ថ្មីៗនេះ ក្រសួងពាណិជ្ជកម្ម បានប្រកាសដាក់ឱ្យប្រើប្រាស់ជាផ្លូវការនូវលទ្ធផលនៃការស្រាវជ្រាវស្ដីពី«ទីផ្សារសម្រាប់ផលិតផលកសិកម្មដែលមានតម្លៃខ្ពស់របស់កម្ពុជា» ដែលមានការចូលរួមពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និង ឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា។
កម្មវិធីនេះ រៀបចំឡើងក្នុងគោលបំណង ដើម្បីផ្សព្វផ្សាយអំពីលទ្ធផល នៃការសិក្សាស្រាវជ្រាវ របស់កម្មវិធីខ្សែច្រវ៉ាក់ តម្លៃកសិកម្មកម្ពុជា-អូស្ត្រាលី (CAVAC) ក្រោមការឧបត្ថម្ភរបស់រដ្ឋាភិបាលអូស្ត្រាលី។ តាមរយៈកម្មវិធីនេះ បានឃើញនូវផលិតផលកសិកម្មកម្ពុជាចំនួន៩មុខ ដែលមានតម្លៃខ្ពស់ និងមានសក្ដានុពលទីផ្សារសម្រាប់ទីផ្សារអន្តរជាតិ។
ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម យល់ថា កម្មវិធីនេះ ជាផ្នែកមួយជួយលើកកម្ពស់តម្លៃកសិផលខ្មែរ បង្កើនឱកាសទីផ្សារ ជំរុញការនាំចេញ ក៏ដូចជាចូលរួមដោះស្រាយបញ្ហាកកស្ទះផលកសិកម្ម ដែលកម្ពុជា តែងជួបប្រទះកន្លងមក។ អ្នកនាំពាក្យរូបនេះ បានបន្ថែមថា តាមរយៈកម្មវិធីនេះ កម្ពុជា នឹងស្រូបទាញអ្នកវិនិយោគ កាន់ច្រើនចូលមកវិនិយោគនៅកម្ពុជា ក្នុងវិស័យកសិកម្ម។
អត្ថបទទាក់ទង
បើតាមអ្នកនាំពាក្យក្រសួងពាណិជ្ជកម្ម បច្ចុប្បន្នក្រសួង កំពុងអនុវត្តន៍នូវកិច្ចការសំខាន់ៗ មានដូចជា ការចុះហត្ថលេខា លើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់, កិច្ចព្រមព្រៀងពាណិជ្ជកម្មសេរីកម្ពុជា-ចិន, កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ, ការងារអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ និងការងាររៀបចំយុទ្ធសាស្ត្រទាញយកអត្ថប្រយោជន៍ ជាអតិបរមាពីការអនុវត្តកិច្ចព្រមព្រៀងពាណិជ្ជកម្មសេរី និងការងារអាទិភាពផ្សេងទៀត។
តាមរយៈលទ្ធផលទាំងនេះ ក្រសួងពាណិជ្ជកម្មរំពឹងថា កម្ពុជា នឹងកាន់តែមានទីផ្សារ ក្នុងការនាំចេញផលិតផលកសិកម្ម ទៅកាន់ទីផ្សារប្រទេសចិន និងប្រទេសកូរ៉េ បន្ថែមទៀត៕
អត្ថបទ៖ ខន ណារី
None
