ញូស៊ូ (Newzoo) ដែលគេដឹងថាជាក្រុមហ៊ុនគ្រប់គ្រងទិន្នន័យទីផ្សារហ្គេមនៅលើពិភពលោក បានបង្ហាញថា គិតត្រឹមខែធ្នូ ឆ្នាំ២០២២ កន្លងទៅ ឧស្សាហកម្មហ្គេមនៅលើសកលមានតម្លៃសរុបរហូតដល់ទៅ ១៨៤,៤ ពាន់លានដុល្លារ ហើយគេដឹងទៀតថា ពាក់កណ្តាលនៃអ្នកលេង គឺតាមទូរស័ព្ទដៃ ។
ពាក់ព័ន្ធនឹងស្ថិតិនេះ សារព័ត៌មានវៀតណាម ញូស៍ (Vietnam News) បានរាយការណ៍ថា នៅក្នុងតំបន់អាស៊ីអាគ្នេយ៍ វៀតណាមកាន់កាប់ចំណែកដ៏ធំមួយ ដោយមាន អ្នកលេងរហូតដល់ទៅ ៥៤,៦ លាននាក់ ជាមួយនឹងទឹកប្រាក់រហូតដល់ទៅ ៥០៧ លានដុល្លារ។
ប្រភពដដែលបានអះអាងថា តួលេខនេះត្រូវបានគេរំពឹងថានឹងកើនឡើងដល់ ១ ពាន់លានដុល្លារក្នុងរយៈពេល ៥ ឆ្នាំខាងមុខ សម្រាប់ឲ្យអ្នកបង្កើតហ្គេមប្រហែល ១៥០ ក្រុមហ៊ុន និងក្រុមហ៊ុនហ្គេមថ្មីៗប្រមាណជា ៤០០ ក្រុមហ៊ុនផ្សេងទៀត ចែកគ្នាចាយ ។
លោក ឡេ កាង ផឹកដឺ ( Lê Quang Tự Do ) នាយកអាជ្ញាធរផ្សព្វផ្សាយ និងព័ត៌មានអេឡិចត្រូនិកនៃក្រសួងព័ត៌មាន និងទំនាក់ទំនងវៀតណាម បាននិយាយថា ក្រុមហ៊ុនផលិតហ្គេមវៀតណាមកំពុងពង្រីកវិសាលភាពរបស់ពួកគេលើសពីទីផ្សារក្នុងស្រុក ហើយបានចាប់ផ្តើមបោះជំហានចូលទីផ្សារអន្តរជាតិ។
ប៉ុន្តែ ទោះបីជាមានកំណើនឆាប់រហ័សបែបនេះក្ដី ប្រទេសវៀតណាមនៅតែដើរក្រោយប្រទេសថៃថៃ ដែលរកចំណូលបានពីមុខរបរថ្មីនេះបានដល់ទៅជាង ៧៦០ លានដុល្លារ ពីអ្នកលេងចំនួនតែ៣៨,៣ លាននាក់។
អត្ថបទគួរអាន
លោក ផឹកដឺ បានកត់សម្គាល់ឃើញថា ភាពជោគជ័យរបស់ក្រុមហ៊ុនហ្គេមវៀតណាមកើតចេញពីកម្លាំងពលកម្មដែលពោរពេញដោយអ្នកសរសេរកម្មវិធីប្រកបដោយទេពកោសល្យ និងឧស្សាហ៍ព្យាយាម។ ពួកគេអាចបង្កើតហ្គេមមួយដោយមិនចាំបាច់មានជំនួយពីអ្នកដទៃ ហើយភាពបត់បែននោះអនុញ្ញាតឱ្យអ្នកផលិតហ្គេម អាចនឹងច្នៃប្រឌិត ក៏ដូចជាស្រាវជ្រាវ កាន់តែមានប្រសិទ្ធភាព។
លោកបានបញ្ជាក់ថា “ឧស្សាហកម្មហ្គេមជោគជ័យខ្លាំង នៅក្នុងប្រទេសវៀតណាម ហើយភាគច្រើននៃអ្នកបង្កើតហ្គេម គឺមានតែមនុស្សពី ២ ទៅ ៣ នាក់ ប៉ុណ្ណោះ” ។
លោក ថៃ ថាញ់ ឡេម (Thái Thanh Liêm) នាយកប្រតិបត្តិក្រុមហ៊ុន ថូបបក់ស៍ (Topebox) បានកត់សម្គាល់ថា ស្ទូឌីយ៉ូហ្គេមវៀតណាមភាគច្រើនកំពុងទាញយកសក្តានុពលដ៏សម្បូរបែបនៃការរចនាហ្គេមបែបសមញ្ញៗ ហើយរបៀបលេងរបស់វាក៏ងាយស្រួល ។
ដោយឡែក លោក ឃ្វៀន ង៉ុក បាវ (Nguyễn Ngọc Bảo) នាយកគ្រប់គ្រងក្រុមហ៊ុន វីធីស៊ី (VTC) បានអះអាង ថា ការកើនឡើងប្រជាប្រិយភាពនៃការលេងហ្គេមអនឡាញបានជំរុញឱ្យមានការលេចឡើងនៃកីឡាមួយថ្មីដែលគេហៅថា អ៊ីស្ព៉ត (eSport) ដែលកំពុងកើនឡើង ប្រមាណជា ៨,១ ភាគរយជារៀងរាល់ឆ្នាំ។
លោកបានបន្តថា នៅឆ្នាំ ២០២៥ខាងមុខ អ្នកនិយមលេង eSport ទូទាំងពិភពលោកអាចឈានដល់ ៦៤០ លាននាក់។ លោក បានបញ្ជាក់ថា ពួកគេគឺជាអណ្តូងរ៉ែមាសសម្រាប់អ្នកផលិតហ្គេម៕
អត្ថបទ ៖ សរ សុជាតិ
