វិស័យពាណិជ្ជកម្ម

ហេតុអ្វី IMF ហ៊ានអះអាងថា សង្គ្រាមពន្ធគយនឹងមិនធ្វើឱ្យសេដ្ឋកិច្ចពិភពលោកធ្លាក់ចូលក្នុងវិបត្តិក្នុងរយៈពេលខ្លីខាងមុខ?


នាយកគ្រប់គ្រងស្ថាប័នមូលនិធិរូបិយវត្ថុអន្តរជាតិ (IMF) លោកស្រី គ្រីស្តាលីណា ចចជីវ៉ា (Kristalina Georgieva) បានទទួលស្គាល់កាលពីថ្ងៃទី៣១ ខែមីនា ថា សង្គ្រាមពន្ធគយដែលបញ្ឆេះឡើងដោយប្រធានាធិបតីអាម៉េរិក លោក ដូណាល់ ត្រាំ កំពុងធ្វើឱ្យពិភពលោកធ្លាក់ចូលក្នុងភាពមិនប្រាកដប្រជា ហើយទំនុកចិត្តនៅក្នុងទីផ្សារអន្តរជាតិ ធ្លាក់ចុះ។ ទោះជាយ៉ាងណា លោកស្រី បានអះអាងថា សង្គ្រាមពន្ធគយនេះនឹងមិនធ្វើឱ្យសេដ្ឋកិច្ចពិភពលោកធ្លាក់ចូលក្នុងវិបត្តិក្នុងរយៈពេលខ្លីខាងមុខនោះទេ។ នេះបើយោងតាមការចុះផ្សាយរបស់ទីភ្នាក់ងារព័ត៌មានធំៗជាច្រើន។
វិស័យពាណិជ្ជកម្ម
ដោយ

នៅក្នុងបទសម្ភាសលើកដំបូងរបស់ខ្លួនចាប់តាំងពីលោក ដូណាល់ ត្រាំ ចូលកាន់អំណាចជាផ្លូវការនៅថ្ងៃទី២០ ខែមករា ឆ្នាំ២០២៥ មក នាយកគ្រប់គ្រងស្ថាប័នមូលនិធិរូបិយវត្ថុអន្តរជាតិ លោកស្រី គ្រីស្តាលីណា ចចជីវ៉ា (Kristalina Georgieva) បានទទួលស្គាល់ថា បច្ចុប្បន្នសេដ្ឋកិច្ចពិភពលោកកំពុងជួបបញ្ហាប្រឈម និងសម្រេចបានកំណើនតិចតួចនៅឡើយ ក្រោយវិបត្តិកូវីដ-១៩ ប៉ុន្តែទន្ទឹមនេះ លោកស្រីបានផ្ដល់អនុសាសន៍ដល់ពិភពលោកទាំងមូលថា សូមកុំព្រួយបារម្ភខ្លាំងពេកចំពោះបញ្ហានេះ។

ពាក់ព័ន្ធនឹងស្ថានភាពសេដ្ឋកិច្ចពិភពលោក លោកស្រីអះអាងថា មូលនិធិរូបិយវត្ថុអន្តរជាតិ ទំនងជានឹងកាត់បន្ថយទស្សនវិស័យសេដ្ឋកិច្ចបន្តិចនៅក្នុងការធ្វើបច្ចុប្បន្នភាពលើទស្សនវិស័យសេដ្ឋកិច្ចពិភពលោក បន្ទាប់របស់ខ្លួននៅប្រមាណ៣សប្ដាហ៍ខាងមុខ។ ប៉ុន្តែលោកស្រីបានបញ្ជាក់ថា មូលនិធិ IMF មិនរំពឹងថា សេដ្ឋកិច្ចពិភពលោកនឹងធ្លាក់ចូលក្នុងវិបត្តិក្នុងពេលដ៏ខ្លីខាងមុខនេះនោះឡើយ។

លោកស្រីបានសង្កត់ធ្ងន់ថា ទិន្នន័យបង្ហាញថា ទំនុកចិត្តរបស់អតិថិជនជាអ្នកប្រើប្រាស់ និងវិនិយោគិនកំពុងចុះធ្លាក់ចុះ ដែលធ្វើឱ្យប៉ះពាល់ដល់កំណើន។ ទោះជាយ៉ាងណា មូលនិធិ IMF មិនទាន់ឃើញផលប៉ះពាល់ខ្លាំងជាដុំកំភួន ដែលបង្កឡើងដោយគោលនយោបាយពន្ធគយដ៏ចម្រូងចម្រាសរបស់លោក ដូណាល់ ត្រាំ នៅឡើយទេ។

គួររំឭកដែរថា កាលពីអំឡុងខែមករា មូលនិធិ IMF បានដំឡើងការព្យាកររបស់ខ្លួនសម្រាប់កំណើនសេដ្ឋកិច្ចពិភពលោកសម្រាប់ឆ្នាំ២០២៥ ពីរង្វង់៣,២% ឈានដល់៣,៣% ដោយសារតែទស្សនវិស័យសេដ្ឋកិច្ចរបស់សហរដ្ឋអាម៉េរិក បានកើនឡើងដល់រង្វង់២,៧%៕

ដោយ: តែម សុខុម




អត្ថបទបន្ទាប់


ធនាគារ ខេប៊ីប្រាសាក់ ផ្តល់ជូនអត្រាការប្រាក់បន្ថែមពិសេសសម្រាប់គណនីបញ្ញើមានកាលកំណត់ជាប្រាក់រៀល

ដើម្បីលើកកម្ពស់ការប្រើប្រាស់ប្រាក់រៀល និងដើម្បីអបអរបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ធនាគារ ខេប៊ីប្រាសាក់ មានសេចក្តីសោមនស្សរីករាយ…

មន្ត្រីអន្តោប្រវេសន៍អះអាងថា ចំនួនពលរដ្ឋខ្មែរចាកចេញពីថៃ មានការកើនឡើងនៅប៉ុន្មានថ្ងៃនេះ ក្រោយថៃ ជួបគ្រោះរញ្ជួយដី

ចំនួនពលករខ្មែរចាកចេញពីថៃ មកលេងស្រុកកំណើនមានការកើនឡើងគួរឱ្យកត់សម្គាល់ ក្រោយប្រទេសថៃ ជួបគ្រោះរញ្ជួយដីធ្ងន់ធ្ងរកាលពីថ្ងៃសុក្រ សប្តាហ៍មុន ដែល…

ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ