Bitcoin ហក់ឡើងថ្លៃលើស៩ម៉ឺនដុល្លារអាម៉េរិកក្នុងមួយកាក់ ដែលជាកម្រិតកំណត់ត្រាថ្មីមិនធ្លាប់មានជាប្រវត្តិសាស្ត្រ

ចាប់តាំងពីការបោះឆ្នោតជ្រើសរើសប្រធានាធិបតីអាម៉េរិក កាលពីថ្ងៃទី៥ ខែវិច្ឆិកា មក Bitcoin បានក្លាយជាចំណុចចាប់អារម្មណ៍បំផុតមួយសម្រាប់បណ្ដាវិនិយោគិនទូទាំងពិភពលោក ហើយកាលពីថ្ងៃពុធ ទី១៣ ខែវិច្ឆិកា Bitcoin បានហក់ឡើងថ្លៃឈានដល់កម្រិតកំណត់ត្រាថ្មីមិនធ្លាប់មានជាប្រវត្តិសាស្ត្ររហូតដល់ជិត៩៣.៥០០ដុល្លារអាម៉េរិក។

ទោះបីជាវាបានធ្លាក់ថ្លៃបន្តិចវិញមកនៅ៨៨.១៨៥ដុល្លារអាម៉េរិក ក្នុងមួយកាក់យ៉ាងណាក្ដី ក៏ Bitcoin បានហក់ឡើងថ្លៃរហូតដល់ទៅ៣២% ចាប់តាំងពីការបោះឆ្នោតជ្រើសរើសប្រធានាធិបតីអាម៉េរិកកាលពីថ្ងៃទី៥ ខែវិច្ឆិកា ឆ្នាំនេះ។

ទន្ទឹមនេះ រូបិយប័ណ្ណឌីជីថល ឬគ្រីបតូផ្សេងៗទៀតក៏បានហក់ឡើងថ្លៃផងដែរ ដោយក្នុងនោះគ្រីបតូ អ៊ីសឺ (Ether) បានហក់ឡើងថ្លៃ៣៧% ចាប់តាំងពីថ្ងៃបោះឆ្នោតមក ខណៈដែលគ្រីបតូ ដចខ័ញ (Dogecoin) ដែលគាំទ្រដោយលោក Elon Musk ជាកំពូលមហាសេដ្ឋីមានទ្រព្យសម្បត្តិច្រើនបំផុតរបស់ពិភពលោកដែលគាំទ្រលោក ដូណាល់ ត្រាំ ក៏បានហក់ឡើងរហូតដល់ទៅជាង១៥០%ផងដែរ៕