រដ្ឋាភិបាលកំពុងប្រមូលធាតុចូល ដើម្បីឈានទៅសិក្សាលទ្ធភាពក្នុងការផ្តល់ហិរញ្ញប្បទានអន្តរាគមន៍លើតម្លៃដំឡូងមី

ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម បានគូសបញ្ជាក់ឱ្យដឹងថា កាលពីពេលថ្មីៗនេះ ក្រសួងពាណិជ្ជកម្ម បានរៀបចំកិច្ចប្រជុំមួយជាមួយភាគីពាក់ព័ន្ធក្នុងគោលបំណងពិភាក្សាជុំវិញផែនការសម្របសម្រួល និងដោះស្រាយកិច្ចសម្រួលពាណិជ្ជកម្មដំឡូងមី ឆ្នាំ២០២៥ ដោយក្នុងនោះ រួមមានកិច្ចសម្រួលពាណិជ្ជកម្មក្នុងការទិញលក់ដំឡូងមីនៅក្នុងប្រទេស កិច្ចសម្រួលពាណិជ្ជកម្មថ្លៃដំឡូងមី និងកិច្ចសម្រួលពាណិជ្ជកម្មនៃការនាំចេញដំឡូងមី។ មន្រ្តីជាន់ខ្ពស់រូបនេះ បានបញ្ជាក់ដែរថា តាមរយៈកិច្ចពិភាក្សានេះ ក្រសួងពាណិជ្ជកម្ម បានសហការជាមួយក្រសួងពាក់ព័ន្ធដាក់ចេញនូវវិធានការដោះស្រាយបញ្ហាស្តង់ដាគុណភាពដំឡូងមី និងតម្លាភាពរវាងកសិករ និងក្រុមហ៊ុនប្រមូលទិញ។

តែយ៉ាងណា ឯកឧត្តម វ៉ា រុតសាន បានអះអាងថា បញ្ហាប្រឈមក្នុងការកិច្ចសម្រួលពាណិជ្ជកម្មថ្លៃដំឡូងមីនេះ គឺដោយសាររដ្ឋនៅពុំទាន់ទទួលបានទិន្នន័យគ្រប់គ្រាន់ពីស្ថានភាពដំឡូងមីនៅកម្ពុជា ដូច្នេះហើយទើបរដ្ឋពិបាកក្នុងការផ្តល់ហិរញ្ញប្បទានសម្រាប់អន្តរាគមន៍លើបញ្ហាថ្លៃដំឡូងមី​។ ដូច្នេះតាមរយៈកិច្ចពិភាក្សាខាងលើនេះ ក្រសួងពាក់ព័ន្ធ​កំពុងប្រមូលទិន្នន័យបន្ថែម ទាំងទិន្នន័យនៃសមត្ថភាពនាំចេញ សមត្ថភាពផលិត និងកែច្នៃរបស់ក្រុមហ៊ុននាំចេញនីមួយៗ ដើម្បីយកទៅសិក្សាលទ្ធភាព ដើម្បីឱ្យរដ្ឋអាចជួយផ្តល់ហិរញ្ញប្បទានសម្រាប់អន្តរាគមន៍លើតម្លៃដំឡូងមីនៅកម្ពុជា។

​ជាមួយគ្នានេះ លោក ស៊ីន វុទ្ធី អគ្គលេខាធិការសមាគមសម្ព័ន្ធដំឡូងមីកម្ពុជា-ចិន យល់ឃើញថា ប្រសិនបើរដ្ឋពិតជាមានកញ្ចប់ថវិកាសម្រាប់អន្តរាគមន៍នៅពេលដំឡូងមីធ្លាក់ថ្លៃមែននោះ វាជាការល្អក្នុងការជួយទ្រទ្រង់តម្លៃដំឡូងមីកុំឱ្យបន្តធ្លាក់ថ្លៃបន្ថែមទៀត ហើយតាមរយៈការជួយពង្រឹងនូវគុណភាពដំឡូងមីឱ្យបានកាន់តែល្អថែមទៀតនោះ វាក៏ជួយជំរុញឱ្យតម្លៃដំឡូងមីមានស្ថានភាពល្អជាងមុន ក៏ដូចជាអាចទាក់ទាញអ្នកវិនិយោគក្នុងវិស័យនេះឱ្យមកបោះទុនវិនិយោគនៅកម្ពុជា ផងដែរ។

​គួរជម្រាបថា បើតាមការបញ្ជាក់របស់លោក ស៊ីន វុទ្ធី តម្លៃដំឡូងមីស្រស់ដែលប្រជាកសិករអាចលក់បាននាពេលបច្ចុប្បន្ននេះ មានតម្លៃចន្លោះពី១៥០រៀល ទៅ២២០រៀល ក្នុងមួយគីឡូក្រាម ទៅតាមតំបន់នីមួយៗ ដោយឡែកសម្រាប់តម្លៃដំឡូងមីស្ងួតវិញ មានតម្លៃចន្លោះពី៤៤០រៀល ទៅ៥៥០រៀលក្នុងមួយគីឡូក្រាម៕