ទោះបីសេដ្ឋកិច្ចពិភពលោករួមទាំងកម្ពុជា នៅតែបន្តស្ថិតក្នុងភាពមិនប្រាកដប្រជាយ៉ាងណាក្តី តែការធ្វើពាណិជ្ជកម្មរបស់កម្ពុជា នៅតែរក្សាបានភាពរឹងមាំ និងមានកំណើនគួរឱ្យកត់សម្គាល់នៅមួយរយៈចុងក្រោយនេះ។ ជាក់ស្តែងនៅក្នុងរយៈពេល៨ខែកន្លងមកនេះ ការដោះដូរពាណិជ្ជកម្មរបស់កម្ពុជា បានឈានដល់ជាង៣៦ពាន់លានដុល្លារ មានការកើនឡើងជាង១៦% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជា នាំចេញទៅកាន់ទីផ្សារអន្តរជាតិ សម្រេចបានទំហំទឹកប្រាក់ជាង១៧ពាន់លានដុល្លារ កើនឡើងជាង១៦% ខណៈការនាំចូលមានទំហំជិត១៩ពាន់លានដុល្លារ កើនឡើងជាង១៦%។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានវាយតម្លៃថា ការរក្សាបានភាពរឹងមាំនៃការដោះដូរពាណិជ្ជកម្មរបស់កម្ពុជានេះ គឺកើតចេញពីលទ្ធផលនៃការអនុវត្តសេដ្ឋកិច្ចការទូតរបស់រាជរដ្ឋាភិបាលកម្ពុជា គួបផ្សំទំនិញរបស់កម្ពុជា មានតម្រូវការបញ្ជាទិញខ្ពស់ពីទីផ្សារអន្តរជាតិ។ ភាពល្អប្រសើរនៃការដោះដូរពាណិជ្ជកម្មរបស់កម្ពុជានេះ ត្រូវបានគាំទ្រដោយកំណើននាំចេញផលិតផលកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរទៅកាន់ទីផ្សារអឺរ៉ុប និងសហរដ្ឋអាម៉េរិក។
អត្ថបទគួរអាន
តាមរយៈកំណើននេះបានជំរុញឱ្យអ្នកជំនាញរូបនេះជឿជាក់ថា ការដោះដូរពាណិជ្ជកម្មអន្តរជាតិរបស់កម្ពុជានៅពេញមួយឆ្នាំ២០២៤នេះ និងឆ្នាំ២០២៥ខាងមុខ នឹងមានការកើនឡើងបន្ថែមទៀត។
តាមរយៈការរក្សាបានកំណើននៃការដោះដូរពាណិជ្ជកម្មនេះ លោក លី សូដេត អ្នកសេដ្ឋកិច្ចជាន់ខ្ពស់ នៃធនាគារពិភពលោកប្រចាំនៅកម្ពុជាជឿជាក់ថា សេដ្ឋកិច្ចរបស់កម្ពុជា នៅក្នុងឆ្នាំ២០២៤ នេះ នឹងនៅតែរក្សាបានភាពរឹងមាំ និងធន់នឹងវិបត្តិ។ ជាមួយគ្នានេះជំនាញរូបនេះបានឯកភាពចំពោះការព្យាកររបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣(AMRO)ដែលរំពឹងថា សេដ្ឋកិច្ចកម្ពុជានឹងសម្រេចបានកំណើន៥,៦% នៅឆ្នាំនេះ ហើយនឹងបន្តកើនឡើងដល់៥,៩% នៅឆ្នាំ២០២៥។
គួរជម្រាបថា នៅក្នុងចំណោមដៃគូពាណិជ្ជកម្មសំខាន់ៗនៅរយៈពេល៨ខែឆ្នាំនេះ ប្រទេសចិន បានក្លាយជាដៃគូពាណិជ្ជកម្មធំជាងរបស់កម្ពុជា ជាមួយទំហំទឹកប្រាក់ជាង១០ពាន់លានដុល្លារ កើនឡើងជាង ២៤% បន្ទាប់មកគឺទីផ្សារសហរដ្ឋអាម៉េរិក ជាមួយទំហំទឹកប្រាក់ជិត៧ពាន់លានដុល្លារ កើនឡើងជាង១០% តាមពីក្រោយដោយទីផ្សារវៀតណាម ជាមួយទំហំពាណិជ្ជកម្មជាង៥ពាន់លានដុល្លារកើនឡើងជាង២១% និងទីផ្សារសំខាន់ៗផ្សេងទៀត៕
None
