តើការរឹតបន្ដឹងការនាំចូលទំនិញរបស់វៀតណាមនេះ វាមានជះឥទ្ធិពលកម្រិតណាដល់ការដឹកជញ្ជូនទំនិញរបស់កម្ពុជា?
លោក ជា ចាន់ដារ៉ា ប្រធានសមាគមដឹកជញ្ជូនទំនិញ បានបញ្ជាក់ប្រាប់សារព័ត៌មានឌីជីថលខេមបូណូមីសថា ការផ្ទុះខ្លាំងនូវជំងីកូវីដ-១៩ ក្នុងប្រទេសវៀតណាម បានធ្វើឱ្យប្រទេសនេះបង្កើនការរឹតត្បិតលើការចរាចរណ៍ទំនិញចូលប្រទេសរបស់ខ្លួន ពិសេសទំនិញពីប្រទេសចិនតែម្ដង ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ បើតាមលោក ជា ចាន់ដារ៉ា បច្ចុប្បន្ន ប្រទេសវៀតណាម បានបង្កើនការរឹតបន្តឹងលើទំនិញចិន ចូលក្នុងប្រទេសរបស់ខ្លួនរហូតជាង៩០%ឯណោះ ដូច្នេះ ទើបធ្វើឱ្យរាល់ទំនិញរបស់ចិនចូលមកកម្ពុជា ដែលត្រូវឆ្លងកាត់ប្រទេសវៀតណាម ក៏មានភាពយឺតយ៉ាវខ្លះដែរ តែមិនបានបង្ករជាបញ្ហាធ្ងន់ធ្ងរដល់វិស័យដឹកជញ្ជូន និងការផ្គត់ផ្គង់ទំនិញនៅកម្ពុជា នោះទេ គ្រាន់តែចរាចរណ៍ទំនិញពីវៀតណាមមកកម្ពុជាមានភាពយឺតយ៉ាវបន្ដិចបន្តិចតែប៉ុណ្ណោះ។
ចំពោះការដឹកជញ្ជូនទំនិញ រវាងកម្ពុជា-វៀតណាម ត្រូវបានប្រធានសមាគមដឹកជញ្ជូនទំនិញ លោក ចាន់ដារ៉ា គូសបញ្ជាក់ដូច្នេះ តាមពិតប្រទេសវៀតណាម បានរឹតបន្តឹងយូរមកហើយលើការដឹកជញ្ជូនទំនិញ ចាប់ពីមានការផ្ទុះនូវមេរោគកូវីដ-១៩ ម្លេះ ក៏ប៉ុន្តែ ក្រោយវត្តមានបំប្លែងថ្មី អូមីក្រុង វៀតណាម ក៏កាន់តែបង្កើនការត្រួតពិនិត្យទំនិញបន្ថែមទៀត។អត្ថបទគួរអាន
ដោយឡែក លោក សែ ឈុនទ្រី ប្រធានច្រកព្រំដែនអន្តរជាតិជ្រៃធំ ដែលជាច្រកព្រំដែនរវាងកម្ពុជា-វៀតណាម ស្ថិតក្នុងខេត្តកណ្ដាល ឯណោះវិញ ក៏បានគូសបញ្ជាក់ដែរថា ការដឹកជញ្ជូនទំនិញរវាងកម្ពុជា និងវៀតណាម នៅតែដំណើរការធម្មតា គ្រាន់តែវៀតណាម បង្កើនការត្រួតពិនិត្យទំនិញ ព្រោះតែខ្លាចឆ្លងរាលដាលនៃជំងឺកូវីដ-១៩ ពិសេសវត្តមានវីរុសបំប្លែងថ្មី អូមីក្រុង តែម្ដង។ ក៏ប៉ុន្តែ លោក សែ ឈុនទ្រី បានសង្កត់ធ្ងន់ថា នេះវាមិនមែនជាបញ្ហាធ្ងន់ធ្ងរ ហើយក៏មិនមានអ្វីគួរឱ្យព្រួយបារម្ភនោះដែរ។
សូមបញ្ជាក់ថា ប្រទេសវៀតណាម គឺជាទីផ្សារធំមួយសម្រាប់ការនាំចេញរបស់កម្ពុជា ពិសេសបើទោះបីជាមានការផ្ទុះនូវជំងឺកូវីដ-១៩រាតត្បាតក៏ដោយ ការនាំចេញផលិតផលកសិកម្មពីកម្ពុជាទៅវៀតណាមនៅតែឡើងកាន់តែខ្លាំង។ តាមរបាយការណ៍ក្រសួងកសិកម្ម រុក្ខាប្រមាញ់និងនេសាទ នៅរយៈពេល ១១ខែ ឆ្នាំ២០២១ កម្ពុជា បាននាំចេញផលិតផលកសិកម្ម សរុបជាង៧លានតោន ទៅកាន់ទីផ្សារអន្តរជាតិ ដែលគិតជាទឹកប្រាក់ជាង ៤លានដុល្លារអាមេរិក ដោយភាគច្រើនបាននាំចេញទៅកាន់ប្រទេសវៀតណាម៕None
