ការឈានដល់ការសម្រេចជ្រើសរើយកផលិតផលកសិកម្មរបស់កម្ពុជាទាំង ៦មុខនេះ ជាទំនិញអាទិភាពដើម្បីនាំចេញទៅចិននេះ គឺត្រូវបានធ្វើឡើងបន្តាប់ពីមានការចុះហត្ថលេខារវាងក្រសួងកសិកម្មកម្ពុជា និងអគ្គរដ្ឋបាលគយចិន កាលពីថ្ងៃទី ១៣ មិថុនា ឆ្នាំ២០១៩ ស្ដីអំពីការជំរុញដំណើរការភូតគាមអនាម័យ សម្រាប់នាំចេញផ្លែស្វាយកម្ពុជាទៅកាន់ទីផ្សារប្រទេសចិន និងសេចក្ដីថ្លែងការណ៍រួមចុះថ្ងៃទី ១៧ ខែមិថុនា ឆ្នាំ២០១៩ រវាងក្រសួងកសិកម្មកម្ពុជា និងអគ្គរដ្ឋបាលគយចិន និងអង្គការអភិវឌ្ឍន៍ឧស្សាហកម្មនៃសហប្រជាជាតិ។
អត្ថបទទាក់ទង!
តាមរយៈសេចក្ដីជូនដំណឹងនេះ ក្រសួងកសិកម្មបានបញ្ជាក់ប្រាប់ដល់ម្ចាស់រោងចក្រកែច្នៃវេចខ្ចប់ផលិតផលកសិកម្ម និងម្ចាស់កសិដ្ឋានថា ដ្បិតែផលិតផលកសិកម្ម ៦មុខ របស់កម្ពុជា រួមមាន ផ្លែស្វាយស្រស់ ផ្លែមៀនប៉ៃលិន ម្រេច ផ្លែស្រការនាគ ផ្លែដូងក្រអូប និង ទឹកមាត់ត្រចៀកកាំ ត្រូវបានបើកផ្លូវសម្រាប់ឈានទៅធ្វើការនាំចេញទៅទីផ្សារចិនក៏ពិតមែន ប៉ុន្ដែ មុននឹងអាចនាំចេញបាន ប្រទេសចិននឹងតម្រូវឲ្យកម្ពុជាបំពេញតាមលក្ខខណ្ឌតម្រូវអនាម័យ និងភូតគាមអនាម័យ ព្រមទាំងបទដ្ឋានសុវត្ថិភាពម្ហូបអាហារ ពាក់ព័ន្ធ ដែលមានចែងក្នុងច្បាប់ និងលិខិតបទដ្ឋានគតិយុត្តជាធរមាន របស់ប្រទេសចិន។
អត្ថបទគួរអាន!
ក្រសួងកសិកម្មកម្ពុជាបន្ថែមទៀតថា អង្គភាពមានសមត្ថកិច្ចពាក់ព័ន្ធនឹងអនាម័យ និងភូតគាមអនាម័យនៃប្រទេសទាំងពីរ នឹងដំណើរការចរចាគ្នាអំពីលក្ខខណ្ឌតម្រូវអនាម័យ និងភូតគាមអនាម័យផ្សេងៗ សម្រាប់ផលិតផលនីមួយៗ ដែលដំណើរការនេះ នឹងរួមមាននូវការចុះត្រួតពិនិត្យ និងវាយតម្លៃដោយផ្ទាល់នៅលើទីតាំង ពីសំណាក់សមត្ថកិច្ចនៃអគ្គរដ្ឋបាលគយចិននៅតាមបណ្ដាកសិដ្ឋាន និងទីតាំងកែច្នៃវេចខ្ចប់ផងដែរ។
ដើម្បីឲ្យដំណើរការចរចានេះ ប្រព្រឹត្តទៅបានដោយរលូន និងឆាប់រហ័សនោះ ក្រសួងកសិកម្មអះអាងថា ភាគីកម្ពុជា ចាំបាច់ត្រូវមានការរៀបចំខ្លួនខាងបច្ចេកទេសឲ្យបានប្រសើរ មុនពេលដែលមន្ត្រីជំនាញរបស់ចិនចុះត្រួតពិនិត្យ និងវាយតម្លៃផ្ទាល់នៅបណ្ដាកសិដ្ឋាន និងទីតាំងកែច្នៃវេចខ្ចប់។
ក្រសួងកសិកម្មក៏បានជំរុញឲ្យម្ចាស់កសិដ្ឋានដែលមានបំណងនាំចេញផលិតផលខាងលើទៅកាន់ទីផ្សារប្រទេសចិន ត្រូវមកទំនាក់ទំនងដាក់ពាក្យស្នើសុំចុះបញ្ជីនៅនាយកដ្ឋានការពារដំណាំ អនាម័យ និងភូតគាមអនាម័យ នៃអគ្គនាយកដ្ឋានកសិកម្ម ចាប់ពីថ្ងៃជូនដំណឹងនេះ តទៅ។
អត្ថបទគួរឲ្យចាប់អារម្មណ៍
គួរបញ្ជាក់ថា កាលពីដើមឆ្នាំ២០១៩ កន្លងទៅនេះ កម្ពុជាក៏ទើបតែបានធ្វើការនាំចេញផ្លែចេកស្រស់ទៅកាន់ទីផ្សារប្រទេសចិនផងដែរ។ ប៉ុន្ដែ ក្នុងចំណោមក្រុមហ៊ុនដែលបានដាក់ពាក្យស្នើសុំនាំចេញចេកចំនួន ១០ មានតែក្រុមហ៊ុនចំនួន៥ ប៉ុណ្ណោះ ដែលអាចគោរពតាមស្ដង់ដារអនាម័យ និងភូតគាមអនាម័យ ដែលរដ្ឋាភិបាលចិនបានកំណត់ និងអាចធ្វើការនាំចេញចេកទៅកាន់ទីផ្សារចិនបាន៕
None
