ក្នុងបទសម្ភាសជាមួយសារព័ត៌មានខេមបូណូមីស លោក អឿន សុធារ័ត្ន ប្រធាននាយកប្រតិបត្តិក្រុមហ៊ុន ក្រេឌីត ប្យួរ៉ូ ខេមបូឌា (CBC) បានគូសបញ្ជាក់ថា នៅក្នុងអំឡុងពេលកម្ពុជា ក៏ដូចជាពិភពលោកទទួលរងនូវការឆ្លងរីករាលដាលនៃជំងឺកូវីដ-១៩ និងឥទ្ធិពលពីវិបត្តិសកលនានា ចំនួនអ្នកខូចប្រវត្តិឥណទាន ដែលគេនិយមហៅថា ខូច CBC មានការកើនឡើងគួរឱ្យកត់សម្គាល់។ ប៉ុន្តែក្រោយរាជរដ្ឋាភិបាលកម្ពុជា ប្រកាសបើកសកម្មភាពសង្គម និងសេដ្ឋកិច្ចឡើងវិញ ចំនួនអ្នកខូចប្រវត្តិឥណទាន ក៏មានការថយចុះមកវិញផងដែរ។
បើតាមតាមលោក អឿ សុធារ័ត្ន ខូចប្រវត្តិឥណទានសំដៅដល់អតិថិជន ដែលមានការបង់សងត្រឡប់យឺតលើសពី៩០ថ្ងៃ ឬត្រូវបានលុបចេញពីបញ្ជី។ យ៉ាងណាមិញថ្នាក់ដឹកនាំរូបនេះស្នើឱ្យពលរដ្ឋកុំចាត់ទុក CBC ជាបញ្ជីខ្មៅ ព្រោះ CBC ជាស្ថាប័នមួយ ដែលគ្រប់គ្រងប្រព័ន្ធទិន្នន័យប្រតិបត្តិការឥណទានរបស់បណ្តាធនាគារ និងគ្រឹះស្ថានហិរញ្ញវត្ថុនានានៅកម្ពុជា ទាំងភាពវិជ្ជមាន និងអវិជ្ជមាន។
ហេតុអ្វីពលរដ្ឋដែលជាអ្នកប្រើប្រាស់កម្ចីចាំបាច់តាមដានប្រតិបត្តិការឥណទានរបស់ខ្លួន តើវាផ្តល់អត្ថប្រយោជន៍អ្វីខ្លះ? ឆ្លើយតបនឹងសំណួរនេះ លោក អឿ សុធារ័ត្ន បានបកស្រាយថា ការតាមដានប្រតិបត្តិការ ឬប្រវត្តិឥណទាន អាចធ្វើឱ្យពលរដ្ឋដឹងពីសុខុមាលភាពហិរញ្ញវត្ថុ និងអាចកែតម្រូវលើបញ្ហាខ្វះខាតមួយចំនួន។
បើយោងតាមរបាយការណ៍របស់ ការិយាឥណទានកម្ពុជា (CBC) គិតត្រឹមដំណាច់ឆ្នាំ២០២៣ មានប្រជាជនកម្ពុជា ប្រមាណជិត៥លានគណនី កំពុងប្រើប្រាស់កម្ចីនៅតាមគ្រឹះស្ថានធនាគារ និងមីក្រូហិរញ្ញវត្ថុទូទាំងប្រទេស ដែលមានទំហំទឹកប្រាក់ជាង៥៧ពាន់លានដុល្លារ ឬជាង១៨០% នៃផលិតផលិតផលក្នុងស្រុកសរុប ដែលមានប្រជាជនប្រើប្រាស់ប្រមាណជាង ៣លាន ៨សែនគណនី។ជាមួយគ្នានេះ អត្រាឥណទានមិនដំណើរការក្នុងវិស័យនេះក៏មានការកើនឡើងផងដែរ កាលពីឆ្នាំ២០២៣ ដោយមានក្នុងអត្រា៥,៤%៕
