ផែនការវិនិយោគហេដ្ឋារចនាសម្ព័ន្ធក្រៅប្រទេសរបស់អឺរ៉ុប មានចំណុចខ្លាំងអ្វីខ្លះ ដើម្បីប្រជែងនឹងគម្រោងផ្លូវមួយខ្សែក្រវាត់មួយរបស់ចិន?

តើផែនការវិនិយោគហេដ្ឋារចនាសម្ព័ន្ធក្រៅប្រទេស របស់សហភាពអឺរ៉ុប មានលក្ខណៈពិសេសអ្វីខ្លះ ដើម្បីប្រជែងនឹងគម្រោងផ្លូវមួយខ្សែក្រវាត់មួយរបស់មហាយក្សចិន?ហើយវានឹងចំណេញអ្វីខ្លះ?

ផែនការវិនិយោគហេដ្ឋារចនាសម្ព័ន្ធក្រៅប្រទេសរបស់សហភាពអឺរ៉ុប ត្រូវបានគេឲ្យឈ្មោះថា «ច្រកទ្វារសកលលោក» ឬ អង់គ្លេសហៅថា Global Gateway ដែលវាផ្ដោតជាសំខាន់ទៅលើ និរន្តរភាព និង គុណតម្លៃរបស់អឺរ៉ុប ដើម្បីពង្រឹងទំនាក់ទំនងជាមួយនឹងដៃគូ ពិសេសនៅក្នុងតំបន់ឥណ្ឌូប៉ាស៊ីហ្វិក។ ក្របខណ្ឌវិនិយោគនេះ ត្រូវបានកំណត់ដើម្បីផ្ដោតទៅលើការតភ្ជាប់ឌីជីថល ខណៈដែលបច្ចុប្បន្នប្រទេសទាំង ២៧នៃសហភាពអឺរ៉ុប កំពុងសំឡឹងមើលអំពីការបង្កើនទំនាក់ទំនងជាមួយនឹងតំបន់ឥណ្ឌូប៉ាស៊ីហ្វិកនេះ។

តាមរយៈ សេចក្ដីព្រាងផែនការយុទ្ធសាស្ត្ររបស់អឺរ៉ុប នៃភាពជាដៃគូច្រកទ្វារសកលលោកបានឲ្យដឹងថា ក្របខណ្ឌវិនិយោគនេះ នឹងផ្ដោតទៅលើចំណុចសំខាន់៥យ៉ាង ដោយសង្កត់ធ្ងន់ទៅលើភូមិសាស្ត្រតំបន់ ដូចជា ការផ្លាស់ប្ដូរឌីជីថល, ការផ្លាស់ប្ដូរថាមពលស្អាត, ការដឹកជញ្ជូន, ទំនាក់ទំនងរវាងមនុស្សនិងមនុស្ស និង ពាណិជ្ជកម្ម និងភាពធន់ខ្សែចង្វាក់ផ្គត់ផ្គង់ជាដើម។នេះបើតាមសារព័ត៌មានជប៉ុន Nikkei។

សេចក្ដីព្រាងផែនការដដែលនេះ ក៏បានគូសបញ្ជាក់ទៀតថា ការវិនិយោគទាំងអស់នេះ ត្រូវតែមានលក្ខណៈទូលំទូលាយ សុវត្ថិភាព និង និរន្តរភាព ដោយមានគោលបំណងនាំយកនិងផ្សារភ្ជាប់ប្រទេសនានា សង្គម និង ប្រជាជនឲ្យកាន់តែមានទំនាក់ទំនងជិតស្និទ្ធជាមួយគ្នា បង្កើតឲ្យមានការផ្លាស់ប្ដូរបៃតង និង វិស័យឌីជីថល ស្របតាមគុណតម្លៃរបស់សហភាពអឺរ៉ុប ពិសេស លទ្ធិប្រជាធិបតេយ្យ នីតិរដ្ឋ និងសិទ្ធិមនុស្ស។

តាមរយៈផែនការវិនិយោគហេដ្ឋារចនាសម្ព័ន្ធក្រៅប្រទេសនេះដែរ សហភាពអឺរ៉ុប ក៏នឹងបន្ដស្វែងរកសក្ដានុពលក្នុងការតភ្ជាប់ទំនាក់ទំនងក្នុងភាពជាដៃគូជាមួយនឹងអាស៊ានផងដែរ ដែលវាប្រហាក់ប្រហែលនឹងអ្វីដែលអឺរ៉ុបបានធ្វើរួចមកហើយជាមួយនឹងប្រទេសជប៉ុន និងឥណ្ឌា។

មូលនិធិ សាធារណៈរបស់អឺរ៉ុប ត្រូវបានគេរំពឹងថា នឹងបង្កើនការផ្ដល់ហិរញ្ញប្បទានបន្ថែមទៀត សម្រាប់គំនិតផ្ដួចផ្ដើមផែនការវិនិយោគហេដ្ឋារចនាសម្ព័ន្ធក្រៅប្រទេសនេះ ទៅក្នុងបណ្ដាប្រទេសចំណូលទាប និងមធ្យម ពិសេស តាមរយៈក្របខណ្ឌវិនិយោគថ្មីរបស់សហភាពអឺរ៉ុប ។ តាមរយៈក្របខណ្ឌវិនិយោគថ្មីរបស់សហភាពអឺរ៉ុប នឹងបង្កើតនូវប្រាក់ជំនួយរាប់ពាន់លានដុល្លារអាមេរិក និងអាចផ្ដល់ជូនដល់ទៅ ៤៦ពាន់លានដុល្លារ លើការធានាសម្រាប់ការវិនិយោគតាមរយៈក្របខណ្ឌវិនិយោគថ្មីនេះ។

បើយើងប្រៀបធៀបរវាងគំនិតផ្ដួចផ្ដើមរបស់អឺរ៉ុប និងគំនិតផ្ដួចផ្ដើមផ្លូវមួយខ្សែក្រវាត់មួយរបស់ចិន ឃើញថា កាលពីឆ្នាំ២០១៧ ប្រធានាធិបតីចិនលោក ស៊ីជីនពីង ធ្លាប់បានសន្យាថា នឹងផ្ដល់ទឹកប្រាក់១២៤ពាន់លានដុល្លារអាមេរិកឯណោះ សម្រាប់គំនិតផ្ដួចផ្ដើមផ្លូវមួយខ្សែក្រវាត់មួយរបស់មហាយក្សចិន៕