កត្តាសំខាន់៣យ៉ាងដែលធ្វើឲ្យសិង្ហបុរីជាប្រទេសជោគជ័យផ្នែកសេដ្ឋកិច្ច
កាលទើបបានឯករាជ្យភ្លាមនៅឆ្នាំ១៩៦៥ ប្រទេសសិង្ហបុរីជាប្រទេសតូចនិងក្រីក្រ គ្មានធនធានធម្មជាតិ ប្រជាជនក៏តិច។ និយាយទៅ កាលន…
ខាងក្រោមនេះ ជាល្បិចបោកប្រាស់មួយចំនួន ដែលក្រុមជនខិលខូចយកមកប្រើ ក្នុងការឆបោកលុយកាក់ពីប្រជាពលរដ្ឋ ៖
១) ឆបោកឲ្យផ្ញើប្រាក់តាម Wing ដោយប្រាប់ថា សាច់ញាតិរបស់អ្នកជួបគ្រោះថ្នាក់ចរាចរណ៍
ល្បិចនេះ គឺជនខិលខូចហាក់ដូចជាស្គាល់ជនរងគ្រោះច្បាស់។ ឧ. ទូរស័ព្ទទៅម្ដាយ រួចធ្វើត្រហេបត្រហបប្រាប់ថា កូនប្រុសឈ្មោះនេះ... (ជាឈ្មោះកូនពិត) បានជួបគ្រោះថ្នាក់ចរាចរណ៍ ឥឡូវ ត្រូវការលុយជាបន្ទាន់ ១០០ដុល្លារ ដើម្បីដោះស្រាយបញ្ហាកុំឲ្យវែងឆ្ងាយ ហើយត្រូវការជាប្រញាប់ បើមិនអ៊ីចឹងទេ ករណីនេះនឹងកាន់តែវែងឆ្ងាយ ត្រូវអស់លុយកាន់តែច្រើន ។ល។ រួចហើយជនខិលខូចតឿនយ៉ាងរន្ថើន កំហិតឲ្យផ្ញើលុយទៅរូបគេជាបន្ទាន់។
២) ឆបោកតាមអ៊ីម៉េល ថាអ្នកឈ្នះរង្វាន់ប្រាក់លាន
មានជនបរទេសមិនស្គាល់មុខ អ៊ីម៉េលចូលមកអ៊ីម៉េលរបស់អ្នក ដោយប្រាប់ថា ឈ្មោះអ្នកត្រូវបានគេជ្រើសរើស ជាអ្នកឈ្នះរង្វាន់ពីធនាគារ បានប្រាក់ប៉ុណ្ណេះឬប៉ុណ្ណោះលានដុល្លារ ដូច្នេះគេឲ្យអ្នកផ្ញើអាសយដ្ឋាន លេខទូរស័ព្ទ លេខគណនីធនាគារ ដើម្បីគេរត់ការផ្ញើលុយឲ្យ។ ប៉ុន្តែ ក្នុងដំណើរការនេះ គេនឹងតម្រូវឲ្យអ្នកដាក់លុយខ្លះក្នុងគណនីរបស់អ្នក ដើម្បីយកទៅរត់ការថ្លៃមេធាវី ឬថ្លៃអ្វីមួយមុននឹងគេអាចផ្ញើលុយឈ្នះរង្វាន់មកឲ្យអ្នក។ បើអ្នកដាក់ប្រាក់ចូល គឺប្រាកដជាចាញ់បោកគេ អស់លុយនោះជាមិនខាន។ ដូច្នេះ ចូរកុំតបត ចំពោះអ៊ីម៉េលបែបនេះពីអ្នកដែលមិនស្គាល់អី !
៣) ឆបោកតាមអ៊ីម៉េល ក្រោមរូបភាពបន្លំជាមិត្តភក្ដិរបស់អ្នកជួបអាសន្ននៅក្រៅប្រទេស
ល្បិចបោកមួយទៀតនេះ គឺអ្នកអាចនឹងបានទទួលអ៊ីម៉េលពីមិត្តសម្លាញ់របស់អ្នក ឬមនុស្សដែលអ្នកស្គាល់ ថា រូបគាត់កំពុងបំពេញបេសកកម្ម ឬធ្វើដំណើរនៅក្រៅប្រទេស រួចហើយបាត់លិខិតឆ្លងដែន បាត់កាបូបលុយ ឬកំពុងមានអាសន្ននៅស្រុកគេ គ្មានលុយគ្មានកាក់ ។ល។ និង ។ល។ ដូច្នេះ គាត់ត្រូវការលុយជាបន្ទាន់ សូមឲ្យអ្នកផ្ញើលុយទៅគាត់ តាមលេខគណនីធនាគាររបស់គាត់។ ប៉ុន្តែ តាមពិតទៅ អ៊ីម៉េលរបស់គាត់ត្រូវគេលួចប្រើ ហើយសាមីខ្លួនមិនបានដឹងនោះទេ។ ចូរកុំរវល់ជាមួយអ៊ីម៉េលនេះ ឬទំនាក់ទំនងទៅសាមីខ្លួន ដើម្បីកុំឲ្យចាញ់បោកល្បិចបែបនេះ។
៤) ល្បិចជួយរកការងារធ្វើ ហើយទារលុយមុនខ្លះ ដើម្បីយកទៅឲ្យគេអ្នកនាំចូលធ្វើការ
នេះជាល្បិចក្នុងស្រុក។ អ្នកកំពុងស្វែងរកការងារធ្វើនៅភ្នំពេញ ហើយអ្នកអាចនឹងជួបមនុស្សដែលស្គាល់អ្នក ឬស្គាល់មិត្តភក្ដិអ្នក មកប្រាប់ថា គេនឹងជួយស្វែងរកការងារឲ្យអ្នកធ្វើ ហើយឲ្យអ្នករៀបចំឯកសារប្រវត្តិរូប និងពាក្យសុំការងារ។ ក្រោយមក គេនឹងមកប្រាប់អ្នកថា មានការងារមួយដែលសក្ដិសមនឹងអ្នក ហើយបានប្រាក់ខែប៉ុណ្ណេះឬប៉ុណ្ណោះ ប៉ុន្តែ ឲ្យអ្នករកប្រាក់ខ្លះយកទៅបង់ឲ្យគេមុន ព្រោះគេជាអ្នកនាំចូល ហើយគេធានាថា អ្នកប្រាកដជាបានការងារនោះធ្វើ។ បើជួបស្ថានភាពបែបនេះ កុំចាញ់បោកគេឲ្យសោះ ព្រោះវាជាល្បិចបោកប្រាស់។
៥) ល្បិចជួយរត់ការឲ្យអ្នកបានទៅធ្វើការស្របច្បាប់នៅក្រៅប្រទេស
តាមពិតទៅ ការចេញទៅធ្វើការនៅក្រៅប្រទេសស្របច្បាប់ គឺធ្វើតាមរយៈទីភ្នាក់ងារជ្រើសរើសពលករដែលទទួលស្គាល់ដោយក្រសួងរដ្ឋ ឬតាមរយៈក្រសួងរដ្ឋតែម្ដង។ ប៉ុន្តែ ជារឿយៗ មានជនខិលខូចមួយចំនួនឆ្លៀតឱកាសបន្លំខ្លួនជាបុគ្គលិក ឬ ជាភ្នាក់ងារជ្រើសរើសពលករ ដោយធានាជួយរត់ការឲ្យអ្នកបានទៅធ្វើការដោយស្របច្បាប់ ប៉ុន្តែ តម្រូវឲ្យអ្នកបង់ប្រាក់ជាមុនចំនួនប៉ុណ្ណេះប៉ុណ្ណោះ ដើម្បីយកទៅរត់ការ។ រូបភាពនេះ ភាគច្រើនអាចជាការបោកប្រាស់ ដូច្នេះ ចូរអ្នកប្រយ័ត្នប្រយែង នឹងសួររកឈ្មោះក្រុមហ៊ុន ឬ ស្ថាប័នដែលបុគ្គលនោះតំណាងឲ្យ និងសួរបញ្ជាក់ទៅក្រសួងមានសមត្ថកិច្ច ឬអង្គការសង្គមស៊ីវិលជាមុន ទើបមិនចាញ់បោកគេ។
៦) បោកប្រាស់ជាបណ្ដាញ ឬ ជាលក្ខណៈប្រព័ន្ធ ក្រោមរូបភាពវិនិយោគ ឬទិញភាគហ៊ុន
ប៉ុន្មានឆ្នាំចុងក្រោយនេះ មានការកក្រើកឡើង នូវការបោកប្រាស់ជាបណ្ដាញ ឬជាលក្ខណៈប្រព័ន្ធ ក្រោមរូបភាពវិនិយោគ ដោយបានប្រាក់ចំណេញប្រចាំខែ ឬ ការប្រាក់ខ្ពស់ដល់ ១០ ភាគរយ។ ឧទាហរណ៍ គេអូសទាញឲ្យអ្នកទិញហ៊ុន ឬ ដាក់វិនិយោគជាមួយក្រុមហ៊ុនដែលមានឈ្មោះត្រឹមត្រូវ នៅក្រៅប្រទេស ១ម៉ឺនដុល្លារ ហើយអ្នកបានចំណេញមកវិញ នូវការប្រាក់មួយខែ ចំនួន១ពាន់ដុល្លារ (ស្មើនឹង១០ភាគរយ) ប៉ុន្តែ ពួកគេបើកឲ្យអ្នកតែពីរបីខែ បន្ទាប់មកក៏លែងបើកឲ្យ បាត់ទាំងការ បាត់ទាំងប្រាក់ដើម។ កន្លងមក មានសារព័ត៌មានចុះផ្សាយច្រើនហើយ ដោយមានប្រជាជនចាញ់បោកគេរាប់រយនាក់ខាតបង់ប្រាក់រាប់សិបលានដុល្លារអាមេរិក។
ខាងលើនេះ គ្រាន់តែជាល្បិចមួយចំនួនដែលយើងបានដឹង ប៉ុន្តែ អាចនៅមានល្បិចជាច្រើនទៀត ដូចជាល្បិចបោកយកម៉ូតូ បោកយកខ្លួនប្រាណស្រី្តទៅរំលោភ បោកយកលុយពីហោប៉ៅ និងល្បិចដែលយើងមិនបានដឹងខ្លះទៀត ដែលយើងទាំងអស់គ្នា គប្បីមានការប្រុងប្រយ័ត្ន កុំឲ្យចាញ់បោកល្បិចកល នៃជនខិលខូចទាំងនេះ៕
