មជ្ឈមណ្ឌលព័ត៌មានអចលនទ្រព្យថៃ បាននិយាយកាលពីថ្ងៃព្រហស្បតិ៍ថា គោលនយោបាយរបស់នាយករដ្ឋមន្ត្រី ស៊្រីថា ថាវេស៊ីន ក្នុងការផ្តល់ទិដ្ឋាការដោយឥតគិតថ្លៃដល់ភ្ញៀវទេសចរចិន និងឥណ្ឌាអាចនឹងជំរុញការលក់ខុនដូ និងវិស័យទេសចរណ៍។
ពាក់ព័ន្ធនឹងបញ្ហានេះ សមាគមទីភ្នាក់ងារទេសចរណ៍ថៃ បានអះអាងថា គោលនយោបាយទិដ្ឋាការ ពិតមានផលដល់វិស័យទេសចរណ៍មែន ប៉ុន្តែទីផ្សារត្រូវបានរារាំងដោយវិបត្តិសេដ្ឋកិច្ច និងបញ្ហាតភ្ជាប់ជាមួយនឹងជើងហោះហើរ ព្រមទាំងកង្វះខាតនៃបញ្ហាពាក់ព័ន្ធ។
អ្នកជំនាញអះអាងថា បញ្ហាបន្ទាន់នាពេលនេះ គឺជំរុញការផ្សព្វផ្សាយ និងផែនការទាក់ទាញភ្ញៀវទេសចរឲ្យបានច្រើន និងបញ្ជាក់ជាថ្មីថា ប្រទេសថៃជាគោលដៅសុវត្ថិភាពសម្រាប់អ្នកធ្វើដំណើរ។
ដោយឡែក សម្រាប់វិស័យអចលនទ្រព្យ លោក វីឆៃ វីរ៉ាត់កាផាន់ ( Wichai Wiratkapan) នាយកស្តីទីនៃមជ្ឈមណ្ឌលអចលនទ្រព្យថៃ បានអះអាងថា វិស័យអចលនទ្រព្យថៃនឹងងើបឡើងវិញបន្តិចបន្ទាប់ពីការធ្លាក់ចុះនៃសេដ្ឋកិច្ច និងការដាក់ចេញបទប្បញ្ញត្តិរបស់ស្ថាប័នហិរញ្ញវត្ថុដ៏តឹងរ៉ឹងលើការខ្ចីប្រាក់។
លោកបាននិយាយថា ការស្ទុះងើបសេដ្ឋកិច្ចយឺត ការដំឡើងអត្រាការប្រាក់ និងការកើនឡើងបំណុលគ្រួសារធៀបទៅនឹងសមាមាត្រផលិតផលក្នុងស្រុកសរុប គឺជាកត្តាមួយក្នុងចំណោមកត្តា ដែលបានប៉ះពាល់ដល់តម្រូវការ និងការផ្គត់ផ្គង់ ក្នុងរយៈពេលពីរត្រីមាសកន្លងមក។
យោងតាមមជ្ឈមណ្ឌលព័ត៌មានអចលនទ្រព្យថៃបានឲ្យដឹងថា ការផ្ទេរកម្មសិទ្ធិនៃខុនដូទៅឱ្យជនបរទេសសម្រាប់គោលបំណងរស់នៅ និងការវិនិយោគបានងើបឡើងវិញពីវិបត្តិកូវីដ១៩។
ប្រភពដដែលបានអះអាងថា នៅឆមាសទីមួយនៃឆ្នាំ២០២៣ ខុនដូចំនួន ប្រមាណជា ៧ ៣០០ យូនីត កើនឡើងជិត៦៦% រីឯតម្លៃមានប្រមាណជាង ១ពាន់លានដុល្លារកើនឡើងជិត៥៨%។
ប្រភពដដែលបានបន្តថា នៅក្នុងចំណោមអតិថិជនសរុប ជនជាតិចិនបាន ទិញខុនដូសរុបរហូតដល់ទៅ ជាង ៣ ៤០០ យូនីត ដែលមានតម្លៃប្រមាណជាជិត៤៩០ លានដុល្លារ បន្ទាប់មក គឺជនជាតិរុស្ស៊ី និងអាមេរិកជាដើម។
