លោក ដេវីត វាយហូស (David Whitehouse) នាយកប្រតិបត្តិក្រុមហ៊ុន Offshore Energies UK បានព្រមានថា ចក្រភពអង់គ្លេសនឹងប្រឈមនឹងការខាតបង់សេដ្ឋកិច្ចធ្ងន់ធ្ងររហូតដល់១៧ពាន់លានដុល្លារពីឆ្នាំ២០២៥ ដល់ឆ្នាំ២០២៩ បើរដ្ឋាភិបាលរបស់ប្រទេសនេះពិតជាដំឡើងពន្ធលើវិស័យប្រេងឥន្ធនៈ និងឧស្ម័នមែននោះ។ អ្នកជំនាញរូបនេះអះអាងថា នៅពេលរដ្ឋាភិបាលដំឡើងពន្ធនោះ ចង់ ឬមិនចង់ក្រុមហ៊ុនរកស៊ីក្នុងវិស័យនេះនឹងដំឡើងថ្លៃប្រេងឥន្ធនៈ និងឧស្ម័នដូចគ្នា ហើយវានឹងធ្វើឱ្យប៉ះពាល់ដល់ការចំណាយរបស់ប្រជាពលរដ្ឋ និងការវិនិយោគរបស់ក្រុមហ៊ុននានា។ ក្រៅពីខាតបង់សេដ្ឋកិច្ច ផែនការដំឡើងពន្ធនេះ ក៏នឹងធ្វើឱ្យប៉ះពាល់ដល់ការងាររបស់ប្រជាពលរដ្ឋប្រមាណ៣ម៉ឺន៥ពាន់នាក់ផងដែរ។
ពាក់ព័ន្ធនឹងគម្រោងដំឡើងពន្ធនេះ អ្នកនាំពាក្យក្រសួងរតនាគារចក្រភពអង់គ្លេស បាននិយាយថា រដ្ឋាភិបាលប្ដេជ្ញានឹងពិភាក្សាក្នុងន័យស្ថាបនាជាមួយឧស្សាហកម្មប្រេង និងឧស្ម័ន ជុំវិញគម្រោងការបង្កើនពន្ធនេះ។ នៅក្រោមផែនការរបស់រដ្ឋាភិបាលអង់គ្លេស ពន្ធលើប្រាក់ចំណេញក្នុងវិស័យថាមពល និងឧស្ម័ន នឹងត្រូវដំឡើងពី៣៥% ទៅ៣៨% ចាប់ពីថ្ងៃទី១ ខែវិច្ឆិកា ឆ្នាំ២០២៤ តទៅ ដូច្នេះអត្រាពន្ធសរុបលើប្រាក់ចំណេញ ដែលក្រុមហ៊ុនប្រេងឥន្ធនៈ និងថាមពលនៅចក្រភពអង់គ្លេសត្រូវរ៉ាប់រងនោះត្រូវបានគេរំពឹងថានឹងឡើងដល់៧៨%។
លោក ដេវីត វាយហូស បាននិយាយថា ការកែប្រែពន្ធលើថាមពល នឹងធ្វើឲ្យប៉ះពាល់ដល់ផែនការរបស់រដ្ឋាភិបាលអង់គ្លេស ដែលបានដាក់ចេញកន្លងមក ដើម្បីជំរុញកំណើនសេដ្ឋកិច្ច ហើយវាក៏នឹងកាត់បន្ថយការរួមចំណែករបស់វិស័យឧស្សាហ៍កម្មថាមពលចំពោះសេដ្ឋកិច្ចចក្រភពអង់គ្លេសផងដែរ។ លោកបានអះអាងថា ក្នុងរយៈពេលជាង២ឆ្នាំកន្លងមកនេះ ក្រុមហ៊ុនប្រេង និងឧស្ម័នរបស់ចក្រភពអង់គ្លេសបានបង់ពន្ធលើសអត្រាពន្ធសាជីវកម្មនៃវិស័យផ្សេងទៀតដល់ទៅ៣ដងឯណោះ៕
ដោយៈ សរ សុជាតិ
