កាកសំណល់គ្រឿងអេឡិចត្រូនិកក្លាយជារបស់មានតម្លៃសម្រាប់ប្រទេសជប៉ុន

សារព័ត៌មាន Nikkei បានរាយការណ៍ថា ប្រទេសជប៉ុនមានធនធានធម្មជាតិតិចតួចប៉ុណ្ណោះ ប៉ុន្តែប្រជាជាតិនេះត្រូវបានអ្នកជំនាញការនៅក្នុងស្រុកចាត់ទុកថា ជាទីផ្សារដ៏មានសក្តានុពលបំផុតមួយក្នុងការជីកយកធនធានរ៉ែ តាមរយៈការប្រែក្លាយសំរាមនៃគ្រឿងអេឡិចត្រូនិក ដែលគេបោះបង់ចោលទៅជាប្រភពមាស ក៏ដូចជាលោហធាតុសំខាន់ៗផ្សេងទៀត ដែលចាំបាច់នៅក្នុងផលិតកម្មយានយន្តអគ្គិសនី។

ប្រភពដដែលបានឲ្យដឹងថា នៅពេលនេះរោងចក្រមួយនៅក្នុងទីក្រុងហ៊ីរ៉ាស៊ូកា (Hiratsuka) ជិតទីក្រុងយូកូហាម៉ា ( Yokohama) កំពុងតែប្រែក្លាយគំនរសំរាមបន្ទះសៀគ្វីទាញយករ៉ែមាស និងលោហធាតុមានតម្លៃសម្រាប់ឧស្សាហកម្មផ្សេងទៀតជាច្រើន។

លោក អាគីអូ ណាហ្គាអូកា (Akio Nagaoka)ដែលជាប្រធានប្រតិបត្តិការកែច្នៃនៅរោងចក្រនោះបានអះអាងថា មានសម្ភារក៏ដូចជាកំណប់រ៉ែមានតម្លៃប្រមាណជា៣ពាន់តោនត្រូវបាន ផលិត និងកែច្នៃឡើងវិញ ដើម្បីប្រើប្រាស់ចេញពីសំរាមអេតចាយអេឡិចត្រូនិកនៅក្នុងរយៈពេលមួយឆ្នាំៗ។

លោកបានអះអាងថា ក្រៅពីបង្កើនការរុករកកំណប់រ៉ែចេញពីសំរាមអេឡិចត្រូនិកនៅក្នុងប្រទេសជប៉ុន អ្នកជំនាញ ក៏កំពុងតែសិក្សាការពង្រីកផលិតកម្មទាញយកធនធានរ៉ែពីកាកសំណល់នៅតាមបណ្តាប្រទេសនៅអាស៊ានផងដែរ។

តាមឯកសារដែលបានផ្សព្វផ្សាយដោយក្រុមប្រឹក្សាមាសពិភពលោកបានឲ្យដឹងថា ការផ្គត់ផ្គង់មាសតាមរយៈការកែច្នៃ និងការទាញយកពីកាកសំណល់ គឺមានប្រមាណជា១ពាន់២រយទៅ ១ពាន់៣រយតោននៅក្នុងមួយឆ្នាំ ពោលគឺមានបរិមាណក្រោម៣០ភាគរយនៃមាស ដែលផ្គត់ផ្គង់ នៅលើពិភពលោក។

ដើម្បីជួយបង្កើនផលិតកម្មមាសពីកាកសំណល់ និងកាត់បន្ថយការពឹងផ្អែកលើធនធានរ៉ែមាសនៅក្នុងធម្មជាតិ ជប៉ុន ជាពិសេសគឺក្រុមហ៊ុន ​Mitsubishi Materials​ មានគោលបំណងពង្រឹងសមត្ថភាពដែលអាចកែច្នៃសំណល់អេតចាយឲ្យបានបរិមាណ២៤ម៉ឺនតោន ក្នុងមួយឆ្នាំនៅមុនឆ្នាំ២០៣០ ខណៈដែលបច្ចុប្បន្ននេះ ក្រុមហ៊ុនទើបមានសមត្ថភាពកែច្នៃកាកសំណល់បានត្រឹម១៦ម៉ឺនតោនប៉ុណ្ណោះ។

នៅពេលនេះ ជប៉ុនត្រូវបានគេប៉ាន់ប្រមាណថា មានធនធានកំណប់រ៉ែមាសសរុបនៅតាមទីក្រុងប្រមាណជា៥ពាន់៣រយតោន ពោលគឺស្មើនឹង១០ភាគរយនៃទុនបម្រុងសាកល ដោយគេដឹងថា នៅក្នុងកាកសំណល់អេឡិចត្រូនិក១តោន អាចទាញមាសបាន២៨០ក្រាម ក្រៅពីនោះនៅក្នុងទូរសព្ទដៃ១ម៉ឺនគ្រឿង ក៏អាចទាញយករ៉ែមាសបាន២៨០ក្រាមផងដែរ។ ក្រៅពីរ៉ែមាស កាកសំណល់ទាំងនេះនៅមានធនធានរ៉ែមានតម្លៃផ្សេងៗទៀតជាច្រើនមុខ ដែលសុទ្ធតែមានតម្លៃ៕

ដោយៈ សរ សុជាតិ