បន្ទាប់ពីរកឃើញមេរោគបំប្លែងថ្មី អូមីក្រុង ការលក់ភាគហ៊ុនបានធ្លាក់ចុះទាំងនៅក្នុងទីផ្សារភាគហ៊ុនអាស៊ី និងអឺរ៉ុប។ ក្នុងនោះ ផ្សារភាគហ៊ុនដ៏ចំណាស់របស់សហរដ្ឋអាមេរិក Dow Jones នៅថ្ងៃជួញដូរចុងក្រោយនៅចុងសប្ដាហ៍មុននេះ បានធ្លាក់ចុះ ២,៥% ដែលជាការធ្លាក់ចុះច្រើនបំផុតប្រចាំឆ្នាំ ខណៈតម្លៃថាមពល និងភាគហ៊ុនហិរញ្ញវត្ថុដែលមានភាពរសើបខ្លាំងក្នុងវិស័យសេដ្ឋកិច្ច ក៏ត្រូវបានរងផលប៉ះពាល់យ៉ាងធ្ងន់ធ្ងរផងដែរ។ ទន្ទឹមនឹងនោះ តម្លៃប្រេងគោល West Texas នាពេលអនាគត បានធ្លាក់ចុះមកនៅក្រោម ៧០ ដុល្លារ ក្នុងមួយបារ៉ែលនៅទីក្រុងញូវយ៉ក ជាលើកដំបូងក្នុងរយៈពេលប្រហែលពីរខែចុងក្រោយនេះ ពោលគឺធ្លាក់ចុះជាង ១០%។
ជុំវិញការលេចឡើងមេរោគបំប្លែងថ្មីនេះ វិនិយោគិនបាននាំគ្នាលក់ភាគហ៊ុនយ៉ាងប្រថុយប្រថាន ហើយបែរទៅរកការវិនិយោគនៅក្នុងរូបិយប័ណ្ណឌីជីថលគ្រីបតូវិញ។
ទោះយ៉ាងណាមិញ ប្រធានសេដ្ឋវិទូទីផ្សារធនាគារជប៉ុន Mizuho បាននិយាយថា ប្រសិនបើការរឹតបន្តឹងវិធានការទប់ស្កាត់មេរោគបំប្លែងថ្មី ត្រូវបានដាក់ឡើងវិញនៅជុំវិញពិភពលោក វានឹងធ្វើឱ្យខូចដំណើរការនៃគោលនយោបាយរូបិយវត្ថុនៅក្នុងសហរដ្ឋអាមេរិក និងទូទាំងពិភពលោក ។ ខណៈប្រធានសេដ្ឋវិទូរបស់ធនាគារអង់គ្លេស បានលើកឡើងថា ប្រសិនបើមានការរំខានផ្នែកហិរញ្ញវត្ថុ ឬមានការចាប់ផ្តើមរីករាលដាលនៃមេរោគបំប្លែងថ្មីនេះ និងការបិទប្រទេសម្តងទៀត នោះគឺជាប្រភេទនៃព្រឹត្តិការណ៍ដែលបញ្ជាក់យ៉ាងច្បាស់ថា នឹងផ្លាស់ប្តូរទស្សនៈចំពោះសេដ្ឋកិច្ចពិភពលោកជាក់ជាមិនខានឡើយ។
អត្ថបទទាក់ទង
សូមរំឮកថា មុនពេលមិនទាន់រកឃើញមេរោគបំប្លែងនេះ ប្រទេសជាច្រើនលើពិភាពលោក បានចាប់ផ្ដើមបើកដំណើរការប្រទេសជាបណ្ដើរៗ ដោយចរន្តសេដ្ឋកិច្ច និងប្រាក់ចំណូលមានសន្ទុះងើបឡើងវិញ ហើយគេឃើញមាន វិនិយោគិនបាននិងកំពុងចាក់លុយចូលទៅក្នុងការវិនិយោគលើទីផ្សារ ដែលបង្កឱ្យភាគហ៊ុនសកលពុះកញ្ជ្រោលជាបណ្ដើរឡើងវិញនៅឆ្នាំនេះ។ យោងតាមធនាគារកណ្តាលអាមេរិក លំហូរចូលមូលនិធិភាគហ៊ុនសរុបមានជិត៩០០ពាន់លានដុល្លាររហូតមកទល់ពេលនេះ។
ទោះយ៉ាងណា ទីផ្សារនេះ ចាប់ផ្ដើមស្ថិតក្នុងស្ថានភាពអាប់អួរជាថ្មីទៀត ក្រោយពេលដែលមេរោគបំប្លែងថ្មី អូមីក្រុងចូលមកដល់ ទោះយ៉ាងណា យើងនឹងរង់ចាំមើលបន្ដទៀត ថាតើពិភពលោកអាចនឹងគ្រប់គ្រងមេរោគបំប្លែងថ្មីនេះបានឆាប់ ឬក៏យ៉ាងណា ខណៈអ្នកជំនាញថា បញ្ហានេះ ទំនងជាមិនពិបាកដោះស្រាយទេ ដ្បិតថា កន្លងមកពិភពលោកមានបទពិសោធន៍ច្រើនដែរហើយ ក្នុងការគ្រប់គ្រងលើមេរោគកូវីដ១៩បំប្លែងថ្មីដែលបានរីករាលដាល៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
