វៀតណាម ត្រូវបានគេព្យាករថា នឹងផ្តួលថៃ ក្លាយជាបងធំសេដ្ឋកិច្ចលំដាប់ទី២ នៅអាស៊ាននៅរង្វង់១០ឆ្នាំខាងមុខ

វៀតណាម ដែលអ្នកភូមិផងរបងជាមួយកម្ពុជា ត្រូវបានគេព្យាករថា នឹងអាចទម្លាក់ថៃ ក្លាយជាបងធំសេដ្ឋកិច្ចធំបំផុតលំដាប់ទី២ នៅអាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី និងជាប្រទេសមានសេដ្ឋកិច្ចធំជាងគេលំដាប់ទី២០ នៅលើពិភពលោកនៅក្នុងរង្វង់ឆ្នាំ២០៣៦។ បើយោងតាមរបាយការណ៍សម្ព័ន្ធសេដ្ឋកិច្ចពិភពលោក ដែលចេញផ្សាយដោយមជ្ឈមណ្ឌលស្រាវជ្រាវសេដ្ឋកិច្ច និងពាណិជ្ជកម្ម វៀតណាមត្រូវបានគេប៉ាន់ប្រមាណថា ជាប្រជាជាតិមួយ ដែលពលរដ្ឋម្នាក់មានអំណាចទិញលើសពីជាង១១ពាន់ដុល្លារក្នុងមួយឆ្នាំ។

ចាប់តាំងពីការធ្វើកំណែទម្រង់ប្រព័ន្ធសេដ្ឋកិច្ច ដែលវៀតណាមអនុវត្តនៅពាក់កណ្តាលទសវត្សរ៍ឆ្នាំ១៩៨០ មក កំណើនសេដ្ឋកិច្ចវៀតណាម បានកើនឡើងខ្ពស់ជាបន្តបន្ទាប់ សូម្បីតែក្នុងអំឡុងពេលរីករាលដាលនៃជំងឺកូវីដ-១៩ ហើយបានប្រែក្លាយវៀតណាម ពីប្រទេសក្រីក្រទៅជាប្រទេសមានសេដ្ឋកិច្ចមធ្យមមួយនៅក្នុងតំបន់។ ប្រសិនបើវៀតណាម អាចរក្សាបានកំណើនសេដ្ឋកិច្ចរឹងមាំនៅក្នុងរង្វង់ត្រឹម៦,៥% ដូចបច្ចុប្បន្ន វៀតណាមអាចនឹងសម្រេចគោលដៅក្លាយជាប្រទេសមានប្រាក់ចំណូលខ្ពស់នៅឆ្នាំ២០៤៥។

របាយការណ៍ខាងលើបានអះអាងថា វៀតណាម ដែលកាលពីឆ្នាំ២០២១ ឈរនៅលំដាប់លេខរៀងទី៤១ នៅលើពិភពលោក អាចក្លាយជាប្រទេសមានសេដ្ឋកិច្ចធំបំផុតលំដាប់ទី២០ នៅអំឡុងឆ្នាំ២០៣៦។

បើយោងតាមមូលនិធិរូបិយវត្ថុអន្តរជាតិ (IMF) នៅឆ្នាំ២០២៥ នេះសេដ្ឋកិច្ចវៀតណាម ឈរនៅលំដាប់ទី៣ នៅអាស៊ីអាគ្នេយ៍ជាមួយទំហំ GDP ប្រមាណ៥៧១ពាន់លានដុល្លារ ដោយតាមពីក្រោយប្រទេសឥណ្ឌូនេស៊ី ដែលមានទំហំ GDP ១,៦ទ្រីលានដុល្លារ  និងប្រទេសថៃ ដែលមានទំហំ៦៣២ពាន់លានដុល្លារ។

បើតាមការព្យាករនៅឆ្នាំ២០៣៦ សេដ្ឋកិច្ចវៀតណាមនឹងមានទំហំលើសប្រទេសប៉ូឡូញ ស្វីស ស៊ុយអែត បែលហ្សិក និងអូស្ត្រាលីទៅទៀត៕

ដោយៈ សរ សុជាតិ