ក្រុមហ៊ុន Walmart និងក្រុមហ៊ុនធំៗជាច្រើនមានការព្រួយបារម្ភកាន់តែខ្លាំងចំពោះផែនការដំឡើងពន្ធគយរបស់លោក ត្រាំ

ក្រុមហ៊ុនសាជីវកម្មធំៗជាច្រើនរបស់សហរដ្ឋអាម៉េរិក រួមទាំងក្រុមហ៊ុនលក់រាយដ៏ធំ Walmart បានជជែកគ្នាយ៉ាងផុសផុលពីបញ្ហាពន្ធគយស្ទើរគ្រប់វេទិកា ដូចជាព្រឹត្តិការណ៍វិនិយោគិនថ្មីៗនេះ និងនៅក្នុងសន្និសីទតាមទូរសព្ទ រួមទាំងព្រឹត្តិការណ៍មួយចំនួនទៀត ក្រោយលោក ដូណាល់ ត្រាំ បានវិលត្រឡប់មកគ្រប់គ្រងសេតវិមានសហរដ្ឋអាម៉េរិកជាថ្មី។

ក្រុមហ៊ុន Walmart ដែលជាក្រុមហ៊ុនលក់រាយធំបំផុតនៅអាម៉េរិក បានលើកឡើងថា តម្លៃទំនិញអាចនឹងមានការកើនឡើង ប្រសិនបើលោក ត្រាំ ពិតជាដំឡើងពន្ធលើទំនិញនាំចូលមកកាន់ទីផ្សារសហរដ្ឋអាម៉េរិកមែននោះ។ អ្នកនាំពាក្យរបស់ក្រុមហ៊ុន Walmart បាននិយាយថា ពួកគេព្រួយបារម្ភថា ការដំឡើងពន្ធច្រើនពេក អាចនឹងជំរុញឱ្យការចំណាយរបស់អតិថិជនមានការកើនឡើង ស្របពេលដែលពួកគេនៅមានអារម្មណ៍ថា កំពុងរងគ្រោះដោយអតិផរណាស្រាប់ទៅហើយនោះ។

គួរបញ្ជាក់ថា លោក ដូណាល់ ត្រាំ បានបញ្ហាដំឡើងពន្ធគយធ្វើជាចំណុចស្នូលនៃរបៀបវារៈសេដ្ឋកិច្ចរបស់លោក និងជាប្រភពចំណូលនៃការប្រមូលពន្ធមួយរបស់អាម៉េរិក។ កត្តានេះបាន និងកំពុងធ្វើឱ្យក្រុមនាយកប្រតិបត្តិក្រុមហ៊ុននានា មានចម្ងល់កាន់តែខ្លាំងចំពោះប្រធានបទនេះ ដោយពួកគេភាគច្រើននៅតែផ្ដោតលើការប្រឹងប្រែង ដើម្បីបន្តធ្វើពិពិធកម្មខ្សែច្រវាក់ផ្គត់ផ្គង់របស់ខ្លួនជាពិសេសចេញឆ្ងាយពីប្រទេសចិនដែលជាគោលដៅដ៏សំខាន់របស់លោក ត្រាំ។

បើតាមទិន្នន័យរបស់ក្រុមហ៊ុន LSEG បានឱ្យដឹងថា តាំងពីដើមខែកញ្ញា មក នាយកប្រតិបត្តិក្រុមហ៊ុនជិត២០០បានពិភាក្សាគ្នាអំពីពន្ធនៅតាមសន្និសីទវិនិយោគិន ពោលគឺកើនឡើងជិតទ្វេដង បើធៀបនឹងរយៈពេលដូចគ្នានៅក្នុងដំណើរការបោះឆ្នោតកាលពីឆ្នាំ២០២០។

ប្រធានាធិបតីជាប់ឆ្នោតរបស់អាម៉េរិក លោក ដូណាល់ ត្រាំ បានស្នើឱ្យយកពន្ធ៦០%លើទំនិញរបស់ចិន ដែលជាប្រទេសនាំចេញធំបំផុតរបស់ពិភពលោក និងពន្ធលើទំនិញជាសកលចំនួន១០% ឬច្រើនជាងនេះ ដែលលោកចាត់ទុកថា ជាផ្នែកមួយចាំបាច់ដើម្បីបំបាត់ឱនភាពពាណិជ្ជកម្មរបស់អាម៉េរិក។ ក្រុមហ៊ុន Oxford Economics បានប៉ាន់ប្រមាណថា ការដាក់ពន្ធគយ៦០%លើប្រទេសចិនអាចជំរុញឱ្យអតិផរណារបស់អាមេរិកកើនឡើង០,៧%៕

អត្ថបទ៖ សុខ មង្គល