តម្លៃនៃការនាំចេញស្រារបស់ប្រទេសអូស្ត្រាលីទៅកាន់តំបន់អាស៊ីភាគឦសានបានធ្លាក់ចុះ ៤៦% មកនៅមានត្រឹមតែប្រហែល ២០៣ លានដុល្លារអាមេរិក និងធ្លាក់ចុះគិតជាបរិមាណ ៣១% មកនៅត្រឹម ៣៥ លានលីត្រ ដោយសារតែការដឹកជញ្ជូនទៅកាន់ប្រទេសចិនធ្លាក់ចុះ ៩២% ពោលគឺមានតម្លៃទឹកប្រាក់ត្រឹមតែ ១៣ លានដុល្លារអាមេរិកប៉ុណ្ណោះ។
ការនាំចេញស្រាទៅកាន់ទីក្រុងហុងកុងបានធ្លាក់ចុះ ២១% មកនៅត្រឹមជាង ១០២ លានដុល្លារបើទោះបីជាការនាំចេញស្រារបស់អូស្ត្រាលីកំពុងត្រឡប់ទៅរកកម្រិតធម្មតាបន្ថែមទៀត បន្ទាប់ពីមានការកើនឡើងនៃការនាំចេញទៅកាន់ទីផ្សារនៅក្នុងឆ្នាំ២០២១ក៏ដោយ។
លោក ព្យែរ ថេម (Pierre Tam) ប្រធាន និងជាសហស្ថាបនិកនៃសមាគមឧស្សាហកម្មស្រាហុងកុងបាននិយាយថា ទីផ្សារហុងកុង គឺជាការឆ្លុះបញ្ចាំងដោយផ្ទាល់នៃស្ថានភាពរបស់ប្រទេសចិនដីគោក។
លោក ព្យែរ បាននិយាយថា ពន្ធលើការនាំចូលស្រាពីប្រទេសអូស្ត្រាលីដែលកំណត់ដោយរដ្ឋាភិបាលចិន ដែលបានបិទព្រំដែនដោយសារជំងឺកូវីដ១៩ និងថ្លៃដឹកជញ្ជូនខ្ពស់ក្នុងរយៈពេល២ឆ្នាំចុងក្រោយនេះ បានបង្អាក់ក្រុមពាណិជ្ជករក្រុងហុងកុងមិនឱ្យចូលនាំចូលស្រារបស់អូស្ត្រាលីក្នុងតម្លៃពិសេសសម្រាប់អតិថិជនចិនដីគោកឡើយ។
លោក ព្យែរ បានបន្ថែមថា ស្រារបស់អូស្ត្រាលីលំដាប់ខ្ពស់មានតម្លៃចន្លោះពី ២៥៥ ដុល្លារអាមេរិកដល់ជាង ៣៨២ ដុល្លារក្នុងមួយដប ហើយអតិថិជននៅប្រទេសចិនកាលពីមុន គឺបានទិញស្រានេះ ៩០% ពីពាណិជ្ជករក្រុងហុងកុងមួយចំនួន។
អត្ថបទគួរអាន
លោកបានបន្តថា បច្ចុប្បន្នអ្នកទិញស្រាអូស្ត្រាលីសំខាន់ៗនៅហុងកុង គឺជាភោជនីយដ្ឋានដែលភាគច្រើនប្រើប្រាស់ស្រាអូស្ត្រាលីក្នុងកម្រិតទាបទៅមធ្យម ដែលមានតម្លៃចន្លោះពីជាង ១២ ដុល្លារទៅជាង ៣៨ ដុល្លារ។
ប្រទេសចិនបានអនុវត្តយកពន្ធរវាងជាង ១១៦% ទៅជាង ២១៨% លើការនាំចូលស្រាអូស្ត្រាលីនៅក្នុងដបចំណុះរហូតដល់ ២ លីត្រកាលពីខែមីនាឆ្នាំមុន ដោយអនុវត្តរហូតដល់ឆ្នាំ២០២៦ ក្រោយពេលដែលជម្លោះការទូតរវាងប្រទេសទាំងពីរផ្ទុះឡើង។
សកម្មភាពពាណិជ្ជកម្មនេះបានរារាំងការនាំចេញស្រារបស់អូស្ត្រាលីទៅកាន់ប្រទេសចិនដែលពីមុនជាទីផ្សារដ៏ធំបំផុតរបស់ខ្លួន ហើយបានបើកទ្វារទៅកាន់ប្រទេសផលិតស្រាផ្សេងទៀតដូចជាអាហ្វ្រិកខាងត្បូង និងឈីលីជាដើម។
ក្រុមហ៊ុន Wine Australia បាននិយាយថា ដើម្បីទប់ទល់នឹងការធ្លាក់ចុះការនាំចេញស្រាទៅកាន់តំបន់អាស៊ីភាគឦសាននេះ ស្រាអូស្ត្រាលីបាននាំចេញទៅកាន់ប្រទេសជប៉ុន និងកោះតៃវ៉ាន់ ដែលមកដល់ពេលនេះបានកើនឡើង ១៨% ទៅប្រទេសជប៉ុន និង ១៣%នៅកាន់តៃវ៉ាន់។
ក្រុមហ៊ុននេះបានបន្ថែមទៀតថា អូស្ត្រាលីក៏បាននាំចេញស្រាទៅកាន់បណ្ដាប្រទេសអាស៊ានមួយចំនួនដូចជាប្រទេសម៉ាឡេស៊ី និងថៃដែលបានជួយរួមចំណែកដល់កំណើននៃការនាំចេញនេះផងដែរ៕
