បើទោះបីជាមានភាពជោគជ័យយ៉ាងជាក់ច្បាស់ តាមរយៈកម្មវិធីវិនិយោគក្រៅប្រទេស ក្រោមគម្រោងខ្សែក្រវាត់និងផ្លូវ ដ៏លេចធ្លោរបស់ខ្លួនក៏ដោយ លោក ស៊ី ជីនពីង ប្រធានាធិបតីចិន បានសង្កត់ធ្ងន់កាលពីសប្តាហ៍មុន លើទំនួលខុសត្រូវរបស់ទីក្រុងប៉េកាំង ដើម្បីធានាបានថា គ្មានអំពើពុករលួយ នៅតាមគម្រោងអភិវឌ្ឍន៍ក្នុងប្រទេសនីមួយៗ។
ប៉ុន្តែសម្រាប់អ្នកវិភាគ និងសេដ្ឋវិទូ វាមានអំពើពុករលួយក្នុងគម្រោងខ្សែក្រវាត់និងផ្លូវនៅទូទាំងពិភពលោកតែម្តង ជាហេតុធ្វើឲ្យគម្រោងនេះ ខ្វះតម្លាភាព និងចខ្វះប្រសិទ្ធភាព។
លោក ចូណាថាន់ ហីលមែន (Jonatha Hillman) អ្នកជំនាញជាន់ខ្ពស់នៅមជ្ឈមណ្ឌលសម្រាប់ការសិក្សាយុទ្ធសាស្ត្រអន្តរជាតិបាននិយាយថា គម្រោងហេដ្ឋារចនាសម្ព័ន្ធធំៗមានតម្លៃលើសពីការរំពឹងទុក ចំណាយពេលយូរជាងការរំពឹងទុក និងផ្តល់អត្ថប្រយោជន៍តិចជាងការរំពឹងទុក ហើយវាបានកើតឡើងនៅគ្រប់គ្រងគម្រោងទូទាំងពិភពលោក។
លោកបានបន្ថែមថា កង្វះខាតតម្លាភាពធ្វើឱ្យក្រុមហ៊ុនចិនមានភាពងាយស្រួលក្នុងការអាចចាប់ផ្តើមគម្រោង ឬផ្លាស់ប្តូរគម្រោងតាមចិត្តយ៉ាងឆាប់រហ័ស ដែលប្រការនេះ វាបានបង្កើនលទ្ធភាពធ្វើឲ្យគម្រោងទាំងនោះ មានផលប៉ះពាល់អវិជ្ជមានដល់សង្គម និងបរិស្ថាន។
អត្ថបទគួរអាន
គួរជម្រាបថា គម្រោងខ្សែក្រវាត់និងផ្លូវ ជាប់ពាក់ព័ន្ធនឹងការតភ្ជាប់ប្រទេសជាង ៧០ នៅទ្វីបអាស៊ី អឺរ៉ុប និងអាហ្វ្រិក តាមរយៈគម្រោងហេដ្ឋារចនាសម្ព័ន្ធផ្លូវដែក ផ្លូវថ្នល់ និងផ្លូវសមុទ្រជាបន្តបន្ទាប់ ដែលផ្តល់ឱ្យទីក្រុងប៉េកាំងនូវឱកាសដើម្បីលើកកម្ពស់ការតភ្ជាប់ក្នុងតំបន់ និងសមាហរណកម្មសេដ្ឋកិច្ចពិភពលោក។
ប៉ុន្តែ ចំពេលទំនាក់ទំនងចិន-អាមេរិកកំពុងមានជម្លោះ ទីក្រុងវ៉ាស៊ីនតោននិងសម្ព័ន្ធមិត្តបានស្តីបន្ទោសប្រទេសចិន ថាបានប្រើគម្រោងនេះ ជាអាវុធភូមិសាស្ត្រនយោបាយ ទាក់ទាញប្រទេសនានាឱ្យធ្លាក់ក្នុងអន្ទាក់បំណុល ខណៈពួកគេយកកម្ចីពីប្រទេសចិន ដើម្បីផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធ ដែលផ្តល់ផលចំណេញតិចតួច។
ក្រុងប៉េកាំងជាញឹកញយបានច្រានចោលការចោទប្រកាន់នេះ ហើយអះអាងថា គម្រោងយក្សរបស់ខ្លួនមួយនេះ គឺដើម្បីការអភិវឌ្ឍន៍ និងសមាហរណកម្មសេដ្ឋកិច្ចសកល និងជាពិសេសដើម្បីជួយផ្តល់សម្ទុះកំណើនសេដ្ឋកិច្ចដល់ប្រទេសក្រីក្រ និងប្រទេសកំពុងអភិវឌ្ឍន៍ជាច្រើននៅទូទាំងពិភពលោក៕None
