ទីភ្នាក់ងារព័ត៌មានរ៉យទ័របានរាយការណ៍ថា មកដល់ពេលនេះ នៅពេលដែលភាពតានតឹងរវាងកំពូលមហាអំណាចសេដ្ឋកិច្ចទាំងពីរមិនចុះថមថយ, វាកាន់តែពិបាកទៅៗសម្រាប់សហគ្រិនបច្ចេកវិទ្យាចិនដែលមានមហិច្ឆតាពង្រីកខ្លួនទៅអាមេរិក។
នៅមុនឆ្នាំ ២០១៩ មានក្រុមហ៊ុនចិនធំៗមួយចំនួនបានវាយលុកចូលទីផ្សារអាជីវកម្មនៅសហរដ្ឋអាមេរិក ប៉ុន្តែក្រោយពេលដែលភាពតានតឹងខាងពាណិជ្ជកម្មរវាងចិននិងសហរដ្ឋអាមេរិកកាន់តែកើនឡើង ជាពិសេសបន្ទាប់ពីទីក្រុងវ៉ាស៊ីនតោនបានដាក់ទណ្ឌកម្មលើក្រុមហ៊ុនទូរគមនាគមន៍យក្សរបស់ចិន គឺក្រុមហ៊ុន Huawei, ក្រុមហ៊ុនចិនមួយចំនួនបានចាប់ផ្តើមបង្កើតទីស្នាក់ការកណ្តាលនៅក្រៅប្រទេស។ នេះជាវិធានការមួយដែលអាចជួយឱ្យពួកគេគេចផុតពីការចាប់ថ្នាក់របស់រដ្ឋាភិបាលសហរដ្ឋអាមេរិកបានច្រើនជាងមុន។
ឥឡូវនេះ ម្ចាស់អាជីវកម្មបច្ចេកវិទ្យាចិនមួយចំនួននិយាយថា ពួកគេត្រូវការបន្តអាជីវកម្មរបស់ពួកគេឲ្យកាន់តែទូលំទូលាយ ហើយពួកគេថែមទាំងចង់ទទួលបានសិទ្ធិស្នាក់នៅអចិន្ត្រៃយ៍ ឬសញ្ជាតិនៅបរទេស ដើម្បីជៀសវាងការទប់ស្កាត់ និងការលំអៀង ប្រឆាំងនឹងក្រុមហ៊ុនចិននៅសហរដ្ឋអាមេរិក។
អត្ថបទគួរអាន
លោក រ៉ាយអេន (Ryan) ពាណិជ្ជករចិនមួយរូប ដែលមកពីទីក្រុង ស៊ិនជិន (Shenzhen) បានអះអាងដោយមិនបញ្ចេញនាមត្រកូលព្រោះបារម្ភនឹងចំណាត់ការរបស់ទីក្រុងប៉េកាំងថា អាជីវកម្មផ្នែក Software ដែលមានអាយុ៣ឆ្នាំរបស់លោក បាននិងកំពុងតែបោះជំហ៊ានដល់ចំណុចមួយដែលអាចថាត្រូវតែពង្រីកនៅសហរដ្ឋអាមេរិក ដែលជាប្រទេសសេដ្ឋកិច្ចធំបំផុតរបស់ពិភពលោក។ ប៉ុន្តែលោកខកចិត្តចំពោះជម្លោះពាណិជ្ជកម្មរវាងមហាអំណាចទាំងពីរ និងការរឹតបន្តឹងលើចំនួនក្រុមហ៊ុនចិនដែលកំពុងកើនឡើង។
ពាក់ព័ន្ធនឹងបញ្ហានេះ រ៉យទ័រ ក៏បានសំភាសន៍សហគ្រិនបច្ចេកវិទ្យាចំនួន៧រូបមកពីប្រទេសចិន ដែលភាគច្រើន ពួកគេទទួលបានការអប់រំនៅបរទេស ហើយកំពុងតែចង់ពង្រីកអាជីវកម្មរបស់ពួកគេនៅក្នុងសហរដ្ឋអាមេរិក។ ទាំងអស់គ្នាកំពុងព្យាយាមទទួលបានសិទ្ធិស្នាក់នៅអចិន្ត្រៃយ៍ ឬសញ្ជាតិនៅកន្លែងផ្សេង ដោយភាគច្រើនស្វែងរកជម្រើសជាច្រើនរួមមានហុងកុង កាណាដា ជប៉ុន សហរដ្ឋអាមេរិក និងសិង្ហបុរី។
សហគ្រិន និងអ្នកប្រឹក្សាជាច្រើន បាននិយាយថា ភាពតានតឹងផ្នែកភូមិសាស្ត្រនយោបាយគឺមានន័យថា ជាបរិយាកាសមិនសូវអំណោយផល សម្រាប់ក្រុមហ៊ុនចិនដីគោកដែលចង់ប្រតិបត្តិការ ឬទទួលបានមូលនិធិនៅសហរដ្ឋអាមេរិកនោះទេ៕
