ជនរងគ្រោះដោយសារវិបត្តិកូវីដ-១៩ ជាង៧១ម៉ឺនគ្រួសារ ទទួលប្រាក់ឧបត្ថម្ភពីរដ្ឋាភិបាល

គ្រួសារក្រីក្រ និងងាយរងគ្រោះក្នុងអំឡុងវិបត្តិនៃជំងឺកូវីដ-១៩ ជាង ៧១ម៉ឺនគ្រួសារទទួលបានប្រាក់ឧបត្ថម្ភពីរាជរដ្ឋាភិបាលកម្ពុជា គិតត្រឹមខែមករាឆ្នាំ២០២១ ខណៈដែលរាជរដ្ឋាភិបាលបានដាក់ចេញនូវវិធានការចំនួន៧ជុំរួចមកហើយ ក្នុងការដោះស្រាយសេដ្ឋកិច្ច ដែលបង្កឡើងដោយមេរោគឆ្លងជាសកលនេះ។ នេះបើតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ។

សម្តេចតេជោ ហ៊ុន សែន និង កម្មារិនីរោងចក្រ

ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ ធ្លាប់បានលើកឡើងនាពេលថ្មីៗនេះថា ដោយសារតែមានអន្តរាគមន៍របស់រាជរដ្ឋាភិបាល បានធ្វើឲ្យអត្រាភាពក្រីក្រនៅកម្ពុជានៅអំឡុង ពេលកូវីដ-១៩ ប្រមាណ ១៤% ប៉ុណ្ណោះ។

បើតាមក្រសួងសេដ្ឋកិច្ច ក្នុងចំណោមគ្រួសារក្រីក្រជាង ៧០ម៉ឺនគ្រួសារ ដែលទទួបានប្រាក់ឧបត្ថម្ភពីរដ្ឋនោះ មានជាង៦ពាន់ ៤រយគ្រួសារ រស់នៅរាជធានីភ្នំពេញ ខណៈ ជាង ៣ម៉ឺនគ្រួសារទៀត រស់នៅក្រៅរាជធានីភ្នំពេញ និងជាង ៦៧ម៉ឺនគ្រួសាររស់នៅជនបទ។

សម្តេចនាយករដ្ឋមន្ត្រី ហ៊ុន សែន កាលពីពេលថ្មីៗ បានប្រកាសឲ្យបន្តអនុវត្តកម្មវិធីផ្តល់សាច់ប្រាក់ពិសេសនេះ រហូតដល់ខែមីនា ឆ្នាំ២០២១៕

សូមរងចាំទស្សនាសេចក្តីរាយការណ៍បន្ថែមនៅព្រឹកស្អែក!

None