អគារកម្ពស់ ៣៣ជាន់នេះ ជាការវិនិយោគរួមគ្នារវាងវិនិយោគិនតៃវ៉ាន់ និងវិនិយោគិនក្នុងស្រុក ដោយចំណាយទឹកប្រាក់វិនិយោគសរុបប្រមាណ២៥០លានដុល្លារអាមេរិក។
គម្រោងអគារលំនៅដ្ឋានបែបពាណិជ្ជកម្មអន្តរជាតិ CEO KT Pacific ត្រូវបានក្រុមហ៊ុនអភិវឌ្ឍអគារមួយនេះ អះអាងថា ជាគម្រោងអគារស្នាក់នៅ និងធ្វើពាណិជ្ជកម្មចម្រុះដំបូងគេបង្អស់មួយ នៅកម្ពុជា ដែលមានផ្ដល់នូវជម្រើសសេវាកម្មសម្បូរបែបសម្រាប់អ្នកស្នាក់នៅ និងការធ្វើពាណិជ្ជកម្មជាច្រើន។
គម្រោង CEO KT Pacific នេះ ត្រូវបានគេដឹងថា មានការសហការវិនិយោគរួមគ្នារវាងក្រុមហ៊ុនតៃវ៉ាន់ Lixin Group និងក្រុមហ៊ុនក្នុងស្រុក KT Pacific Group របស់លោកឧកញ៉ា ស៊ឺ គង់ទ្រីវ ដែលជាអ្នកជំនួញចាស់វស្សា និងមានឥទ្ធិពលមួយរូបនៅកម្ពុជា។
តើអ្នកបានអានអត្ថបទនេះ ឬនៅ?
គម្រោងអគារ CEO KT Pacific នេះ មានកម្ពស់៣៣ជាន់ និងមានផ្ទៃក្រឡាកម្រាលសរុបជាង ៩ម៉ឺនម៉ែត្រការ៉េ ដោយមានចែកជា ៩៧២យូនីត ដែលក្នុងនោះមានការិយាល័យចំនួន១០៦យូនីត និងមានទីតាំងស្ថិតនៅចំកណ្ដាលខណ្ឌ៧មករា ម្ដុំក្រោយអគារវីត្រាស់ បាក់ទូក។
បើតាមការអះអាងពីប្រធានក្រុមហ៊ុន Lixin Group លោក ស៊ី មីងចោវ គម្រោងមួយនេះអាចនិយាយបានថា គឺជាគម្រោងអគារលំនៅដ្ឋានបែបពាណិជ្ជកម្មអន្តរជាតិដំបូងគេបង្អស់មួយនៅកម្ពុជា ដែលសម្រាប់ការស្នាក់នៅផង និងការធ្វើពាណិជ្ជកម្មផង ដោយក្នុងនោះក្រៅពីលំនៅដ្ឋានដ៏ស៊ីវិល័យ អគារដែលមានរាងភ្លោះមួយនេះ ក៏មានរួមបញ្ជូលនូវការសាងសង់សាលមហោស្រព បន្ទប់ប្រជុំខ្នាតធំ ភោជនីយដ្ឋាន អាងហែលទឹក ស្កាយបារ ក្លឹបហាត់ប្រាណ ការិយាល័យ សណ្ឋាគារលំដាប់ផ្កាយ៥ និងកន្លែងផ្សេងៗជាច្រើនទៀត។
លោក Kevin Wang នាយកគ្រប់គ្រងទូទៅ ក្រុមហ៊ុន Lixin Group បានលើកឡើងថា នៅឆ្នាំ២០១៧នេះ គឺជាឆ្នាំមួយដែលមានការប្រកួតប្រជែងខ្លាំងសម្រាប់វិស័យធុរកិច្ចសកល ក្នុងនោះកម្ពុជាក៏ហាក់មានការប្រកួតប្រជែងខ្លាំងផងដែរ។
អគារកម្ពស់៣៣ជាន់ តម្លៃ២៥០លានដុល្លារថ្មីមួយ នឹងផុសឡើងនៅឆ្នាំ២០២០។
(រូបភាព៖ ហេង ភារម្យ)
តើអ្នកបានអានអត្ថបទនេះ ឬនៅ?
ទោះបីជាទីផ្សារអចលនទ្រព្យនៅកម្ពុជាកំពុងមានការប្រកួតប្រជែងខ្លាំងយ៉ាងណាក៏ដោយ ប៉ុន្ដែ លោក Kevin Wang មើលឃើញថា បើធៀបនឹងប្រទេសក្នុងតំបន់ ដូចជា ថៃ វៀតណាម ឡាវ និងម៉ាឡេស៊ី ប្រទេសកម្ពុជាពិតជាមានសក្ដានុពលខ្ពស់សម្រាប់ការវិនិយោគ ពិសេស វិស័យអចលនទ្រព្យតែម្ដង ខណៈដែលរាជរដ្ឋាភិបាលកម្ពុជាមានគោលនយោបាយល្អក្នុងការអនុគ្រោះដល់វិនិយោគិនបរទេស ដូចជា អនុញ្ញាតឲ្យវិនិយោគបរទេសអាចកាន់កាប់ភាគហ៊ុន១០០% និងភាពងាយស្រួលក្នុងការប្រើប្រាស់រូបិយវត្ថុដុល្លារសម្រាប់ការវិនិយោគជាដើម។
ទន្ទឹមនឹងនេះ ការដើរស្របទៅតាមគោលនយោបាយខ្សែក្រវាត់មួយផ្លូវមួយរបស់ប្រទេសចិន ក៏ជាឱកាសដ៏វិសេសវិសាលមួយសម្រាប់ក្រុមហ៊ុនមកពីក្រៅប្រទេស គួរសម្លឹងមើលសក្ដានុពល និងឱកាសវិនិយោគនៅកម្ពុជាផងដែរ។
សូមបញ្ជាក់ដែរថា ក្រៅពីគម្រោងអគារដែលមានតម្លៃប្រមាណ២៥០លានដុល្លារមួយនេះ ក្រុមហ៊ុន Lixin Group របស់តៃវ៉ាន់មួយនេះ ក៏បានវិនិយោគលើគម្រោងអភិវឌ្ឍន៍ចម្រុះផ្សេងទៀត ដូចជា សណ្ឋាគារ និងកាស៊ីណូ ភោជនីយដ្ឋាន និងវិស័យបច្ចេកវិទ្យាជាដើម៕
None
