មន្ត្រីជាន់ខ្ពស់ និងអ្នកតំណាងធុរកិច្ច បានជួបប្រជុំគ្នាកាលពីថ្ងៃចន្ទ ដែលជាផ្នែកមួយនៃកិច្ចប្រជុំកំពូលពិសេសអាស៊ាន-អូស្ត្រាលី នៅមុនពេលមានកិច្ចប្រជុំកំពូលរបស់ប្រមុខដឹកនាំដែលនឹងធ្វើឡើងនៅថ្ងៃពុធ ទី៦ ខែមីន ជាថ្ងៃចុងក្រោយនៃកិច្ចប្រជុំកំពូលអូស្ត្រាលី-អាស៊ាន។ រដ្ឋមន្ត្រីការបរទេសអូស្ត្រាលី លោកស្រី ផេននី វង់ បាននិយាយកាលពីថ្ងៃចន្ទថា អ្វីដែលកំពុងកើតឡើងនៅក្នុងសមុទ្រចិនខាងត្បូង នៅច្រកសមុទ្រតៃវ៉ាន់ នៅអនុតំបន់មេគង្គ និងនៅទូទាំងតំបន់ឥណ្ឌូប៉ាស៊ីហ្វិក គឺជាក្តីកង្វល់រួម។
នេះគឺជាលើកទីមួយហើយ ដែលអូស្ត្រាលី និងអាស៊ានបានរៀបចំកិច្ចប្រជុំកំពូលពិសេសជុំគ្នាចាប់តាំងពីឆ្នាំ២០១៨ ហើយវាបានកើតឡើងនៅចំពេលដែលរដ្ឋាភិបាលរបស់នាយករដ្ឋមន្ត្រី អូស្ត្រាលី លោក អេនថូនី អាល់បានីស កំពុងលើកកម្ពស់ការចូលរួមជាមួយនឹងអាស៊ីអាគ្នេយ៍ក្រោមគោលនយោបាយ«ភាពជាកណ្តាលអាស៊ាន»របស់លោក។
សន្តិសុខសេដ្ឋកិច្ច និងតម្រូវការ ដើម្បីទប់ទល់នឹងមហាយក្សចិនហាក់ដូចជាកំពុងជំរុញបង្កើនគោលនយោបាយរបស់លោក អាល់បានីស។ សម្រាប់ភាគីអាស៊ានវិញ ធនធានធម្មជាតិរបស់អូស្ត្រាលី គឺជាប្រភពទាក់ទាញដ៏សំខាន់។
ប្រទេសថៃ និងឥណ្ឌូណេស៊ី កំពុងកំណត់យកឧស្សាហកម្មយានយន្តអគ្គិសនីរបស់ពួកគេធ្វើជាសសរស្តម្ភនៃយុទ្ធសាស្ត្រកំណើនសេដ្ឋកិច្ចរបស់ខ្លួន ប៉ុន្តែលោហៈធាតុដែលត្រូវការសម្រាប់ផលិតអាគុយយានយន្តអគ្គិសនីមានទីតាំងនៅក្នុងប្រទេសមួយចំនួនតូចនៅអាស៊ី និងអាម៉េរិកខាងត្បូង។ដោយហេតុតែអូស្ត្រាលី គឺជាប្រទេសផលិតរ៉ែលីដ្យូម និងរ៉ែនីកែល ដ៏សំខាន់នោះ ដូច្នេះប្រទេសថៃ និងឥណ្ឌូនេស៊ី មានបំណងចង់បង្កើតទំនាក់ទំនងកាន់តែរឹងមាំជាមួយនឹងទីក្រុងកង់បេរ៉ានៅអូស្ត្រាលី ដើម្បីពង្រឹងខ្សែច្រវាក់ផ្គត់ផ្គង់យានយន្តអគ្គិសនី។
ចំណែកសមាជិកអាស៊ានមួយចំនួនទៀតក៏កំពុងពិភាក្សាពីការអនុម័តយល់ព្រមរបស់អូស្ត្រាលីពាក់ព័ន្ធនឹងថាមពលនុយក្លេអ៊ែផងដែរ ដោយសារអូស្ត្រាលី គឺជាប្រទេសផលិតរ៉ែអ៊ុយរ៉ាញ៉ូមដ៏ធំជាងគេទីបួននៅក្នុងពិភពលោក ដោយផ្តល់នូវខ្សែច្រវាក់ផ្គត់ផ្គង់ដ៏មានសក្តានុពលសម្រាប់សមាជិកអាស៊ានទាំងនោះ៕
អត្ថបទ៖ សុខ ជា
