ថៃ ព្រមានប្រើកងកម្លាំង បើពលរដ្ឋខ្មែរមិនរុះរើចេញលំនៅឋានចេញពីភូមិជោគជ័យក្នុងរយៈពេល២ខែខាងមុខ
អាជ្ញាធរថៃ បានដាក់ឱសានវាទដោយឥតអៀនខ្មាសដោយទុកពេលឱ្យពលរដ្ឋខ្មែរចំនួនពីរខែតែប៉ុណ្ណោះដើម្បីធ្វើការរុះរើផ្ទះសម្បែង និងទ្រព្យសម្បត្តិចេញពីទឹកដីក្…
អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឬទ្ធី គ្រុប ដែលជាក្រុមហ៊ុនដាំដុះ និងនាំចេញដូងប្រេងតែមួយគត់នៅកម្ពុជា បានសម្រេចកាប់ដើមដូងប្រេងចោល និងដាំដុះដូងប្រេងថ្មីឡើងវិញលើផ្ទៃដីប្រមាណ៥០០ហិកតា នៅក្នុងស្រុកព្រៃនប់ ខេត្តព្រះសីហនុ ដោយសារដើមដូងប្រេងចាស់មានអាយុកាលចាប់ពី២៥ឆ្នាំទៅហើយ និងចាប់ផ្ដើមថយចុះទិន្នផល ដែលតម្រូវឱ្យមានការដាំថ្មីជំនួសវិញ។ បើតាមជំនាញកសិកម្ម ដ៏ល្បីឈ្មោះរូបនេះ ជាទូទៅការដាំដូងប្រេងទម្រាំអាចផ្តល់ផលបានត្រូវចំណាយពេលប្រមាណ៣៦ខែ។ ដោយឡែកដើមដូងប្រេងដែលត្រូវបានកាប់ចោល នឹងត្រូវកាត់ចិញ្ច្រាំធ្វើជាជីកំប៉ុស។ នេះបើតាមការអះអាងរបស់អ្នកឧកញ៉ា ម៉ុង ឬទ្ធី។
បើតាមការអះអាងរបស់អ្នកឧកញ៉ា ម៉ុង ឫទ្ធី ទោះបីជាក្រុមហ៊ុនបានកាប់ដើមដូងប្រេងទាំងនោះចោលក៏ពិតមែន ប៉ុន្តែវាពុំបានធ្វើឱ្យប៉ះពាល់ដល់ការផលិត និងនាំចេញដូងប្រេងរបស់ក្រុមហ៊ុននោះទេ ដ្បិតថា ដើមដូងប្រេងដែលបានកាប់ចោលទាំងនោះមានត្រឹម៥០០ហិកតាប៉ុណ្ណោះ ខណៈបច្ចុប្បន្នផ្ទៃដីដាំដុះដូងប្រេងសរុបមានរហូតទៅជិត២ម៉ឺនហិកតា។ ពាក់ព័ន្ធបញ្ហាដូងប្រេងនាពេលបច្ចុប្បន្ន អ្នកឧកញ៉ា ម៉ុង ឫទ្ធី បានឱ្យដឹងថា តាំងពីក្រោយវិបត្តិកូវីដ-១៩ រហូតមកដល់បច្ចុប្បន្ននេះ តម្លៃដូងប្រេងមិនមានការប្រែប្រួលគួរឱ្យកត់សម្គាល់នោះទេ ពោលគឺស្ថិតក្នុងរង្វង់១ពាន់ដុល្លារក្នុង១តោន ខណៈដំណាំដូងប្រេង១ហិកតាអាចផ្តល់ទិន្នផលបានប្រមាណជិត២០តោន។
គួរជម្រាបថា ការវិនិយោគលើដំណាំដូងប្រេង មិនមែនជាការងាយស្រួលនោះទេ ទើបនៅក្នុងប្រទេសកម្ពុជា មិនសូវមានអ្នកវិនិយោគចាប់អារម្មណ៍លើដំណាំប្រភេទនេះ ដ្បិតវា ទាមទារឱ្យអ្នកវិនិយោគផ្ដោតសំខាន់ទៅលើកត្តាមួយចំនួនដូចជាដី ទឹកភ្លៀង បច្ចេកទេស និងហិរញ្ញវត្ថុជាដើម៕
