ការបម្រែបម្រួលអាកាសធាតុកំពុងតែបង្កឱ្យមានរលកកម្ដៅកាន់តែខ្លាំង និងកើតមានអាកាសធាតុក្ដៅខ្លាំងនៅទូទាំងពិភពលោកដោយរលកកម្ដៅនេះបានលាតសន្ធឹងចាប់ពីប្រទេសឥណ្ឌារហូតទៅដល់ទ្វីអឺរ៉ុបនៅក្នុងឆ្នាំនេះ ដែលគេរំពឹងថានឹងប៉ះពាល់ដល់ទិន្នផលដំណាំជាច្រើន។
ការកើនឡើងនៃសីតុណ្ហភាពនេះកំពុងបង្កឱ្យមានការព្រួយបារម្ភកាន់តែខ្លាំងឡើងចំពោះសុខភាពជាពិសេសសម្រាប់អ្នកធ្វើនៅកណ្ដាលថ្ងៃក្នុងស្ថានភាពក្តៅខ្លាំង ដែលវាប្រឈមនឹងគ្រោះថ្នាក់យ៉ាងខ្លាំង។
ការវាយតម្លៃចុងក្រោយរបស់ក្រុមហ៊ុន Verisk Maplecroft បានលើកឡើងពីការគំរាមកំហែងទាំង២នោះរួមគ្នាដើម្បីគណនារកឃើញថា ភាពការកើនឡើងនៃរលកកម្ដៅបានបង្ក«ហានិភ័យយ៉ាងខ្លាំង»ដល់វិស័យកសិកម្មនៅប្រទេសចំនួន ២០ រួមទាំងក្រុមហ៊ុនកសិកម្មខ្នាតយក្សរបស់ឥណ្ឌាផងដែរ។
ប៉ុន្តែនៅប៉ុន្មានទសវត្សរ៍ខាងមុខនេះគេបានរំពឹងថា មានប្រទេសចំនួន ៦៤ ទៀតនឹងរងការគំរាមកំហែងដោយរលកកម្ដៅនេះនៅត្រឹមឆ្នាំ២០៤៥ ដែលវាបានតំណាងឱ្យផលិតកម្មស្បៀងអាហារពិភពលោកចំនួន ៧១% ក្នុងពេលបច្ចុប្បន្ននេះ រួមទាំងប្រទេសដែលមានសេដ្ឋកិច្ចធំៗមួយចំនួនទៀតដូចជាចិន ឥណ្ឌា ប្រេស៊ីល និងសហរដ្ឋអាមេរិកផងដែរ។
អត្ថបទគួរអាន
លោក Will Nichols ប្រធានផ្នែកអាកាសធាតុ និងភាពធន់នៅក្រុមហ៊ុន Verisk Maplecroft បាននិយាយថា ស្របពេលមានការកើនឡើងនៃសីតុណ្ហភាពសកល និងការកើនឡើងនៃរលកកម្ដៅខ្លាំងក្នុងពិភពលោកនោះ ពួកគេនឹងបានឃើញដំណាំនៅតាមប្រទេសដែលមានអាកាសធាតុក្តៅជាងមុនជាច្រើនក៏ចាប់ផ្តើមរងផលប៉ះពាល់ផងដែរ។
អ្នកជំនញាផ្នែកវាយតម្លៃរូបនេះបាននិយាយថា ស្រូវអង្ករមានហានិភ័យខ្លាំងជាងគេរួមផ្សំនឹងដំណាំផ្សេងៗទៀតដូចជាដំណាំកាកាវ និងសូម្បីតែដំណាំប៉េងប៉ោះក៏ត្រូវបានវាយតម្លៃស្ថិតនៅក្រោមការព្រួយបារម្ភមួយផងដែរ។
ប្រទេសឥណ្ឌាដែលរួមចំណែកក្នុងការផលិតស្បៀងអាហារពិភពលោកចំនួន ១២% ក្នុងឆ្នាំ២០២០ និងជាប្រទេសដែលពឹងផ្អែកខ្លាំងលើផលិតភាពការងារខាងក្រៅស្រុកដែរនោះ ត្រូវគេវាយតម្លៃថាមានហានិភ័យរលកកម្ដៅខ្លាំងរួចស្រេចទៅហើយ។
លោក Nichols បានប្រាប់ទីភ្នាក់ងារ AFP ថា មានការព្រួយបារម្មណ៍យ៉ាងខ្លាំងដែលថា ប្រជាជននៅតាមតំបន់ជនបទដែលពឹងផ្អែកខ្លាំងលើវិស័យកសិកម្មនោះ អាចនឹងងាយរងគ្រោះខ្លាំងចំពោះបាតុភូតរលកកម្ដៅប្រភេទនេះ ដែលនឹងបន្តមាននៅក្នុងពេលខាងមុខទៀត៕
អត្ថបទ៖ សុខ ជា
