសំខាន់ៗជាច្រើនដូចជាថ្លើម តម្រងនោម និងសួតជាដើម ហើយវាថែមទាំងអាចបណ្តាលឱ្យមនុស្សស្លាប់ទៀតផង៕

ដោយ៖ សុខ មង្គល