រូបិយប័ណ្ណឌីជីថល ឬគ្រីបតូដ៏ធំបំផុតរបស់ពិភពលោក Bitcoin បានធ្លាក់ចុះយ៉ាងខ្លាំងមកនៅត្រឹមជាង៦ម៉ឺន៣ពាន់ដុល្លារអាម៉េរិកក្នុង១កាក់ ដែលជាការធ្លាក់ចុះទាបបំផុតមិនធ្លាប់មានចាប់តាំងពីខែតុលា ឆ្នាំ២០២៤ បើទោះលោក ដូណាល់ ត្រាំ ក្នុងអំឡុងពេលឃោសនារកសំឡេងឆ្នោតប្រកាសថា នឹងជួយគាំទ្ររូបិយប័ណ្ណនេះក៏ដោយ។ បើយោងតាមទិន្នន័យរបស់ CoinGlass មានការលក់ទ្រព្យសម្បត្តិ Bitcoin រហូតដល់១ពាន់លានដុល្លារអាម៉េរិកត្រឹមតែរយៈពេល២៤ម៉ោងប៉ុណ្ណោះ។
ទីផ្សាររូបិយប័ណ្ណគ្រីបតូសកលបានខាតបង់រហូតដល់ទៅ២ទ្រីលានដុល្លារអាម៉េរិកចាប់តាំងពីឈានដល់កម្រិតកំពូល៤,៣ទ្រីលានដុល្លារអាម៉េរិកកាលពីដើមខែតុលា ឆ្នាំ២០២៥។ យ៉ាងណាមិញតម្លៃ Bitcoin បានធ្លាក់ចុះប្រមាណ១៧%នៅសប្តាហ៍នេះ ដែលអាចធ្វើឱ្យខាតបង់ប្រមាណ២៨%រួចទៅហើយនៅឆ្នាំនេះ។ ជាមួយគ្នានេះ តម្លៃរូបិយប័ណ្ណ អ៊ីធើរ (Ether) ដែលជារូបិយប័ណ្ណគ្រីបតូធំជាងគេលំដាប់ទី២នៅលើពិភពលោកបានធ្លាក់ចុះជាង១៣%មកនៅត្រឹម១,៨៥៤ដុល្លារអាម៉េរិកក្នុង១កាក់កាលពីថ្ងៃព្រហស្បតិ៍។ ជារួមនៅក្នុងសប្តាហ៍នេះតម្លៃគ្រីបតូ Ether បានធ្លាក់ចុះ១៩%។
ទំនុកចិត្តលើរូបិយប័ណ្ណគ្រីបតូបានរងផលប៉ះពាល់ដោយសារការលក់លោហៈមានតម្លៃ និងភាគហ៊ុនដូចជាមាស និងប្រាក់ មានភាពប្រែប្រួលកាន់តែខ្លាំងឡើង ដែលបណ្ដាលមកពីការទិញដ៏មានឥទ្ធិពល និងលំហូរនៃការកេងកម្រៃ។ សន្ទស្សន៍ផ្សារភាគហ៊ុនរបស់ S&P 500 បានធ្លាក់ចុះដល់កម្រិតទាបបំផុតនៅ៧សប្តាហ៍កន្លងមកនេះ ខណៈទីផ្សារភាគហ៊ុន Nasdaq បានធ្លាក់ចុះដល់កម្រិតទាបបំផុតក្នុងរយៈពេល២កន្លងមកនេះកាលពីថ្ងៃព្រហស្បតិ៍៕
អត្ថបទៈ សួន ឡង់ទី. រូបភាពៈ ឯកសារបរទេស
