ប្លុកប្រជែងគ្នារវាងអាមេរិក និងចិន

ប្រសិនបើមានការចែកជាប្លុកប្រជែងគ្នារវាងអាមេរិក និងចិន តើមួយណានឹងអាចទាញបានផលចំណេញច្រើនបំផុត?


ទំនាក់ទំនងរវាងសហរដ្ឋអាមេរិក និងចិនបច្ចុប្បន្នកំពុងប្រេះឆាកាន់តែខ្លាំង និងមិនទាន់មានសញ្ញាណាមួយថា នឹងអាចរកឃើញការផ្សះផ្សាគ្នាបាននៅឡើយទេ។ មានសំណួរសំខាន់ចោទឡើងថា ចុះប្រសិនបើទំនាក់ទំនង មហាយក្សសេដ្ឋកិច្ចពិភពលោកទាំងពីរនេះ នៅតែបន្ដបែបនេះ និងអាចឈានទៅដល់ការចែកប្លុកគ្នាក្ដោបក្ដាប់ឥទ្ធិពល តើមួយណា នឹងរងផលប៉ះពាល់ជាង ហើយមួយណានឹងចំណេញជាង?
ទង់ជាតិប្រទេស ចិន និងទង់ជាតិ សហរដ្ឋអាមេរិក
ដោយ

ប្រសិនបើ​ភាព​ប្រេះឆា​រវាង​អា​មេ​រិ​ក និង​ចិន នៅ​តែ​បន្ដ​ទៅ​មុខ ជាមួយនឹង​ខ្សែ​ចង្វាក់​ផ្គត់ផ្គង់​ត្រូវ​បាន​រៀបចំ​ឡើង​វិញ ជា​ជាង​ការ​កាត់​ផ្ដាច់​ទាំងស្រុង នោះ​ផលវិបាក ត្រូវ​បាន​គេ​មើលឃើញ​ថា អាច​នឹង​មានការ​រំខាន​ច្រើន​ទៅ​លើ​ប្លុក​ចិន ជា​ជាង​ប្លុក​អា​មេ​រិ​ក​។​នេះ​បើ​យោង​តាម​ការ​អះអាង​ពី ស្ថាប័ន​មូលធន​សេដ្ឋកិច្ច (Capital Economics) របស់​អង់គ្លេស​។ តើ​មក​ពី​ហេតុផល​អ្វីខ្លះ ទើប​ស្ថាប័ន​ស្រាវជ្រាវ​របស់​អង់គ្លេស​មួយ​នេះ ហ៊ាន​អះអាង​បែប​នេះ?

Story: បើ​យើង​មើលទៅ​លើ​របាយការណ៍​របស់ ស្ថាប័ន​មូលធន​សេដ្ឋកិច្ច (Capital Economics) ដែល​ត្រូវ​បាន​ស្រង់​មក​ចុះ​ផ្សាយ​ដោយសារ​ព័ត៌មាន South China Morning Post បាន​ឲ្យ​ដឹង​ថា ផ្អែក​ទៅ​លើ​ទំនាក់ទំនង​ទ្វេភាគី នៅ​ក្នុង​ប្រព័ន្ធ​សេដ្ឋកិច្ច​សកលលោក សរុប​មាន ២១៧ ប្រទេស និង​ដែនដី ដែល​ទទួលស្គាល់​ដោយ ធនាគារពិភពលោក រួម​ទាំង​កោះ​តៃវ៉ាន់​ផង​នោះ គឺ​មាន​ចំនួន ១១៤ ប្រទេស និង​ដែនដី​ទៅ​ហើយ គឺ​ស្ថិត​ក្នុង​ប្លុក​សេដ្ឋកិច្ច​អា​មេ​រិ​ក ខណៈ​ចំនួន ៩០​ទៀត ស្ថិត​ក្នុង​ប្លុក​សេដ្ឋកិច្ច​ចិន​។

របាយការណ៍​របស់ ស្ថាប័ន​មូលធន​សេដ្ឋកិច្ច Capital Economics បាន​កំណត់​បញ្ជាក់​ទៀត​ថា បើ​ទោះបីជា ប្លុក​ចិន មាន​ចំនួន​ប្រជាជន​ច្រើន​ជាង​ប្លុក​អា​មេ​រិ​ក​ក៏​ដោយ ប៉ុន្ដែ ប្លុក​ចិន​កាន់កាប់​ប្រមាណ ២៥% នៃ GDP របស់​ពិភពលោក​ប៉ុណ្ណោះ ខណៈ​ប្លុក​អា​មេ​រិ​ក កាន់កាប់​ដល់​ទៅ ៦៨% នៃ GDP សរុប​។

របាយការណ៍​ដដែល​នេះ បាន​គូសបញ្ជាក់​ថា បើ​ទោះបីជា ប្លុក​ចិន មាន​ចំនួន​ប្រទេស​ច្រើន​នៅ​ក្នុង​ជំរុំ​របស់​ខ្លួន​ក៏​ដោយ ប៉ុន្ដែ ភាគច្រើន​គឺជា​ប្រទេស​តូច​ៗ បើ​គិត​ក្នុង​លក្ខខណ្ឌ​សេដ្ឋកិច្ច ហើយ​ចិន នៅ​តែ​ពឹងផ្អែក​ច្រើន​ណាស់​ទៅ​លើ ប្លុក​ប្រទេស​លោក​ខាងលិច ទាំង​តម្រូវការ​ចុង​ក្រោយ និង​ធាតុ​ចូល​សម្រាប់​សេដ្ឋកិច្ច​។

របាយការណ៍​របស់​ស្ថាប័ន​មូលធន​សេដ្ឋកិច្ច ដែល​សរសេរ​ដោយ​សេដ្ឋកិច្ចវិទូ​លោក Julian Evans និង Mark Williams បាន​បង្ហាញ​ទៀត​ថា ផល​ប៉ះពាល់​ទៅ​លើ​សេដ្ឋកិច្ច​ធំ​បំផុត ពី​ការ​បែកបាក់​ទំនាក់ទំនង​នេះ គឺ ការ​ធ្វើ​ពាណិជ្ជកម្ម​តែ​ម្ដង​។

លើស​ពី​ពាក់កណ្តាល​នៃ ជំនួញ​ពាណិជ្ជកម្ម​សកលលោក គឺ​កើត​មាន​ឡើង​នៅ​ក្នុង​ប្លុក​អា​មេ​រិ​ក ក៏​ប៉ុន្តែ​ប្លុក​ចិន គឺ​មាន​ទំហំ​ត្រឹមតែ ៦% នៃ​ជំនួញ​សកលលោក​នេះ ហើយ​ក្នុង​នោះ​ទៀត​សោត ៤០% គឺជា​ការ​ជួញដូរ​រវាង ចិន និង​ទីក្រុង ហុង កុង​។

ប្រភព​ដដែល​នេះ បាន​ធ្វើការ​សន្និដ្ឋាន​សំខាន់​មួយ​ថា ប្លុក​ចិន នៅ​មានការ​ពឹងផ្អែក​ខ្លាំង​ទៅ​លើ តម្រូវការ​ទីផ្សារ​របស់​ប្លុក​អា​មេ​រិ​ក ដោយ​ការ​នាំ​ចេញ ៥៩% របស់​ប្លុក​ចិន គឺ​ទៅ​កាន់​ប្លុក​អា​មេ​រិ​ក ហើយ​ទំហំ​នៃ​ការ​នាំ​ចេញ​របស់​ប្លុក​អា​មេ​រិ​ក ទៅ​កាន់​ប្លុក​ចិន​វិញ គឺ​ត្រឹមតែ ១៥% ប៉ុណ្ណោះ​។

នៅ​ក្នុង​ចំណោម​សេដ្ឋកិច្ច​ធំ​ៗ​កំពូល​ទាំង ៥០ នៅ​លើ​សកលលោក គឺ​មាន​ចំនួន ៤៣ ទៅ​ហើយ​ដែល​ទំនាក់ទំនង​ពាណិជ្ជកម្ម​របស់​ពួក​គេ ពឹងផ្អែក​ខ្លាំង​ទៅ​លើ តម្រូវការ​ទីផ្សារ និង​ផលិតកម្ម ក្នុង​ប្លុក​អា​មេ​រិ​ក​។

បើ​គិត​ជា​មធ្យម បណ្តា​ប្រទេស​សេដ្ឋកិច្ច​ធំ​ៗ ទទួល​បាន​ចំណែក ១២% នៃ GDP ពី​ការ​នាំ​ចេញ​ទំនិញ​ទៅ​កាន់ ប្លុក​អា​មេ​រិ​ក ហើយ​ពួក​គេ​ក៏​បាន​ចំណាយ​រង្វង់ ១២% នៃ GDP ទៅ​លើ​ការ​នាំ​ចូល​ទំនិញ​របស់​ប្លុក​អា​មេ​រិ​ក​ផង​ដែរ​។ យ៉ាងណាមិញ ទំនាក់ទំនង​ដដែល​នេះ ជាមួយនឹង ប្លុក​ចិន វិញ គឺ​មាន​ជា​មធ្យម​ត្រឹមតែ ៤% នៃ GDP ប៉ុណ្ណោះ​។

សូម​ជម្រាប​ដែរ​ថា ទំនាក់ទំនង​ប្រេះឆា​រវាង អា​មេ​រិ​ក និង​ចិន ចាប់ផ្តើម​នៅ​ក្នុង​អាណត្តិ​ប្រធានាធិបតី​អា​មេ​រិ​ក លោក ដូ​ណា​ល់ ត្រាំ ហើយ​វា​រីក​កាន់តែ​ធំ នៅ​ក្នុង​អាណត្តិ​លោក ចូ បៃ​ឌិន ដែល​បញ្ហា​វិបត្តិ​មេរោគ​កូ​វី​ដ​១៩ ក៏​ចូលរួម​ចំណែក​មួយ​ផ្នែក​ផង​ដែរ​៕

អត្ថបទ​៖ វណ្ណ វុ​ឌ្ឍ​វិវឌ្ឍន៍  

© 2021 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


ផ្លែស្រកានាគវៀតណាម កំពុងរងទុក្ខជាថ្មីទៀត ក្រោយចិនហាមឃាត់ការនាំចូល

ព័ត៌មាន
ការនាំចេញផ្លែឈើរបស់វៀតណាមទៅកាន់ទីផ្សារចិន នៅឆ្នាំ២០២១នេះ ហាក់មិនសូវរលូនប៉ុន្មានទេ ដោយសារតែចិនមានការរឹតត្បិតកាន់តែខ្លាំង ក្រោយពេលប្...

សហភាពអឺរ៉ុបគ្រោងចំណាយ ៣៥ពាន់លានដុល្លារ ដើម្បីបង្កើតស្ថាប័នសុខភាពថ្មីមួយ

ព័ត៌មាន
គណៈកម្មការអឺរ៉ុប នាពេលថ្មីៗនេះ បានប្រកាសផ្តល់ថវិកាប្រមាណ ៣៥ពាន់លានដុល្លារ ក្នុងការបើកដំណើរការនូវស្ថាប័នសុខភាពថ្មីមួយ ដែលត្រូវបានហៅថា...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ