តាំងពីមានភាពល្អក់កក និងតឹងសរសៃកដាក់គ្នាកាន់តែខ្លាំងនៅមួយរយៈចុងក្រោយនេះ ទំនាក់ទំនងរវាងអូស្ត្រាលី និងចិន កំពុងមានភាពប្រះស្រាំកាន់តែខ្លាំងឡើងៗ ពិបាកក្នុងការផ្សះផ្សាមកវិញណាស់។ យ៉ាងណាមិញ គិតនៅក្នុងរយៈពេល៤ឆ្នាំចុងក្រោយនេះ ការវិនិយោគរបស់ចិននៅអូស្ត្រាលី បានដាំក្បាលចុះ ៥០% មកនៅប្រមាណតែជាង៨ពាន់៨រយលានដុល្លារអាមេរិកប៉ុណ្ណោះ ដោយសារតែមានការរឹតបន្ដឹងកាន់តែខ្លាំងឡើងលើការគ្រប់គ្រងមូលធនពីសំណាក់រដ្ឋាភិបាលក្រុងប៉េងកាំង គួបផ្សំនឹងទំនាក់ទំនងទ្វេភាគីរវាងប្រទេសទាំងពីក៏កាន់តែយ៉ាប់យ៉ឺនឡើងទៅពីមួយថ្ងៃទៅមួយថ្ងៃ។
លោក ដេវីដ អៀវីន (David Irvine) ប្រធានក្រុមប្រឹក្សាវិនិយោគ និងត្រួតពិនិត្យបរទេសនៃរដ្ឋាភិបាលអូស្ត្រាលី បាននិយាយថា អូស្ត្រាលីអនុវត្តគោលនយោបាយវិនិយោគដោយគ្មានការរើសអើងនោះទេ។ លោក គូសបញ្ជាក់ទៀតថា មាន២០% នៃការអនុម័តគម្រោងវិនិយោគនៅឆ្នាំមុន គឺមានខ្លះក៏ជាការវិនិយោគពីប្រទេសចិនដែរ។ មន្ត្រីជាន់ខ្ពស់អូស្ត្រាលីរូបនេះ សង្កត់ធ្ងន់ថា អូស្ត្រាលី បន្ដស្វាគមន៍សំណើវិនិយោគដែលមានផលប្រយោជន៍ពីប្រទេសចិន។ ប្រសិនបើការវិនិយោគពីប្រទេសចិនទាំងនោះ ផ្ដល់ផលប្រយោជន៍មកដល់សន្ដិសុខជាតិអូស្ត្រាលី នោះអូស្ត្រាលីនឹងពិចារណាការវិនិយោគនោះ ដូចការវិនិយោគពីប្រទេសផ្សេងទៀតដែរ ដោយមិនមានការរើសអើងអ្វីនោះឡើយ។
អត្ថបទគួរអាន
ប្រទេសចិន គឺជាដៃគូពាណិជ្ជកម្មធំបំផុតរបស់អូស្ត្រាលី ដែលមានការនាំចេញដល់ជាង ១៩ពាន់លានដុល្លារកាលពីខែកក្កដាកន្លងទៅ។ ទោះយ៉ាងណា ទំនាក់ទំនងការទូតនៃប្រទេសទាំងពីរលែងមានភាពផ្អែមល្ហែម ដោយប្រែមកជាជូរដូចទឹកខ្មេះនៅប៉ុន្មានឆ្នាំមកនេះ។ ក្នុងនោះ ប្រទេសចិនបានកម្រិត និងដំឡើងពន្ធលើការនាំចូលមុខទំនិញសំខាន់ៗរបស់អូស្ត្រាលីមួយចំនួន ដូចជាធ្យូងថ្ម និងស្រាក្រហមជាដើម។
សូមបញ្ជាក់ថា ប្រទេសអូស្ត្រាលី កាលពីឆ្នាំមុនមានការដាក់ចេញនូវកំណែទម្រង់ធំបំផុតមួយ នៃច្បាប់វិនិយោគបរទេសរបស់ខ្លួននៅក្នុងរយៈពេលជិត៥០ឆ្នាំកន្លងមកនេះ រួមទាំងមានការផ្ដល់នូវអំណាចឲ្យរដ្ឋាភិបាលអាចចាត់ការទៅលើអាជីវកម្មណាដែលបង្កឲ្យមានហានិភ័យសម្រាប់សន្ដិសុខជាតិអូស្ត្រាលីផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
