នាយករដ្ឋមន្ត្រីចាំផ្ទះរបស់ថៃ លោក អានុទីន ឆានវីរៈគុល បានបង្ហាញការមិនពេញចំពោះរបាយការណ៍ររបស់វិទ្យាស្ថានជាតិ អភិវឌ្ឈន៍រដ្ឋបាលថៃ ដែលព្យាករថា គណបក្សភូមិចៃថៃរបស់លោកនឹងឈ្នះ១៥០អាសនៈនៅក្នុងការបោះឆ្នោតនាថ្ងៃទី៨ ខែកុម្ភៈ ព្រោះលោកគិតថា តួលេខនេះមិនសមនឹងការខិតខំប្រឹងប្រែងរបស់ខ្លួន។ លោក អានុទីន បានអះអាងថា គណបក្សរបស់លោកបានខិតខំធ្វើការងារយ៉ាងខ្លាំងក្លានៅគ្រប់មណ្ឌលបោះឆ្នោតទូទាំងប្រទេស ដូច្នេះការព្យាករនេះមិនទាន់ឆ្លុះបញ្ចាំងពីគោលដៅផ្ទៃក្នុង ដែលគណបក្សលោកបានកំណត់ទុកនោះទេ។
លោក ស៊ូវីឆា ផូអារី (Suvicha Pouaree) នាយកមជ្ឈមណ្ឌលស្ទង់មតិ NIDA បានលើកឡើងក្នុងបទសម្ភាសជាមួយទូរទស្សន៍ក្នុងស្រុកថៃ កាលពីពេលថ្មីៗថា គណបក្សភូមិចៃថៃ កំពុងកើនប្រជាប្រិយភាពខ្លាំង ដែលរំពឹងថា នឹងទទួលបានអាសនៈចន្លោះពី១៤០ ទៅ១៥០អាសនៈ។ លោកបានបន្ថែមថា ចំនួនអ្នកបោះឆ្នោតដែលមិនទាន់សម្រេចចិត្តបានធ្លាក់ចុះតិចជាង៨% ដែលមានន័យថា លទ្ធផលនៃការស្ទង់មតិនេះនឹងមិនសូវមានការប្រែប្រួលខ្លាំងនោះទេ រហូតដល់ថ្ងៃបោះឆ្នោត។
គួរបញ្ជាក់ថា មុនរំលាយសភា គណបក្សភូមិចៃថៃ របស់លោក អានុទីន មានតែ៧១អាសនៈប៉ុណ្ណោះក្នុងចំណោមច៥០០អាសនៈក្នុងសភាតំណាងរាស្ត្រ ខណៈគណបក្សប្រជាជនមាន១៤៣អាសនៈ និងគណបក្សភឿថៃ មានចំនួន១៤០អាសនៈ។ បើក្រឡេកទៅមើលការបោះឆ្នោតកាលពីឆ្នាំ២០២៣ គណបក្សភូមិចៃថៃ ទទួលការគាំទ្រត្រឹមតែ១៣,៤% គណបក្សភឿថៃ២៤,៥% និងគណបក្សឆ្ពោះទៅមុខ ២៥,៤%។
យ៉ាងណាមិញសម្រាប់ការបោះឆ្នោតនៅខែកុម្ភៈ ខាងមុខនេះ លោក អានុទីន ហាក់មានទំនុកចិត្តខ្ពស់បំផុតក្នុងការផ្លាស់ប្តូរវាសនានយោបាយថៃ តាមរយៈការដណ្តើមយកអាសនៈឱ្យបានច្រើនលើសលប់លើសពីការស្មានរបស់មជ្ឈដ្ឋានខាងក្រៅ៕
ដោយៈ សរ សុជាតិ
