តើប្រទេសសមាជិក APEC បានដាក់ចេញគោលការណ៍អ្វីខ្លះ សម្រាប់ការវិនិយោគ និងពាណិជ្ជកម្មប្រកបដោយនិរន្តភាពក្រោយកិច្ចប្រជុំ?

គោលការណ៍ថ្មីនោះមានឈ្មោះថា គោលការណ៍នៃទីក្រុងសាន់ហ្វ្រាន់ស៊ីស្កូ ស្តីពីការរួមបញ្ចូលការបើកចំហរ និងនិរន្តរភាពទៅក្នុងគោលនយោបាយពាណិជ្ជកម្ម និងការវិនិយោគ» ដែលវាមានគោលបំណងពិចារណាលើសមាមាត្រសេដ្ឋកិច្ច សង្គម និងបរិស្ថានប្រកបដោយតុល្យភាព” នៅក្នុងគោលនយោបាយរបស់សមាជិកនៃក្រុមប្រទេស APEC។

យោងតាមសេចក្តីថ្លែងការណ៍រួមស្តីពីគោលនយោបាយថ្មីនេះ វាបានរួមបញ្ចូលធាតុផ្សំសំខាន់ៗមួយចំនួនដូចជា ការដាក់បញ្ចូលនិរន្តរភាពបរិស្ថាន និងការរួមបញ្ចូលសង្គមទៅក្នុងការអភិវឌ្ឍ និងការអនុវត្តគោលនយោបាយពាណិជ្ជកម្ម និងការវិនិយោគ ដើម្បីគាំទ្រកំណើនសេដ្ឋកិច្ចរឹងមាំ មានតុល្យភាព សុវត្ថិភាព និងរួមបញ្ចូល លទ្ធផលបរិស្ថានវិជ្ជមាន និងសុខុមាលភាពសង្គមរបស់ប្រជាជន។

មួយវិញទៀត ជំរុញការបើកចំហ តម្លាភាព និងអាចព្យាករបានក្នុងការបង្កើតគោលនយោបាយ។ ហើយវារួមបញ្ចូលទាំងការធ្វើឱ្យមានការពិចារណា និងរៀបចំការពិគ្រោះយោបល់ជាសាធារណៈ ជាពិសេសជាមួយអាជីវកម្មខ្នាតតូច ស្ត្រី ជនជាតិដើមភាគតិច និងក្រុមផ្សេងៗទៀត។

បន្ថែមលើនេះគោលការណ៍ទាមទារឱ្យពង្រឹងកិច្ចសហប្រតិបត្តិការរវាងសមាជិក APEC លើពាណិជ្ជកម្ម ការវិនិយោគលើទំនិញ និងសេវាកម្មបរិស្ថាន ដើម្បីគាំទ្រដល់ការផ្លាស់ប្តូរថាមពលស្អាត រួមទាំងធ្វើឱ្យការយល់ដឹងកាន់តែស៊ីជម្រៅអំពីបញ្ហាប្រឈមដែល APEC មាន ជាមួយនឹងសក្តានុពលសេដ្ឋកិច្ចដើម្បីទទួលបាននូវឱកាសពាណិជ្ជកម្ម និងការវិនិយោគ និងការពង្រឹងការប្រមូលទិន្នន័យ និងការស្រាវជ្រាវលើគោលនយោបាយពាណិជ្ជកម្ម និងការវិនិយោគ ដើម្បីតាមដានផលប៉ះពាល់សេដ្ឋកិច្ច បរិស្ថាន និងសង្គម។

បើយោងតាមតាមសេចក្តីថ្លែងការណ៍របស់ APEC មធ្យោបាយដើម្បីសម្រេចបាននូវការរួមបញ្ចូលសេដ្ឋកិច្ច និងនិរន្តរភាពសម្រាប់សេដ្ឋកិច្ចនីមួយៗខាងលើ គឺអាចមានភាពខុសប្លែកគ្នាអាស្រ័យលើសង្គមប្រជាជាតិនីមួយៗ និងលក្ខណៈសេដ្ឋកិច្ចសមាជិកនីមួយៗ។

គួរជម្រាបថា ត្រូវបានបង្កើតឡើងក្នុងឆ្នាំ១៩៨៩ ក្រុមប្រទេសកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) មានគោលបំណង គឺដើម្បីលើកកម្ពស់កំណើនសេដ្ឋកិច្ចប្រកបដោយចីរភាព ពាណិជ្ជកម្ម និងការវិនិយោគ និងភាពរុងរឿងនៅក្នុងតំបន់អាស៊ីប៉ាស៊ីហ្វិក។

វេទិកា APEC មានសមាជិក២១ប្រទេសរួមមានអូស្ត្រាលី ព្រុយណេ កាណាដា ឈីលី សាធារណរដ្ឋប្រជាមានិតចិន ហុងកុង ឥណ្ឌូនេស៊ី ជប៉ុន កូរ៉េខាងត្បូង ម៉ាឡេស៊ី ម៉ិកស៊ិក នូវែលសេឡង់ ប៉ាពួអាស៊ីនូវែលហ្គីណេ ប៉េរូ ហ្វីលីពីន រុស្ស៊ី សិង្ហបុរី តៃវ៉ាន់ ថៃ សហរដ្ឋអាម៉េរិក និងប្រទេសវៀតណាម៕