តើភាពមិនច្បាស់លាស់នៃការកាត់បន្ថយអត្រាការប្រាក់នៅអាម៉េរិក កំពុងបង្កផលប៉ះពាល់យ៉ាងណាដល់វិស័យធនាគារនៅអាស៊ាន?

មកទល់ពេលនេះ ធនាគារកណ្តាលអាម៉េរិក មិនទាន់បង្ហាញពីពេលវេលាច្បាស់លាស់ក្នុងការបន្ធូរបន្ថយអត្រាការប្រាក់របស់ខ្លួននៅឡើយទេ។ មូលហេតុនៃភាពមិនច្បាស់លាស់នេះ ត្រូវបានប្រធានធនគារកណ្ដាលអាម៉េរិក លោក ជេរ៉ូម ផៅវែល (Jerome Powell) បានអះអាងកាលពីសប្តាហ៍មុនថា គឺដោយសារតែកម្រិតអតិផរណានៅមិនទាន់មានភាពល្អប្រសើរ ប៉ុន្តែលោកបានបង្ហើបថា ការកាត់បន្ថយអត្រាការប្រាក់អាចធ្វើឡើងនៅក្នុងខែកញ្ញា ឬខែធ្នូ ខាងមុខនេះ។

ភាពមិនច្បាស់លាស់នៃការកាត់បន្ថយអត្រាការប្រាក់នៅអាម៉េរិកនេះ កំពុងដាក់សម្ពាធដល់បណ្តាធនាគារនៅក្នុងតំបន់អាស៊ាន ដោយជំរុញឱ្យពួកគេបង្កើនការប្រុងប្រយ័ត្ន និងរឹតបន្តឹងក្នុងការផ្តល់ប្រាក់កម្ចីដល់អតិថិជន ដែលវាអាចធ្វើឱ្យប៉ះពាល់ដល់ផែនការស្តារសេដ្ឋកិច្ចរបស់រដ្ឋា​ភិបាលនៅក្នុងបណ្តាប្រទេសទាំង១០ នៅតំបន់អាស៊ាន។

ក្រុមហ៊ុនវិភាគឥណទាន គ្រៀត (Criat) កាលពីខែមេសា បានកត់សម្គាល់ថា ដោយហេតុតែ ធនាគារកណ្តាលអាស៊ានដើរតាមគន្លងរបស់ធនាគារកណ្ដាលអាម៉េរិក ដើម្បីកាត់បន្ថយអត្រាការប្រាក់របស់ពួកគេនោះ ដូច្នេះបើទោះគ្រឹះស្ថានហិរញ្ញវត្ថុនៅអាស៊ានរំពឹងការផ្តល់ប្រាក់កម្ចីរបស់ពួកគេមានភាពល្អប្រសើរក៏ដោយ ក៏ពួកគេនៅតែប្រឈមនឹងហានិភ័យ នៃការខកខានសងបំណុលរបស់អតិថិជន។

ក្រុមហ៊ុន គ្រៀត​ បានវាយតម្លៃថា តារាងតុល្យការរបស់ធនាគារអាស៊ានទំនងជានឹងកាន់តែអាក្រក់ឡើងៗនៅក្នុង៣ត្រីមាសខាងមុខនេះ ដោយរងផលប៉ះពាល់ពីសាជីវកម្មខ្នាតតូច និងមធ្យម(SME) ដែលដំណើរការនៅក្នុងបរិយាកាសរូបិយវត្ថុដ៏តឹងតែង ដោយសារសាជីវកម្ម SME ទំនងជានឹងមានបញ្ហាសាច់ប្រាក់ងាយស្រួលនៅក្នុងរង្វង់ពេលនោះ៕

អត្ថបទ៖ សុខ មង្គល