ទោះយ៉ាងណា ផែនការនេះ ទំនងជាមិនងាយស្រួលក្នុងការសម្រេចបាននោះឡើយ ត្បិតថា ក្រុមហ៊ុនយក្សៗផលិតបន្ទះឈីបរបស់ប្រទេសទាំងនេះ ពិសេសកូរ៉េខាងត្បូងក៏កំពុងមានវិនិយោគរាប់ពាន់លានដុល្លារនៅក្នុងប្រទេសចិនផងដែរ។ នេះបើយោងតាមការចុះផ្សាយដោយសារព័ត៌មាន South China Morning Post។
ទំនាក់ទងកាន់តែប្រសើររវាងអាមេរិក និងសម្ព័ន្ធមិត្តក្ដី ប៉ុន្ដែ សំណើនេះ មិនអាចទទួលយកបានទាំងស្រុងនោះទេ សម្រាប់ទីក្រុងសេអ៊ូល ដោយសារតែក្រុមហ៊ុនយក្សកូរ៉េខាងត្បូង រួមមាន Samsung Electronics និង SK Hynix សុទ្ធតែបានបណ្តាក់ទុនរាប់ពាន់លានដុល្លារនៅក្នុងការបង្កើតរោងចក្រផលិតសំខាន់ៗនៅក្នុងប្រទេសចិនរួចអស់ទៅហើយ។ ហើយបើសិនជាមានការចងសម្ព័ន្ធបែបនេះមែន នោះកូរ៉េខាងត្បូងខ្លាចនឹងមានការសងសឹកត្រឡប់មកវិញ ពីទីក្រុងប៉េកាំង។
ទោះយ៉ាងណា ទីក្រុងវ៉ាស៊ីនតោន និងសេអ៊ូល មិនបានធ្វើអត្ថាធិប្បាយលើបញ្ហានេះនៅឡើយទេ ហើយក៏មិនបានផ្តល់ព័ត៌មានលម្អិតអំពីពេលវេលា និងទីកន្លែង ដែលសំណើនេះនឹងត្រូវធ្វើឡើងនោះដែរ។
អត្ថបទគួរអាន
សូមជម្រាបថា ចាប់តាំងពីការផ្ទុះឡើងនៃជំងឺរាតត្បាតកូវីដ១៩ ដែលបង្កឱ្យមានកង្វះខាតបន្ទះឈីបជាសកលមក ទីក្រុងវ៉ាស៊ីនតោនបាននឹងកំពុងស្វែងរកមធ្យោបាយ ដើម្បីកាត់បន្ថយការពឹងផ្អែកលើខ្សែចង្វាក់ផ្គត់ផ្គង់របស់ខ្លួនពីប្រទេសចិន។ ជាកស្ដែង នៅខែកញ្ញា ឆ្នាំ ២០២០ ក្រោមអាណត្តិប្រធានាធិបតីលោក ដូណាល់ ត្រាំ មន្ត្រីសហរដ្ឋអាមេរិក តៃវ៉ាន់ ជប៉ុន និងសហភាពអឺរ៉ុប បានផ្ដួចផ្ដើមជាមួយនឹងគំនិតដូចគ្នា ដើម្បីផ្លាស់ប្តូរខ្សែចង្វាក់ផ្គត់ផ្គង់ឱ្យឆ្ងាយពីប្រទេសចិនដីគោក។
យ៉ាងណាក៏ដោយចុះ គំនិតនៃសម្ព័ន្ធភាពឧស្សាហកម្មបន្ទះឈីប ដឹកនាំដោយសហរដ្ឋអាមេរិក ដែលមិនរាប់បញ្ចូលប្រទេសចិននេះ បានបង្កឱ្យមានការជជែកគ្នានៅលើប្រព័ន្ធផ្សព្វផ្សាយសង្គមរបស់ចិនយ៉ាងខ្លាំងផងដែរ។ ខណៈអ្នកនិយមលេងអ៊ីនធឺណិតចិនមួយចំនួនបាននិយាយថា ទង្វើបែបនេះនឹងជំរុញឱ្យទីក្រុងប៉េកាំងបង្កើតការប្ដេជ្ញាចិត្តលើកិច្ចខិតខំប្រឹងប្រែង ដើម្បីសម្រេចបាននូវភាពគ្រប់គ្រាន់ដោយខ្លួនឯងលើឧស្សាហកម្មបច្ចេកវិទ្យា។ ខណៈដែលមតិមួយចំនួនទៀតបានអះអាងថា សម្ព័ន្ធភាពបែបនេះមិនទំនងកើតឡើងទេ ដោយសារទីផ្សាររបស់ប្រទេសចិនគឺធំធេងណាស់ សម្រាប់ក្រុមហ៊ុនបន្ទះឈីបរបស់កូរ៉េខាងត្បូង និងតៃវ៉ាន់ក្នុងការបោះបង់ចោល៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
