នៅចំពេលដែលប្រទេសអង់គ្លេសកំពុងប្រឈមនឹងការដាំក្បាលចុះនៃសេដ្ឋកិច្ចកាន់តែខ្លាំង ដោយសារតម្លៃថាមពលសម្រាប់ពលរដ្ឋប្រើប្រាស់បានកើនឡើងដល់ ៤ដងទៅហើយនោះ នាយករដ្ឋមន្ត្រីថ្មីរបស់អង់គ្លេស គឺលោកស្រី Liz Truss បានអះអាងថា លោកស្រីនឹងចាត់វិធានការភ្លាមៗ ដើម្បីការពារពលរដ្ឋដែលជាអ្នកប្រើប្រាស់ថាមពល។ ដោយក្នុងនោះ អង់គ្លេសនឹងកំណត់ដាក់ចេញកញ្ចប់ថវិកាប្រមាណ ១១៥ពាន់លានដុល្លារអាមេរិក ដើម្បីដោះស្រាយបញ្ហាថាមពលដែលកំពុងហក់ឡើងថ្លៃនេះ។
ទន្ទឹមនេះ ការខ្ចីបំណុលរបស់រាជរដ្ឋាភិបាលអង់គ្លេសក៏បានកើនខ្ពស់ដែរ ដើម្បីបានមូលនិធិគាំទ្រដល់កញ្ចប់ថវិកាបន្ថែមដែលត្រូវបានសន្យាដោយលោកស្រី Truss ក្នុងការកាត់បន្ថយពន្ធ ហើយវាក៏បានធ្វើឲ្យទីផ្សារហិរញ្ញវត្ថុមានភាពច្របូកច្របល់ផងដែរ។ ជាក់ស្ដែង គិតត្រឹមថ្ងៃទី ៧ ខែកញ្ញា ប្រាក់ផោនអង់គ្លេស ធៀបនឹងប្រាក់ដុល្លារអាមេរិក បានដាំក្បាលចុះខ្លាំងមិនធ្លាប់មានឡើយ បើគិតតាំងពីឆ្នាំ១៩៨៥មក។
បើតាមការបញ្ជាក់របស់ធនាគារ ដយឆ៍ ប៊ែង (Deutsche Bank) ការប៉ះប៉ូវលើតម្លៃថាមពល និងការសន្យាកាត់បន្ថយពន្ធរបស់អង់គ្លេសអាចនឹងត្រូវចំណាយដល់ទៅជាង ២០០ពាន់លានដុល្លារឯណោះឬប្រហែលពាក់កណ្ដាលនៃការចំណាយលើការដោះស្រាយវិបត្តិកូវីដ១៩របស់អង់គ្លេសនាពេលកន្លងមក។
អត្ថបទគួរអាន
យ៉ាងណាមិញ ចំពោះផែនការបញ្ចុះតម្លៃថាមពលរបស់លោកស្រី Liz Truss ក៏ត្រូវបានគេរំពឹងថា នឹងអាចធ្វើឲ្យការកើនឡើងអតិផរណា ដែលកំពុងហក់ឡើងដល់ទៅជាង១០%នោះ អាចថយចុះមកវិញផងដែរ ប៉ុន្ដែផែនការនេះ ក៏នឹងជំរុញឲ្យរដ្ឋាភិបាលត្រូវបង្កើនការខ្ចីបំណុលជាង ១០០ពាន់លានដុល្លារទៀត ហើយវាក៏បានបង្កើនភាពតានតឹងកាន់តែខ្លាំងលើវិស័យហិរញ្ញវត្ថុសាធារណៈ ជាមួយនឹងវិបត្តិថាមពល ដែលអាចនឹងបន្ដដល់រដូវរងារខាងមុខនេះ។
ជាមួយគ្នានេះ រាជរដ្ឋាភិបាលអង់គ្លេស ត្រូវបានរំពឹងថា នឹងដាក់ចេញនូវប្រភពថ្មីៗនៃការផ្គត់ផ្គង់ថាមពល រួមទាំងការចេញអាជ្ញាបណ្ណសម្រាប់ការរុករកប្រេង និងឧស្ម័ន នៅតំបន់សមុទ្រខាងជើងដល់ទៅ១៣០អាជ្ញាបណ្ណ រួមទាំងការលុបចោលនូវការហាមឃាត់ការបុកបំបែកផ្ទាំងថ្មដើម្បីរុករកប្រេង និងឧស្ម័នផងដែរ ប្រសិនបើសហគមន៍ក្នុងស្រុកយល់ព្រម។ មែនទែនទៅ អង់គ្លេសបានហាមឃាត់ចំពោះការរុករកប្រេង និងឧស្ម័ន ដែលប្រើបច្ចេកទេសបុកបំបែកផ្ទាំងសិលាធំៗនៅក្រោមដីតាំងពីឆ្នាំ២០១៩មកម្ល៉េះ ដោយសារតែមានការបារម្ភថា វាអាចធ្វើឲ្យមានរំញ័រផែនដី។ ប៉ុន្ដែ ការហាមឃាត់នេះ ត្រូវបានពិចារណាឡើងវិញ ក្រោយពេលតម្លៃថាមពលបានហក់ឡើងខ្ពស់ ក្រោយវិបត្តិសង្គ្រាមនៅអ៊ុយក្រែន៕
