លោកស្រី ឯក សេងហុង កសិករដាំពោតក្រហមនៅខេត្តបាត់ដំបងបានគូសបញ្ជាក់ថា មកដល់ពេលនេះមានកសិករជាច្រើនកំពុងប្រមូលផលពោតក្រហម ខណៈតម្លៃពោតនៅឆ្នាំនេះមិនអាចលក់បានតម្លៃខ្ពស់ដូចឆ្នាំមុននោះទេ។ បើតាមកសិកររូបនេះ ហាងឆេងពោតគ្រាប់ ដែលអ្នកស្រីទើបលក់កាលពីប៉ុន្មានថ្ងៃមុន ត្រូវបានឈ្មួញទិញក្នុងតម្លៃ៥រយ៤០រៀលក្នុង១គីឡូក្រាម ខណៈពោតស្នូលមានតម្លៃចន្លោះពី៤០០រៀលទៅ៤រយ២០រៀលក្នុង១គីឡូក្រាម។ កសិកររូបនេះបានបន្តថា តម្លៃនេះមានការធ្លាក់ចុះប្រមាណ៣០០រៀលក្នុង១គីឡូក្រាម និងមិនអាចផ្តល់ប្រាក់ចំណេញដល់ខ្លួននោះទេ ពោលគឺបានត្រឹមតែទប់ទល់នឹងការចំណាយប៉ុណ្ណោះ។
ស្រដៀងគ្នានេះលោក ឈឿន រុំ កសិករដាំពោតក្រហមម្នាក់ទៀតក្នុងខេត្តបាត់ដំបងបានឱ្យដឹងថា ពោតគ្រាប់ដែលមានគុណភាពល្អត្រូវបានឈ្មួញទិញក្នុងតម្លៃប្រមាណ៥០០រៀលក្នុង១គីឡូក្រាម ខណៈពោតស្នូលមានតម្លៃប្រមាណ៤០០រៀលក្នុង១គីឡូក្រាម មានការធ្លាក់ចុះប្រមាណ៣០០រៀលបើធៀបនឹងឆ្នាំមុន។ បើតាមការអះអាងរបស់កសិកររូបនេះ តម្លៃនេះធ្វើឱ្យរូបលោកពិបាកក្នុងការទទួលបានប្រាក់ចំណេញ ដោយសារការដាំដុះចំណាយថ្លៃដើមខ្ពស់។ ទោះបីតម្លៃពោតក្រហមនៅឆ្នាំនេះមានការធ្លាក់ថ្លៃក៏ពិតមែន ប៉ុន្តែមិនបានធ្វើឱ្យកសិកររូបនេះបោះបង់មុខរបរមួយនេះនោះទេ។
ដោយឡែកលោក សុខ វិន ប្រធានសហគមន៍កសិកម្ម តាសែន បាត់ដំបង បានគូសបញ្ជាក់ថា ហាងឆេងពោតក្រហមនៅឆ្នាំនេះ ពិបាកធ្វើឱ្យកសិករទទួលបាននូវប្រាក់ចំណេញខ្លាំងណាស់ ដោយសារការចំណាយថ្លៃដើមផលិតមានការកើនឡើង។ ទោះបីពោតក្រហមនៅឆ្នាំនេះមានតម្លៃទាបក៏ពិតមែន ប៉ុន្តែប្រធានសហគមន៍រូបនេះអះអាងថា ឈ្មួញនៅតែបន្តទិញពីកសិករនិងពុំមានពោតត្រូវទុកចោលបង្កឱ្យមានផលប៉ះពាល់នោះទេ។
ជាមួយគ្នានេះប្រធានសហគមន៍កសិកម្ម តាសែន បាត់ដំបង សង្ឃឹមថា អ្នកមានធនធាននៅកម្ពុជានឹងវិនិយោគកែច្នៃលើគ្រាប់ពោតក្រហម ដើម្បីជួយលើកកម្ពស់ជីវភាពរបស់កសិករឱ្យមានលទ្ធភាពល្អឡើងវិញនាពេលខាងមុខ៕
អត្ថបទ៖ បូ ដូឡារូបភាពឯកសារ
