ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានបញ្ជាក់ថា រាជរដ្ឋាភិបាលកម្ពុជានិងថ្នាក់ដឹកនាំប្រទេសចិនបានដាក់ក្តីរំពឹងរួមគ្នាថា ទំហំពាណិជ្ជកម្មទ្វេភាគីកម្ពុជា-ចិន នឹងអាចឈានដល់ ១០ពាន់លានដុល្លារអាមេរិកនៅត្រឹមឆ្នាំ២០២៣។ ការដាក់ក្តីរំពឹងបែបនេះ គឺបន្ទាប់ពីប្រទេសទាំងពីរសម្រេចបានទំហំពាណិជ្ជកម្មជាង៨ពាន់លានដុល្លារអាមេរិកកាលពីឆ្នាំ២០២០ ពេលដែលប្រទេសទាំងពីរ ក៏ដូចជាពិភពលោកកំពុងប្រឈមនឹងការឆ្លងរាតត្បាតនៃជំងឺកូវីដ-១៩។
ឯកឧត្តម សុខ សុភ័ក្ដ្រ បានចាត់ទុកប្រទេសចិនជាដៃគូពាណិជ្ជកម្មដ៏សំខាន់សម្រាប់កម្ពុជា ខណៈការធ្វើពាណិជ្ជកម្មរវាងប្រទេសទាំងពីរកន្លងមកតែងតែទទួលបានលទ្ធផលលើសការរំពឹងទុក។
អត្ថបទគួរអាន
ឯកឧត្តមបានបញ្ជាក់បន្ថែមយ៉ាងដូច្នេះថា៖«អ្វីដែលជាមោទកភាពបំផុត គឺការសម្រេចបាននូវការចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-ចិន(CCFTA) កាលពីខែតុលា ឆ្នាំ២០២០ ដែលភាគីទាំងពីរកំពុងជំរុញនីតិវិធីសេសសល់ ដើម្បីឱ្យកិច្ចព្រមព្រៀងនេះចូលជាធរមានឆាប់ៗខាងមុខនេះ។ ទំនាក់ទំនងពាណិជ្ជកម្ម-វិនិយោគទ្វេភាគីកម្ពុជា-ចិន មានភាពចាំបាច់ខ្លាំងណាស់ ក្នុងបរិការណ៍នៃការរីករាលដាលជាសកលនៃជំងឺកូវីដ១៩ និងការប្រកួតប្រជែងផ្នែកសេដ្ឋកិច្ច និងភូមិសាស្ត្រនយោបាយក្នុងតំបន់ និងសកល»។
ក្រៅពីកិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ ភាគីទាំងពីរ ក៏បានចុះកិច្ចព្រមព្រៀង អនុស្សារណៈនៃការយោគយល់គ្នា និងពិធីសារនានាទាក់ទងនឹងពាណិជ្ជកម្ម-វិនិយោគ ដែលផ្តល់កាលានុវត្តភាពក្នុងការពង្រឹងពាណិជ្ជកម្ម-វិនិយោគរវាងប្រទេសទាំងពីរឲ្យកាន់តែទូលាយ និងទំនើបថែមទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
