ក្នុងរយៈពេលត្រឹមតែ ៤ ថ្ងៃការឆ្លងក្នុងសហគមន៍នៅប្រទេសចិនសរុបចំនួនជាង ១០០ករណី ដែលឆ្លងក្នុងក្រុងចំនួន ៣ នៃខេត្ត ហ្វូជៀន រួមទាំងទីក្រុង សៀមិន (Xiamen) ដែលជាមជ្ឈមណ្ឌលទេសចរណ៍និងដឹកជញ្ជូនមួយដ៏សំខាន់របស់ប្រទេសចិន។
ការឆ្លងមេរោគនេះ កើតឡើងនៅមុនថ្ងៃបុណ្យជាតិ ដែលជារដូវទេសចរណ៍សំខាន់ ដែលនឹងត្រូវចាប់ផ្តើមនៅថ្ងៃទី ១ ខែតុលាខាងមុខនេះ។ ការផ្ទុះឡើងនៃការឆ្លងរីករាលដានក្នុងសហគមន៍ចុងក្រោយនៅក្នុងប្រទេសចិន គឺបានកើតឡើងចាប់ពីខែកក្កដា ដល់ ខែសីហា និងបានរំខានដល់ការធ្វើដំណើរ និងប៉ះពាល់ដល់វិស័យទេសចរណ៍ បដិសណ្ឋារកិច្ច ព្រមទាំងការដឹកជញ្ជូននានាផងដែរ។
ក្នុងនោះ ទីក្រុង ពូទៀន (Putian) និងទីក្រុង សៀមិន (Xiamen) បាននិងកំពុងបិទខ្ទប់តំបន់ខ្លះដែលមានហានិភ័យខ្ពស់នៃការឆ្លងរីករាលដាន។ ទន្ទឹមនេះ ក៏មានការកាត់បន្ថយចំនួនសិស្សក្នុងការរៀនផ្ទាល់នៅក្នុងថ្នាក់ ចាប់ពីថ្នាក់មត្តេយ្យដល់វិទ្យាល័យ ព្រមទាំងបិទកន្លែងសាធារណៈ ដូចជារោងកុន កន្លែងហាត់ប្រាណ និងភោជនីយដ្ឋានជាដើម។ មិនតែប៉ុណ្ណោះ អាជ្ញាធរក៏បានហាមពលរដ្ឋមិនឱ្យធ្វើដំណើរចេញពីផ្ទះផងដែរបើមិនមានការចាំបាច់ ។
អត្ថបទគួរអាន
លើសពីនេះទៀត កាលពីថ្ងៃអង្គារ អាកាសយានដ្ឋានអន្តរជាតិ សៀមិន ហ្គាវគី ជាមជ្ឈមណ្ឌលដឹកជញ្ជូនដ៏សំខាន់ បានលុបចោលជើងហោះហើរប្រហែល ៦០ ភាគរយ ទៅ-មកទីក្រុង សៀមិនផងដែរ។
សូមបញ្ជាក់ថា ទីក្រុង ពូតៀន និងទីក្រុង សៀមិន បានចាប់ផ្តើមធ្វើតេស្តិ៍រកមេរោគឆ្លងនៅទូទាំងទីក្រុងកាលពីថ្ងៃអង្គារ បើទោះបី ទីក្រុងទាំងនេះ មិនទាន់ប្រកាសពីការបិទទីក្រុងទាំងមូលដូចកាលពីដើមឆ្នាំ ២០២០ក៏ដោយ។ ដោយឡែក គិតត្រឹមថ្ងៃទី១៤ ខែកញ្ញានេះ ប្រទេសចិន មានករណីឆ្លងកូវីដសរុបប្រមាន ៩ម៉ឺន ៥ពាន់នាក់ និង ករណីស្លាប់ប្រមាណ ៤ពាន់ ៦រយនាក់។ នេះបើយោងតាមការចុះផ្សាយរបស់សារព័ត៌មាន CGTN៕
អត្ថបទ៖ ស៊ើង និមល់
None
