ទំហំពាណិជ្ជកម្មអន្តរជាតិរបស់វៀតណាមធ្លាក់ចុះ ប៉ុន្ដែ អតិរេកពាណិជ្ជកម្មមានជិត១០ពាន់លានដុល្លារដុល្លារ

សារព័ត៌មាន Vietnam News បានដកស្រង់ទិន្នន័យពីការិយាល័យស្ថិតិទូទៅរបស់វៀតណាមកាលពីថ្ងៃចន្ទមកផ្សាយថា តម្លៃទំនិញនាំចេញនាំចូលសរុបរបស់វៀតណាមក្នុងរយៈពេលប្រាំខែដំបូងឆ្នាំនេះមានទំហំសរុបប្រហែលជាង ២៦២ ពាន់លានដុល្លារ ធ្លាក់ចុះជិត១៥% ។

ទិន្នន័យបង្ហាញថា ក្នុងអំឡុងពេលនោះ វៀតណាមមានអតិរេកពាណិជ្ជកម្មក្នុងតម្លៃរហូតដល់ទៅជិត១០ពាន់លានដុល្លារ។ ជាក់ស្ដែង វៀតណាមបាននាំចេញទំនិញតម្លៃប្រមាណ ជាង ១៣៦ពាន់លានដុល្លារ ខណៈដែលការនាំចូលសរុបមានតម្លៃជាង ១២៦ពាន់លានដុល្លារ។ ទោះបីជាយ៉ាងនេះក្ដី នៅ ៥ ខែដើមឆ្នាំនេះ ទាំងការនាំចេញ ទាំងការនាំចូល សុទ្ធតែថយចុះលើសពី ១០% បើធៀបនឹងរយៈពេលដូចគ្នាកាលពីឆ្នាំមុន។

ប្រភពដដែលបានអះអាងថា ទំនិញសំខាន់ៗដែលវៀតណាមនាំចេញក្នុងតម្លៃលើសពី ១ ពាន់លានដុល្លារដុល្លារ មាន ២៣ មុខ ហើយនៅក្នុងនោះ ទំនិញកែច្នៃមានតម្លៃសរុបប្រមាណជាង ១២០ ពាន់លានដុល្លារ ស្មើនឹងជាង ៨៨% ផលិតផលកសិ-រុក្ខាប្រមាញ់មានតម្លៃជាង ១០ពាន់លានដុល្លារ; ផលិតផលជលផលតម្លៃជាង ៣ ពាន់លានដុល្លារ; ប្រេងឥន្ធនៈ និងរ៉ែមានតម្លៃប្រហែលជិត២ ពាន់លានដុល្លារ។

មកដល់ពេលនេះ គេដឹងថា អាមេរិក គឺជាទីផ្សារនាំចេញដ៏ធំរបស់ទំនិញវៀតណាម ដែលមានតម្លៃឃាង ៣៧ ពាន់លានដុល្លារ រីឯប្រទេសចិនគឺជាទីផ្សារនាំចូលធំបំផុតរបស់ប្រទេសនេះ ដោយមានទឹកប្រាក់ជាង ៤៣ ពាន់លានដុល្លារ៕