តាមរយៈរបាយការណ៍បច្ចុប្បន្នភាពប្រចាំត្រីមាសរបស់ខ្លួនសម្រាប់ទស្សនវិស័យសេដ្ឋកិច្ចអាស៊ាន+៣ ចេញផ្សាយកាលពីសប្ដាហ៍មុន ស្ថាប័នស្រាវជ្រាវម៉ាក្រូសេដ្ឋកិច្ច អាមរ៉ូ (AMRO) ដែលមានមូលដ្ឋាននៅសិង្ហបុរី បានព្យាករថា តំបន់អាស៊ាន+៣ នឹងសម្រេចបានកំណើនសេដ្ឋកិច្ចជារួមក្នុងរង្វង់៤,៥%នៅឆ្នាំ២០២៤ នេះ បើទោះបីជាទស្សនវិស័យសេដ្ឋកិច្ចពិភពលោកស្ថិតក្នុងភាពប្រាកដប្រជាយ៉ាងណាក្ដី។
របាយការណ៍នេះក៏បានព្យាករដែរថា សេដ្ឋកិច្ចរបស់កម្ពុជា នឹងសម្រេចបានកំណើនល្អប្រសើរក្នុងរង្វង់៦,២%ក្នុងឆ្នាំ កើនឡើងពីកម្រិត ៥,៣%នៅក្នុងឆ្នាំ២០២៣ កន្លងទៅ រីឯ កម្រិតអតិផរណា ត្រូវបានព្យាករថា នឹងកើនឡើងពី ២,៦%ក្នុងឆ្នាំ២០២៣ ឈានដល់៣,១%ក្នុងឆ្នាំ២០២៤។
អត្ថបទគួរអាន
ទោះជាយ៉ាងណា ការព្យាកររបស់ អាមរ៉ូ (AMRO) សម្រាប់កំណើនសេដ្ឋកិច្ចកម្ពុជា ក្នុងឆ្នាំ២០២៤ គឺទាបជាងបន្តិចបើធៀបនឹងការព្យាកររបស់រដ្ឋាភិបាលកម្ពុជាខ្លួនឯង។
សូមបញ្ជាក់ថា ក្រសួងសេដ្ឋកិច្ច និងហិរញ្ញវត្ថុរបស់កម្ពុជា បានធ្វើការព្យាករកាលពីខែធ្នូ ចុងឆ្នាំ២០២៣ ថា សេដ្ឋកិច្ចកម្ពុជា នឹងសម្រេចបានកំណើនក្នុងរង្វង់ ៦,៦%នៅឆ្នាំ២០២៤ នេះ ជាមួយនឹងផលិតផលក្នុងស្រុកសរុប (GDP) ឈានដល់ប្រមាណ ៣៤,៥ពាន់លានដុល្លារអាម៉េរិក។
ហើយកាលពីខែតុលា ស្ថាប័នមូលនិធិរូបិយវត្ថុអន្តរជាតិ IMF បានព្យាករថា សេដ្ឋកិច្ចកម្ពុជា នឹងសម្រេចបានកំណើន ៦,០%នៅឆ្នាំ២០២៤ ខណៈធនាគារពិភពលោក (World Bank) បានព្យាករថា សេដ្ឋកិច្ចកម្ពុជា នឹងសម្រេចបានកំណើន ៦,១%។
លោក អាឌីតយ៉ា ម៉ាត់ធូ (Aaditya Matto) ប្រធានអ្នកជំនាញសេដ្ឋកិច្ចប្រចាំតំបន់អាស៊ីបូព៌ា និងប៉ាស៊ីហ្វិក នៅធនាគារពិភពលោក (World Bank) បានគូសបញ្ជាក់ថា កំណើនសេដ្ឋកិច្ចរបស់កម្ពុជា ត្រូវបានជំរុញដោយកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប-RCEP) ជាកិច្ចព្រមព្រៀងពាណិជ្ជកម្មសេរីដ៏ធំមួយ ដែលមានសមាជិកចូលរួមដល់ទៅ១៥ប្រទេសរួមមានសមាជិកអាស៊ាន ទាំង១០ ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់ ដែលរួមបញ្ចូលគ្នាគ្របដណ្ដប់រហូតដល់ទៅ៣០%នៃទំហំសេដ្ឋកិច្ច និងពាណិជ្ជកម្មរបស់ពិភពលោកទាំងមូល៕
ដោយ: តែម សុខុម
None
