កម្ពុជា នាំចេញផលនេសាទបន្តធ្លាក់ចុះនៅក្នុងរយៈពេល៤ខែ

ការនាំចេញផលនេសាទរបស់កម្ពុជាទៅកាន់ទីផ្សារអន្តរជាតិក្នុងរយៈពេល៤ខែដំបូងដើមឆ្នាំ២០២០នេះបានបង្ហាញពីតួលេខធ្លាក់ចុះទាំងផលនេសាទស្រស់ និងផលនេសាទកែច្នៃ។ ការធ្លាក់ចុះនេះដោយសារតែការរីករាលដាលនៃជំងឺកូវីដ ១៩ បានជះឥទ្ធិពលអវិជ្ជមានដល់ការនាំចេញផលិតផលនេសាទកម្ពុជាទៅកាន់ទីផ្សារអន្តរជាតិ។ហើយវិបត្តិជំងឺកូវីដនេះ មិនត្រឹមតែប៉ះពាល់ដល់ការនាំចេញផលិតផលនេសាទកម្ពុជានោះទេ វាបានធ្វើប្រទេសជាច្រើនក្នុងសកលលោករងផលប៉ះពាល់សេដ្ឋកិច្ចផងដែរ។ នេះបើតាមការបញ្ជាក់ពីក្រសួងកសិកម្មកម្ពុជា។

បើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទបង្ហាញថា ផលនេសាទស្រស់អនុវត្តសរុបរយៈពេល៤ខែ បានចំនួន១ពាន់១៤០តោន ស្នើនឹងជាង៧ភាគរយនៃផែនការ ១ម៉ឺន៥ពាន់តោន ធៀបនឹងខែមេសាឆ្នាំ២០១៩ ថយចុះ១ពាន់៩០០តោន ខណៈការនាំចេញផលនេសាទកែច្នៃមានចំនួនត្រឹមតែ ២៣២ តោន ស្នើនឹងជាង ៤ភាគរយនៃផែនការ ៥ពាន់តោន ដោយថយចុះជាង១ពាន់តោន។

ទិន្នន័យនៃការនាំចេញផលនេសាទមានការថយចុះនាពេលនេះមិនបានឆ្លុះបង្ហាញទាំងស្រុងថា ការកែច្នៃផលនេសាទនៅកម្ពុជាសុទ្ធតែមានការថយចុះទាំងអស់នោះដែរ ពោលគឺការកែច្នៃផលនេសាទសមុទ្រអនុវត្តបានជាង ៤ពាន់តោន ស្នើនឹង ៤៥ភាគរយនៃផែនការ ៩ពាន់តោន កើនឡើងជាង ៣០តោន ខណៈការកែច្នៃផលិតទឹកត្រីសរុបជាង ១៧លានលីត្រ កើនជាង ២១ម៉ឺនលីត្រ៕