សារព័ត៌មានរដ្ឋកូរ៉េខាងជើង KCNA បានចុះផ្សាយកាលពីថ្ងៃច័ន្ទថា ប្រទេសកូរ៉េខាងជើងបានបាញ់សាកល្បងដោយជោគជ័យ នូវកាំជ្រួចមីស៊ីលរយៈចម្ងាយវែងថ្មីមួយ ហើយដែលត្រូវបានគេជឿថាជាអាវុធមីស៊ីលដំបូងរបស់កូរ៉េខាងជើង ដែលមានសមត្ថភាពនុយក្លេអ៊ែរខ្ពស់បំផុត។
ជុំវិញបញ្ហានេះ លោក សុង គីម (Sung Kim) ប្រេសិតពិសេសអាមេរិកសម្រាប់បញ្ហាកូរ៉េខាងជើង បាននិយាយនៅក្នុងកិច្ចប្រជុំថា ការវិវត្តថ្មីៗលើសមត្ថភាពគ្រាប់មីស៊ីលនៅកូរ៉េខាងជើង គឺជាការក្រើនរំលឹកពីសារៈសំខាន់នៃទំនាក់ទំនងយ៉ាងជិតស្និទ្ធ និងកិច្ចសហប្រតិបត្តិការគ្នារវាងប្រទេសទាំងបីរួមមាន ជប៉ុន កូរ៉េខាងត្បូង និងអាមេរិក។
ក្នុងកិច្ចប្រជុំដដែល សម្ព័ន្ធមិត្តទាំង៣បានពិភាក្សាគ្នាលើវិធីសាស្ត្រនានា ដើម្បីបញ្ជៀសការប្រឈមមុខដាក់គ្នារវាងកូរ៉េខាងជើង និងប្រទេសក្បែរខាងកូរ៉េខាងត្បូង ក៏ដូចជាជប៉ុនផងដែរ។ លើសពីនេះ ប្រទេសទាំងបីថែមទាំងឈានទៅពិភាក្សាពីវិធីសាស្ត្រក្នុងការឈានទៅបញ្ឈប់កម្មវិធីអាវុធនុយក្លេអ៊ែររបស់ក្រុងព្យុងយ៉ាងថែមទៀតផង។
ប៉ុន្តែភាគីអាមេរិកបានគូសបញ្ជាក់ថា ក្រុងវ៉ាស៊ីនតោននៅតែបើកចំហចំពោះផ្លូវការទូត ដើម្បីដោះស្រាយបញ្ហាកូរ៉េខាងជើង ខណៈដែលសេតវិមានអាមេរិក បានបង្ហើបឲ្យដឹងថាខ្លួននៅតែត្រៀមលក្ខណៈដើម្បីដោះស្រាយជាមួយក្រុងព្យុងយ៉ាង ទោះបីមានការសាកល្បងមីស៊ីលជាថ្មីម្តងទៀតក្តី។
អត្ថបទគួរអាន
យ៉ាងណាមិញ រដ្ឋបាលលោកចូ បៃឌិន មិនបានបង្ហាញពីចេតនាក្នុងការលើកលែងទណ្ឌកម្មសម្រាប់កូរ៉េខាងជើងនោះទេ។
សូមជម្រាបថា ដោយសារតែការបន្តអនុវត្ថកម្មវិធីអាវុធនុយក្លេអ៊ែរ និងការបាញ់សាកល្បងកាំជ្រួចមីស៊ីលរបស់កូរ៉េខាងជើងជារឿយៗ បានធ្វើឲ្យលោកខាងលិច និងជាពិសេសសហរដ្ឋអាមេរិកបន្តដាក់ទណ្ឌកម្មលើកូរ៉េខាងជើងឥតឈប់ឈរដូចគ្នា។
ប្រការនេះត្រូវបានក្រុងព្យុងយ៉ាងចោទប្រកាន់ថា
សហរដ្ឋអាមេរិក និងសម្ព័ន្ធមិត្តមិនដែលផ្លាស់ប្តូរឥរិយាបទរបស់ខ្លួនឡើយ
ដោយនៅតែបន្តធ្វើសមយុទ្ធយោធារួមគ្នា។ សមយុទ្ធដែល ទីក្រុងព្យុងយ៉ាង
ចាត់ទុកជាការគំរាមកំហែងតាមផ្លូវសង្គ្រាម។ ដូចនេះ
កូរ៉េខាងជើងក៏នៅតែបន្តកម្មវិធីអាវុធនុយក្លេអ៊ែរដូចគ្នាដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
