ថ្លែងក្នុងសន្និសីទសារព័ត៌មាននាព្រឹកថ្ងៃទី១៩ ខែឧសភា ឆ្នាំ២០២៥ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានគូសបញ្ជាក់ថា រាជរដ្ឋាភិបាលកម្ពុជាគ្រប់គ្រងស្ថានភាពម៉ាក្រូសេដ្ឋកិច្ចបានយ៉ាងល្អ ខណៈចំណូលជាតិមានការកើនឡើង ហើយការចំណាយត្រូវបានធ្វើឡើងយ៉ាងប្រុងប្រយ័ត្ន ចំទិសដៅ និងមិនខ្ជះខ្ជាយដែលធ្វើឱ្យមានអតិរេកសាច់ប្រាក់នៅក្នុងរតនាគារជាតិ។ បើតាមមន្រ្តីជាន់ខ្ពស់រូបនេះ ទោះបីរាជរដ្ឋាភិបាល បានចំណាយច្រើនលើប្រាក់ខែមន្រ្តីរាជការ និងផ្នែកសង្គមក៏ពិតមែន ប៉ុន្តែរាជរដ្ឋាភិបាលនៅតែមានអតិរេកសាច់ប្រាក់តាមរយៈការគ្រប់គ្រងបានល្អ និងកិច្ចខិតខំប្រឹងប្រែងក្នុងការប្រមូលចំណូលដោយតម្លាភាព និងការទទួលខុសត្រូវពីសំណាក់អគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករ ស្របពេលអត្រាប្ដូរប្រាក់មានលំនឹងល្អ និងអតិផរណានៅតែមានកម្រិតទាប។
ជាមួយគ្នានេះឯកឧត្តម ហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការបរទេស និងសហប្រតិបត្តិការអន្តរជាតិបានគូសបញ្ជាក់ថា ការអនុវត្តវិស័យការទូតសេដ្ឋកិច្ចរបស់រាជរដ្ឋាភិបាល នៅរយៈពេលចុងក្រោយនេះទទួលបានលទ្ធផលគួរជាទីមោទនៈ។ ជាក់ស្ដែងនៅរយៈពេល៣ខែចុងក្រោយនេះ កម្ពុជា បានអនុម័តគម្រោងវិនិយោគចំនួន១៦៣គម្រោងជាមួយទុនវិនិយោគសរុបប្រមាណ២ពាន់៥រយលានដុល្លារមានកំណើនជាង១១% បើធៀបនឹងរយៈពេលដូចគ្នាកាលពីឆ្នាំ២០២៤។ ទន្ទឹមនេះ ការប្រមូលចំណូលរបស់អគ្គនាយកដ្ឋានគយ និងរដ្ឋាករ នៅក្នុងរយៈពេល៣ខែដូចគ្នាមានចំនួនប្រមាណ១៤ពាន់៥០០លានដុល្លារ អាម៉េរិក មានកំណើនជាង១៤% បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមការគូសបញ្ជាក់របស់ឯកឧត្តម ហ្សង់ហ្វ្រង់ស័រ តាន់ ដែលបានបន្ថែមថា តាមរយៈការអនុវត្ត វិស័យការទូតសេដ្ឋកិច្ចដ៏សកម្មនេះ កម្ពុជានឹងទទួលបានជើងហោះហើរត្រង់ទៅមកជាមួយប្រទេសតួកគី និងការពង្រីកជើងហោះហើរពីទីក្រុងឌូបៃ នៅក្នុងឆ្នាំ២០២៥ នេះផងដែរ។
ជាមួយគ្នានេះឯកឧត្តម ហ្សង់ហ្វ្រង់ស័រ តាន់ ជឿជាក់ថា តាមរយៈការបន្តរក្សាបាននូវសន្តិភាពនឹងអាចធ្វើឱ្យកម្ពុជាមានការអភិវឌ្ឍ និងរីកចម្រើនបន្ថែមទៀត។ ស្របពេលស្ថានភាពសកល និងតំបន់កាន់តែផុយស្រួយប្រកបដោយគ្រោះថ្នាក់ រាជរដ្ឋាភិបាលមានការយល់ដឹងខ្ពស់ និងចេះដឹកនាំនយោបាយការបរទេសប្រកបដោយភាពបត់បែនតាមកាលៈទេសៈ៕
អត្ថបទ៖ បូ ដូឡា,រូបភាព ឯកសារ
