តើថៃ អាចមានចេតនាអ្វីបានជាពន្យារពេលប្រគល់កងទ័ពទាំង១៨រូប ឱ្យកម្ពុជាវិញ?

ពាក់ព័ន្ធបញ្ហានេះ អ្នកជំនាញបានវាយតម្លៃថា ការពន្យារពេលក្នុងការប្រគល់កងទ័ព​មកឱ្យកម្ពុជាវិញនេះ អាចដោយសារថៃ ទុកធ្វើជាថ្នូរក្នុងការចរចាក្រោមលក្ខខណ្ឌណាមួយជាមួយកម្ពុជា ស្របពេលថៃ កំពុងបាក់មុខនៅលើឆាកអន្តរជាតិ ដោយសារការចូលចាប់ទាហានកម្ពុជា ដោយខុសច្បាប់។

លោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញទស្សនវិជ្ជា នៃរាជបណ្ឌិត្យសភាកម្ពុជា កត់សម្គាល់ឃើញថា រដ្ឋាភិបាលបានប្រឹងប្រែងរកគ្រប់វិធីសាស្រ្តធ្វើយ៉ាងណាឱ្យភាគីថៃ ឆាប់បញ្ជូនទាហានកម្ពុជា ដែលថៃ ប្រើល្បិចចាប់យកទៅមកឱ្យកម្ពុជា វិញ​។ អ្នកជំនាញរូបនេះ បានវាយតម្លៃថា ការពន្យារពេលក្នុងការបញ្ជូនកងកម្លាំងកម្ពុជា ទាំង១៨នាក់ឱ្យមកកម្ពុជាវិញរបស់កងទ័ពថៃ តាមអ្វីដែលខ្លួនបានសន្យាជាមួយកម្ពុជានេះ ថៃទំនងជាមានចេតនារក្សាទុកពួកគេធ្វើជាថ្នូរដាក់សម្ពោធមកលើកម្ពុជា សម្រាប់ការចរចាក្នុងលក្ខខណ្ឌណាមួយ។

​មិនខុសគ្នានោះទេ លោកបណ្ឌិត មាស នី អ្នកតាមដានការអភិវឌ្ឍសង្គម កត់សម្គាល់ឃើញថា បន្ទាប់ពីកាកបាទក្រហមអន្តរជាតិ ជួយអន្តរាគមន៍ ដែលបានចុះទៅពិនិត្យដល់កន្លែងបង្ខាំងកងទ័ពកម្ពុជា ដោយផ្ទាល់ឃើញថា ទាហានកម្ពុជាទាំង១៨នាក់ មានសុវត្ថិភាព។ យ៉ាងណាមិញអ្នកជំនាញរូបនេះ បានវាយតម្លៃថា ការពន្យារពេលក្នុងការបញ្ជូនកងទ័ពកម្ពុជា មកឱ្យកម្ពុជាវិញពីសំណាក់កងទ័ពថៃនេះ ថៃ ទំនងជាខ្លាចបាក់មុខនៅលើឆាកអន្តរជាតិ ព្រោះថៃបានចាប់ទាហានកម្ពុជា ក្នុងទឹកដីកម្ពុជា ទាំងប្រទេសទាំងពីរកំពុងអនុវត្តបទឈប់បាញ់ ដែលនេះជាទង្វើខុសច្បាប់។

​គួរបញ្ជាក់ថា ក្រសួងការពារជាតិ កម្ពុជា កាលពីថ្ងៃទី១០ ខែសីហា នៅតែទទូចឱ្យភាគីថៃ បញ្ជូនកងទ័ពកម្ពុជា ទាំង១៨នាក់​មកឱ្យកម្ពុជាវិញជាបន្ទាន់ ស្របតាមច្បាប់មនុស្សធម៌អន្តរជាតិ និងស្របតាមការអំពាវនាវរបស់ប្រទេសជាដៃគូរអន្តរជាតិ ជាច្រើន៕

អត្ថបទដោយ៖ ជា ម៉ារ៉ា