នាយកប្រចាំតំបន់របស់អង្គការសុខភាពពិភពលោកនៅទ្វីបអឺរ៉ុប លោក ហាន ឃ្លុង (Han Kluge) បានព្រមានថា ការស្លាប់មានត្រឹមតែ ៥០ម៉ឺននាក់ទៀតដែលត្រូវកត់ត្រានៅខែមីនាខាងមុខនេះ លុះត្រាតែមានវិធានការទប់ស្កាត់ជាបន្ទាន់។ លោកបាននិយាយថា «យើងដឹងពីអ្វីដែលត្រូវធ្វើ ដើម្បីប្រយុទ្ធប្រឆាំងនឹងជំងឺនេះ ដូចជាការចាក់វ៉ាក់សាំង ការពាក់ម៉ាស់ រក្សាគម្លាតសង្គម និង ការប្រើប្រាស់ប័ណ្ណកូវីដដែលបញ្ជាក់ពីការចាក់វ៉ាក់សាំង និង លទ្ធផលតេស្តរកមេរោគកូវីដ១៩»។
នាយកប្រចាំតំបន់របស់អង្គការសុខភាពពិភពលោកនៅទ្វីបអឺរ៉ុប បានបញ្ជាក់ថា វិធានការចាក់វ៉ាក់សាំងជាកាតព្វកិច្ចគួរតែត្រូវបានគេមើលឃើញថា ជា មធ្យោបាយចុងក្រោយ ប៉ុន្តែត្រូវតែធ្វើឲ្យបានទាន់ពេលវេលា ហើយក៏ត្រូវមានការពិភាក្សាផ្នែកច្បាប់ និង សង្គម អំពីបញ្ហានេះផងដែរ ដ្បិតថាកន្លងមក ក៏មានមនុស្សមួយចំនួននៅមិនព្រមទទួលយកការចាក់វ៉ាក់សាំងនេះនៅឡើយទេ។
ជាក់ស្ដែង កាលពីថ្ងៃទី ១៩ វិច្ឆិកា ប្រទេសអូទ្រីសបានក្លាយជាប្រទេសអឺរ៉ុបដំបូងគេ ដែលប្រកាសថា ការចាក់វ៉ាក់សាំងកូវីដ-១៩ នឹងក្លាយជាកាតព្វកិច្ចដែលអនុលោមតាមច្បាប់ ហើយច្បាប់ថ្មីនេះត្រូវបានកំណត់ឱ្យចូលជាធរមាននៅក្នុងខែកុម្ភៈខាងមុខនេះ។ សេចក្តីប្រកាសនេះ រួមជាមួយនឹងការបិទខ្ទប់ប្រទេសជាលើកទី ៤ ដែលធ្វើឡើងក្នុងការឆ្លើយតបទៅនឹងការកើនឡើងជាថ្មី ខណៈអត្រាចាក់វ៉ាក់សាំងនៅប្រទេសអូទ្រីសគឺស្ថិតនៅកម្រិតទាបនៅឡើយ។ ក្រៅពីនេះ ក៏មានប្រទេសផ្សេងទៀតដូចជាសាធារណរដ្ឋឆេក និងស្លូវ៉ាគីក៏បានប្រកាសពីការរឹតបន្តឹងថ្មី លើអ្នកដែលមិនបានទទួលថ្នាំបង្ការផងដែរ។
យ៉ាងណាមិញ អធិការបតីអូទ្រីសលោក អេឡិចសេនឌ័រ ឆែលែនប៊ឺក (Alexander Schallenberg) បាននិយាយថា នេះជាការសម្រេចចិត្តដ៏លំបាកមួយក្នុងការទទួលយកនៅក្នុងសង្គមសេរីរបស់ប្រទេស។
អត្ថបទគួរអាន
ជុំវិញវិធានការរឹតបន្ដឹងដើម្បីទប់ស្កាត់កូវីដ១៩នេះ ក៏បានបង្កឱ្យមានកុបកម្មហិង្សាបានផ្ទុះឡើងនៅបណ្ដាប្រទេសអឺរ៉ុបមួយចំនួនផងដែរ ដូចជា ប្រទេសអូទ្រីស ក្រូអាត ហូឡង់ និង អ៊ីតាលី ដោយបាតុករប្រឆាំងយ៉ាងខ្លាំងចំពោះការប្រើបណ្ណបញ្ជាក់ពីការចាក់វ៉ាក់សាំងកូវីដ១៩ ដើម្បីចេញចូលកន្លែងមួយចំនួន ហើយក្រុមបាតុករទាំងនោះបានដុតឡាន គប់កាំជ្រួច លើកទង់ជាតិ និង បដាដែលសរសេរថា “សេរីភាព” ដើម្បីបង្ហាញទៅកាន់អាជ្ញាធរផងដែរ។
សូមបញ្ជាក់ថា នៅតំបន់អឺរ៉ុបទាំងមូល គិតមកទល់ពេលនេះ មានករណីឆ្លងកូវីដ ១៩ សរុបប្រមាណ ៧០លាននាក់ហើយ ក្នុងនោះករណីស្លាប់មានជាង ១ លាន ៦ សែននាក់។ នេះបើយោងតាមចេញផ្សាយដោយទីភ្នាក់ងារ រ៉យទ័រ។
អត្ថបទ៖ ស៊ើង និមល់
None
