ធនាគារពិភពលោកព្រមានថា ជាង១០០ប្រទេស ប្រឈមហានិភ័យជាប់ក្នុងអន្ទាក់ប្រាក់ចំណូលមធ្យម

ធនាគារពិភពលោកបានព្រមានថា មានប្រទេសរហូតដល់ទៅ១០៨ រួមទាំងមហាយក្សចិន ឥណ្ឌា ប្រេស៊ីល និងអាហ្វ្រិកខាងត្បូងផងដែរ​ កំពុងប្រឈមហានិភ័យជាប់ក្នុងអន្ទាក់ប្រាក់ចំណូលមធ្យម ប្រសិ​នបើប្រទេសទាំងនោះមិនកែប្រែយុទ្ធសាស្រ្តកំណើនឱ្យបានស៊ីជម្រៅ សម្រាប់ជំរុញសេដ្ឋកិច្ចរបស់ខ្លួនទេនោះ។

ធនាគារពិភពលោកដែលមានមូលដ្ឋាននៅក្រុងវ៉ាស៊ីនតោន សហរដ្ឋអាម៉េរិក បាននិយាយថា បណ្ដាសេដ្ឋកិច្ចដែលកំពុងរីកចម្រើនឆាប់រហ័សនឹងពិបាកតាមទាន់ស្តង់ដានៃការរស់នៅរបស់សហរដ្ឋអាម៉េរិក ខ្លាំងណាស់ ប្រសិនបើប្រទេសទាំងនោះមិនកាត់បន្ថយការពឹងផ្អែកលើការវិនិយោគ ដើម្បីជំរុញកំណើនទេនោះ។

នៅក្នុងរបាយការណ៍អភិវឌ្ឍន៍ពិភពលោករបស់ខ្លួន ធនាគារពិភពលោកបានគូសបញ្ជាក់ថា ជាបទពិសោធន៍ក្នុងរយៈពេល៥០ឆ្នាំមកនេះ ប្រទេសនានាហាក់ជាប់ក្នុងអន្ទាក់ប្រាក់ចំណូលមធ្យម (Middle-Income Trap) ខណៈដែលប្រាក់ចំណូលគិតជាមធ្យមក្នុងមនុស្សម្នាក់ក្នុងប្រទេសទាំងនោះ ឈានដល់ត្រឹមប្រមាណ១០% ប៉ុណ្ណោះ បើធៀបនឹងប្រាក់ចំណូលគិតជាមធ្យមក្នុងមនុស្សម្នាក់នៅសហរដ្ឋអាម៉េរិក​។

ចាប់តាំងពីឆ្នាំ១៩៩០ មក មានប្រទេសដែលមានចំណូលមធ្យមតែ៣៤ប៉ុណ្ណោះ ដែលអាចផ្លាស់ប្ដូរទៅជាប្រទេសមានប្រាក់ចំណូលខ្ពស់ ដោយជាង១ភាគ៣នៃប្រទេសទាំងនោះទទួលបានអត្ថប្រយោជន៍ពីការចូលរួមក្នុងសហភាពអឺរ៉ុប ឬការរកឃើញធនធានរ៉ែប្រេងថ្មីៗ។

លោក អ៊ីនដឺមីត ហ្គីល (Indermit Gill) ប្រធានសេដ្ឋវិទូនៃធនាគារពិភពលោក បានលើកឡើងពីនិន្នាការបច្ចុប្បន្នថា ដើម្បីឱ្យប្រាក់ចំណូលគិតជាមធ្យមក្នុងមនុស្សម្នាក់របស់ខ្លួនឈានដល់២៥%នៃប្រាក់ចំណូលគិតជាមធ្យមក្នុងមនុស្សម្នាក់នៅសហរដ្ឋអាម៉េរិក ប្រទេសចិន អាចនឹងត្រូវការពេល១០ឆ្នាំទៀត ខណៈឥណ្ឌាអាចត្រូវការពេលរហូតដល់៧៥ឆ្នាំឯណោះ៕

ដោយ: តែម សុខុម