សេដ្ឋកិច្ចរបស់ប្រទេសចិន ដែលជាមហាអំណាចសេដ្ឋកិច្ចធំបំផុតទីពីរនៅលើពិភពលោកទំនងជាបានពង្រឹងជំហជាមួយនឹងកំណើនកាន់តែរឹងមាំ។ ការស្ទង់មតិរបស់សារព័ត៌មាន Bloomberg សេដ្ឋកិច្ចរបស់ចិន ត្រូវបានគេព្យាករថា អាចសម្រេចបានកំណើនក្នុងរង្វង់ពី៥,១% ទៅ៥,៣% នៅឆ្នាំ២០២៥ លើសពីការរំពឹងទុករបស់រដ្ឋាភិបាលប្រទេសនេះ ដែលរំពឹងសម្រេចបានក្នុងរង្វង់៥%។
អ្នកវិភាគបានលើកឡើងថា សេដ្ឋកិច្ចរបស់ចិន ទទួលបានការជំរុញពីការនាំចេញដ៏រឹងមាំ ខណៈកំណើននេះហាក់ស្ទុះខ្លាំងក្រោយចិន និងសហរដ្ឋអាម៉េរិក បានបន្ធូរបន្ថយជម្លោះពាណិជ្ជកម្ម កាលពីពាក់កណ្តាលខែឧសភា ដោយបានទម្លាក់ពន្ធលើទំនិញរបស់ចិន ពី១៤៥% មកនៅត្រឹម៥៥% និងការដាក់ចេញគោលនយោបាយជួយគាំទ្រផ្នែកពន្ធរបស់រដ្ឋាភិបាលក្រុងប៉េកាំង។
តាមរយៈសន្ទុះកំណើនដ៏វិជ្ជមាននេះ អ្នកសេដ្ឋកិច្ចជាច្រើនរំពឹងថា ទីក្រុងប៉េកាំងនឹងបញ្ឈប់ដាក់ចេញយន្តការជំរុញសេដ្ឋកិច្ចបន្ថែមទៀត ដើម្បីរក្សាទុកគោលនយោបាយសម្រាប់ដាក់ចេញក្នុងករណីមានភាពតានតឹងជាមួយទីក្រុងវ៉ាស៊ីនតោន ផ្ទុះឡើងម្តងទៀត នៅពេលដែលកិច្ចព្រមព្រៀងបណ្តោះអាសន្នផុតកំណត់នៅពាក់កណ្តាលខែសីហា៕
ដោយៈ សរ សុជាតិ
