ការរៀបចំឥណទានឡើងវិញវាអាចសម្រាលបន្ទុករបស់អ្នកខ្ចីក៏ពិតមែន តែវាក៏អាចជះឥទ្ធិពលអវិជ្ជមានមកលើលំហូរសាច់ប្រាក់របស់គ្រឹះស្ថានធនគារ និងមីក្រូហិរញ្ញវត្ថុផងដែរ ដែលទាមទារឱ្យមានការថ្លឹងថ្លែង និងសិក្សាឱ្យបានល្អិតល្អន់មុននឹងរៀបចំឥណទានឡើងវិញជូនអតិថិជន។ តើអតិថិជនប្រភេទណាទើបអាចរៀបចំឥណទានឡើងវិញបាន? ហើយការកើនឡើងខ្លាំងនៃចំនួនអ្នករៀបចំឥណទានឡើងវិញ វាអាចធ្វើឱ្យប៉ះពាល់ដល់ប្រតិបត្តិការរបស់គ្រឹះស្ថានធនាគារ និងមីក្រូហិរញ្ញវត្ថុដែរ ឬទេ?
លោកជំទាវ ឌិត នីតា ប្រធានសមាគមមីក្រូហិរញវត្ថុកម្ពុជា បានគូសបញ្ជាក់ថា ការរៀបចំឥណទានឡើងវិញវាពិតអាចជួយសម្រាលបន្ទុកសងត្រឡប់ដល់អតិថិជនក៏ពិតមែន តែវាអាចធ្វើឱ្យប៉ះពាល់ដល់គោលនយោយហិរញ្ញវត្ថុ ជាពិសេសប្រាក់ចំណូលរបស់គ្រឹះស្ថានធនាគារ និងមីក្រូហិរញ្ញវត្ថុផងដែរ ប្រសិនការរៀបចំឥណទានឡើងវិញមានការកើនឡើងខ្លាំង។ ជុំវិញបញ្ហានេះ ប្រធានសមាគមមីក្រូហិរញ្ញវត្ថុរូបនេះស្នើឱ្យគ្រឹះស្ថានធនាគារ និងមីក្រូហិរញ្ញវត្ថុ ត្រូវគិតគូរ និងថ្លឹងថ្លែងឱ្យបានហ្មត់ចត់លើស្ថានភាពជាក់ស្តែងរបស់អតិថិជន មុននឹងផ្តល់សេវារៀបចំឥណទានឡើងវិញជូនពួកគេ។
បើតាមការអះអាងរបស់ថ្នាក់ដឹកនាំរូបនេះ ការរៀបចំឥណទានឡើងវិញនេះ វាបានកាត់បន្ថយនូវលំហូរសាច់ប្រាក់មួយចំនួនរបស់គ្រឹះស្ថាន បើទោះបីជាមិនមានការធ្វើសំវិធានធនដែលធ្វើឱ្យប៉ះពាល់ដល់ប្រាក់ចំណេញក៏ពិតមែន។ បើតាមការបញ្ជាក់របស់ប្រធានសមាគមរូបនេះ ការរៀបចំឥណទានឡើងវិញមានការកើនឡើងជាបន្តបន្ទាប់មកទល់ពេលនេះ និងរំពឹងថា នឹងបន្តកើនឡើងបន្ថែមទៀតផងដែរ។
អត្ថបទគួរអាន
ពាក់ព័ន្ធបញ្ហានេះដែរ លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានគូសបញ្ជាក់ថា បន្ទាប់ពីរៀបចំឥណទានឡើងវិញរួច ចង់ ឬមិនចង់អតិថិជននឹងត្រូវបង់ប្រាក់សងដល់គ្រឹះស្ថានធនាគារនៅក្នុងទំហំទឹកប្រាក់តិចជាងមុន ដែលវានឹងធ្វើឱ្យប៉ះពាល់ដល់លំហូរសាច់ប្រាក់របស់គ្រឹះស្ថានធនាគារមួយចំនួន ប៉ុន្តែបន្ទាប់ពីធនាគារជាតិ បានអនុញ្ញាតិឱ្យគ្រឹះស្ថានហិរញ្ញវត្ថុមិនចាំបាច់ធ្វើសំវិធានធន វាបានជួយសម្រាលបន្ទុកមួយចំនួនដល់គ្រឹះស្ថានហិរញ្ញវត្ថុឱ្យនៅតែមានភាពរឹងមាំ ដែលធ្វើឱ្យគ្រឹះស្ថានធនាគារ និងមីក្រូហិរញ្ញវត្ថុ មានសាច់ប្រាក់ច្រើនជាងមុនក្នុងការរៀបចំឥណទានឡើងវិញជូនដល់អតិថិជន។
គួរជម្រាបថា ការរៀបចំឥទានឡើងវិញ គឺជាគោលនយោបាយមួយដែលធនាគារជាតិនៃកម្ពុជា បានដាក់ចេញតាំងពីខែមីនា ឆ្នាំ២០២០មក ពោលគឺនៅពេលដែលកម្ពុជា ទទួលរងនូវការឆ្លងរីករាលដាលនៃជំងឺកូវីដ-១៩ ដើម្បីជួយសម្រាលបន្ទុកដល់អតិថិជន ដែលរងផលប៉ះពាល់ដោយផ្ទាល់ និងប្រយោលពីការឆ្លងរីករាលដាលនេះ។ យ៉ាងណាមិញ ថ្មីៗនេះ ធនាគារជាតិនៃកម្ពុជា ក៏បានចេញសារាចរណែនាំដល់គ្រឹះស្ថានធនាគារ និងហិរញ្ញវត្ថុ ឱ្យបន្តរៀបចំឥណទានឡើងវិញ ដើម្បីជួយសម្រាលបន្ទុកចំណាយប្រចាំគ្រារបស់អតិថិជន ក្នុងការបំពេញកាតព្វកិច្ចសងត្រឡប់ឥណទាន៕
