នៅក្នុងសេចក្ដីថ្លែងការរបស់អាជ្ញាធររដ្ឋធានីប៉េកាំង បានអះអាងថា អាជ្ញាធរមានបំណងក្នុងការធានាឲ្យបាននូវការទប់ទល់កូវីដ១៩មិនឲ្យឆ្លងរីករាលដាលនៅក្នុងស្រុក និងធានានូវការធ្វើជាម្ចាស់ផ្ទះដោយជោគជ័យនៃការរៀបចំព្រឹត្តិការណ៍កីឡាអូឡាំពិករដូររងា ដែលនឹងធ្វើឡើងនៅក្នុងទីក្រុងប៉េកាំងនៅខែកុម្ភៈឆ្នាំ២០២២ខាងមុខនេះ។ ទន្ទឹមនឹងនេះ អាជ្ញាធរនឹងធ្វើយ៉ាងណាឲ្យប្រជាជនអាចមានថ្ងៃឈប់សម្រាកប្រកបដោយរីករាយ សន្ដិភាព និងស្ងប់ស្ងាត់ ដោយមិនមានការឆ្លងកូវីដ១៩។
ដើម្បីធានាបាននូវគោលដៅទាំងនេះ រដ្ឋអំណាចចិនបានលើកទឹកចិត្តឲ្យពលរដ្ឋរបស់ខ្លួនមិនគួរចេញធ្វើដំណើរកម្សាន្ដទៅក្រៅទីក្រុងនោះទេ ហើយការជួបជុំមួយចំនួន គួរតែធ្វើឡើងតាមប្រព័ន្ធអ៊ីនធើណែតវិញ។
ខេត្តភាគខាងជើងប្រទេសចិន គឺខេត្ត ហ៊ូប៉ី ដែលនឹងត្រូវចូលរួមរៀបចំកីឡាអូឡាំពិកជាមួយក្រុងប៉េកាំងដែរនោះ ក៏ដូចជាទីក្រុងជាច្រើនផ្សេងទៀត បានដាក់ចេញនូវការណែនាំស្រដៀងគ្នានេះដែរ។
យ៉ាងណាក៏ដោយចុះ ក្រុមហ៊ុនផ្លូវរថភ្លើងរដ្ឋចិន បានលើកឡើងថា ចំនួនអ្នកដំណើរតាមរថភ្លើងនៅក្នុងរយៈពេលធ្វើដំណើរ ៤០ថ្ងៃសម្រាប់បុណ្យចូលឆ្នាំចិនខាងមុខនេះ ត្រូវបានរំពឹងថា នឹងអាចកើនឡើងខ្លាំងធៀបនឹងឆ្នាំទៅមិញ។
អត្ថបទទាក់ទង
គួរបញ្ជាក់ថា នៅមុនពេលកូវីដ១៩រាតត្បាត ការធ្វើដំណើរនៅក្នុងប្រទេសចិនអំឡុងពេលឈប់សម្រាកបុណ្យចូលឆ្នាំចិន គឺមានក្នុងចំនួនច្រើនបំផុត ដោយសារតែចិន មានអ្នកចំណាកស្រុកធ្វើការងារច្រើនជាងគេក្នុងពិភពលោក ពោលគឺ នៅអំឡុងពេលបុណ្យចូលឆ្នាំចិន មានពលរដ្ឋចិនរាប់រយលាននាក់ដែលចំណាកស្រុក នឹងត្រឡប់ទៅលេងស្រុកកំណើតរបស់ពួកគេវិញ។
មន្ត្រីគណៈកម្មការសុខភាពជាតិចិន បាននិយាយដែរថា រដ្ឋាភិបាលមិនគួរប្រើច្បាប់តឹងរឹងតែ១ អនុវត្តនៅទូទាំងប្រទេសយ៉ាងដូច្នេះទេ ពោលគឺ រដ្ឋាភិបាល ឬអាជ្ញាធរតាមតំបន់នានាគួរតែថ្លឹងថ្លែងមើលឲ្យមានតុល្យភាព រវាងតម្រូវការរបស់ប្រជាជនក្នុងការជួបជុំក្រុមគ្រួសាររបស់ពួកគេនៅអំឡុងថ្ងៃឈប់សម្រាក និងការគ្រប់គ្រងកូវីដ១៩។ យ៉ាងណាក៏ដោយចុះ អ្នកជំនាញគូសបញ្ជាក់ថា ក្រុងប៉េកាំងក៏ដូចជាតំបន់ផ្សេងៗទៀត ដែលមានហានិភ័យឆ្លងខ្ពស់ គួរតែត្រូវមានការរឹតត្បិតច្បាប់តឹងរឹងលើការឆ្លងចេញចូលទីក្រុង និងកំពង់ផែជាដើម។ អ្នកដែលស្ថិតនៅក្នុងក្រុមមនុស្សវ័យចំណាស់ ដែលមានហានិភ័យឆ្លងកូវីដ១៩ ក៏គួរតែជៀសវាងការធ្វើដំណើរ និងការជួបជុំនានាផងដែរ។
ប្រទេសចិនថ្មីៗនេះ នៅមានករណីឆ្លងកូវីដ១៩ក្នុងកម្រិតទាបនៅឡើយបើធៀបនឹងប្រទេសជាច្រើនផ្សេងទៀត ពោលគឺករណីឆ្លងក្នុងសហគមន៍ប្រចាំថ្ងៃនៅចិន គឺមានតិជាង១០០នាក់ប៉ុណ្ណោះ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
