ដើម្បីបង្ការ និងបង្ក្រាបលើបញ្ហានេះ រាជរដ្ឋាភិបាលកម្ពុជាកាលពីពេលថ្មីៗ បានបង្កើតគណៈកម្មការអន្តរក្រសួង ដែលមានសមាជិក២៩នាក់ ដើម្បីធានាអធិបតេយ្យភាព ប្រសិទ្ធភាព សុវត្ថិភាព និងគុណភាពនៃការផ្តល់សេវាទូរគមនាគមន៍។ មន្ត្រីក្រសួងប្រៃសណីយ៍អះអាងថា កន្លងមកក្រសួងបានដាក់ចេញវិធានការ និងបង្ក្រាបលើករណីនេះជាច្រើនលើករួចមកហើយ តែសកម្មភាពនេះនៅតែបន្តកើតមានឡើង ហើយតាមរយៈគណៈកម្មការអន្តរក្រសួងនេះ ក្រសួងប្រៃសណីយ៍រំពឹងថា វានឹងជួយឲ្យការអនុវត្តច្បាប់កាន់តែមានប្រសិទ្ធភាពក្នុងការបង្ក្រាបលើករណីនេះ។
ឯកឧត្តម លីវ សុផាណារិទ្ធិ អនុរដ្ឋលេខាធិការ និងជាអ្នកនាំពាក្យក្រសួងប្រៃសណីយ៍ និងទូរគមនាគមន៍បានបញ្ជាក់ប្រាប់ខេមបូណូមីសថា សកម្មភាពតភ្ជាប់ហេដ្ឋារចនាសម្ព័ន្ធ និងការប្រើប្រាស់សេវាទូរគមនាគមន៍ឆ្លងដែនខុសច្បាប់នៅតែបន្តកើតមានឡើងនៅកម្ពុជា។ ឯកឧត្តម អះអាងថា បច្ចុប្បន្នមានក្រុមហ៊ុនមួយចំនួនដែលគ្មានលិខិតអនុញ្ញាតត្រឹមត្រូវ បាន និងកំពុងបន្តចែកចាយសេវាទូរគមនាគមន៍ឆ្លងដែនខុសច្បាប់ ជាពិសេសនៅតំបន់តាមព្រំដែនកម្ពុជានិងប្រទេសជិតខាង។ ឯកឧត្តមបន្តថា ជុំវិញបញ្ហាឈ្មួញទិញសេវាទូរគមនាគមន៍ពីប្រទេសជិតខាង មកផ្គត់ផ្គង់ក្នុងស្រុកដោយគ្មានការអនុញ្ញាតនេះ ក្រសួងធ្លាប់បានចាត់វិធានការ និងបង្ក្រាបជាច្រើនលើករួចមកហើយ។ ប៉ុន្តែសកម្មភាពនេះនៅតែបន្តកកើតមានឡើងដដែល។អត្ថបទគួរអាន
ឆ្លើយតបទៅនឹងបញ្ហានេះ រាជរដ្ឋាភិបាលកម្ពុជាកាលពីថ្ងៃទី២ ខែធ្នូ ឆ្នាំ២០២១ បានសម្រេចបង្កើតគណៈ កម្មការអន្តរក្រសួងមួយដែលមានឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ជាប្រធាន ដើម្បីបង្ការ និងបង្ក្រាបការតភ្ជាប់ហេដ្ឋារចនាសម្ព័ន្ធ និងការប្រើប្រាស់សេវាទូរគមនាគមន៍ឆ្លងដែនខុសច្បាប់។ ឯកឧត្តម លីវ សុផាណារិទ្ធិ ជឿជាក់ថា តាមរយៈគណៈកម្មការនេះ វានឹងជួយពង្រឹងប្រសិទ្ធភាពក្នុងការអនុវត្តច្បាប់ឲ្យកាន់តែល្អប្រសើរ និងជួយរៀបចំសន្តិសុខ សណ្តាប់ធ្នាប់ក្នុងការតភ្ជាប់ហេដ្ឋារចនាសម្ព័ន្ធ និងការប្រើប្រាស់សេវាទូរគមនាគមន៍នៅតាមតំបន់ព្រំដែនឲ្យកាន់តែមានរបៀបរៀបរយ។ ហើយវាក៏ជាផ្នែកមួយក្នុងការជួយបង្កើនប្រាក់ចំណូលរបស់រដ្ឋ តាមរយៈបង្វែឲ្យប្រជាពលរដ្ឋងាកមកប្រើប្រាស់សេវាទូរគមនាគមន៍ស្របច្បាប់ក្នុងស្រុក។
គណៈកម្មការអន្តរក្រសួងដែលមានសមាភាពប្រធាន អនុប្រធាន និងសមាជិកសរុបចំនួន២៩នាក់ខាងលើមានភារកិច្ច និងតួនាទី បង្ការ បង្ក្រាប និងត្រួតពិនិត្យលើការតភ្ជាប់ហេដ្ឋារចនាសម្ព័ន្ធ និងការប្រើប្រាស់សេវាទូរគមនាគមន៍ ឆ្លងដែន ដើម្បីធានាអធិបតយ្យភាព ប្រសិទ្ធភាព សុវត្ថិភាព និងគុណភាពនៃការផ្តល់សេវាទូរគមនាគមន៍នៅកម្ពុជា ក៏ដូចជារៀបចំផែនការកែសម្រួលរាល់ការតភ្ជាប់ហេដ្ឋារចនាសម្ព័ន្ធទូរគមនាគមន៍អន្តរជាតិនៅតាមបណ្ដោយព្រំដែនកម្ពុជា ដោយត្រូវបង្វែរឱ្យមកឆ្លងកាត់ច្រកទ្វារអ៊ីនធឺណិតជាតិ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
